سەردانی گەشتیاران بۆ ناوچە گەشتیارییەکانی باکووری کوردستان زیادی کردووە، تەنیا لە ماوەی 10 مانگی ئەمساڵدا نزیکەی سێ ملیۆن گەشتیار سەردانی مێردینیان کردووە.
مستەفا یامان، پارێزگار و بریکاری سەرۆکی گەورەشارەوانیی مێردین ڕایگەیاند، لەسەرەتای ئەمساڵەوە، نزیکەی سێ ملیۆن گەشتیار سەردانی مێردینیان کردووە.
یامان ئاماژەی بەوەدا، لە ڕۆژانی کۆتایی هەفتە لە سەرجەم هۆتێل و مۆتێلەکانی مێردین شوێنی چۆڵ نامێنێت و جمەیان دێت لە گەشتیار.
بریکاری سەرۆکی گەورەشارەوانیی مێردین دەڵی، ئەو گەشتیارانەی بەمەبەستی مانەوە ڕوو لەم شارە دەکەن تائێستا ژمارەیان لە 400 هەزار زیاتر بووە و، چوون و هاتنی ڕۆژانەی گەشتیاران زیاتر لە دوو ملیۆن گەشتیار بووە و کۆی گشتی گەشتیارانی ڕۆژانە و ئەوانەش کە بە شەو دەمێننەوە نزیکەی سێ ملیۆن گەشتیار بووە لە 10 مانگی ئەمساڵدا.
شاری مێردین شاری پێکەوەژیانی چەندین سەدەی زمان و ئایین و کولتوورە جیاجیاکانە، شوێنی مزگەوت بینا بەردینە مێژووییەکانە و، بەم ساڵانەی دوایی بووەتە جێی سەرنجی گەشتیاران.[1]
#27-10-2018#