بۆ ئەو هێز و لایەن و کەسایەتیانەی مەبەستیانە بزانن. ئێمە نێوەندێکی لێکۆڵینەوەی زانستیمان هەیە کە چەند مانگێکە سەرقاڵی سەر ڕێگەخستنین و تا ئێستا ڕامان نەگەیاندووە. ئەم نێوەندە بەشێوەیەکی کاتی ئۆفیسەکەی کە لە دوو ژوور پێکهاتووە، کەوتۆتە تەلاری چاڤی مۆڵی کۆن لە نهۆمی یەکەم.
تا ئێرە کێشەیەک نییە، کێشەکە لەوکاتەوە دەست پێدەکات کاتێک هێزێکی چەکداری ئاسایش، هێزێکی گەورە بەسەرپەرشتی لیژنەی ئەمنی سلێمانی کە پێکهاتبوو لە دژە تیرۆر و ئاسایش و سکرتاریەت. بەفەرمانی وەزیری بەناو ڕۆشنبیری پەلاماری کەناڵی NRT دەدەن و دایدەخەن. هەر هەمان هێز بۆ ڕۆژی دواتر پەلاماری تەلاری چاڤی مۆڵ دەدەن، چ پەلامارێک؟ پەلامارێک کە وەبیرهێنەرەوەی هێزە بەربەریەکانی مێژووی کۆن و نوێ یە. خودی ئەم هیزە جگە لەوەسفی بەربەریزم و فاشیزم هیچ وەسفێکی دیکە هەڵناگرێ. ئەم هێزە بەربەریە کە لە سەرووی قانوونەوەیە.کە دەچنە بیناکەوە دەست دەکەنە شکاندنی دەرگاکان، شکاندنی قفڵی دەرگا شوشەییەکان، کە دەچنە ناو ژورەکانەوە داستان گەلێک تۆمار دەکەن. شکاندنی کۆمپیوتەر و پرینتەر، دزینی کۆمپیوتەر و مۆبایل و کتێب وپێداویستیەکانی ئۆفیس. تەنیا لە ئۆفیسەکەی ئێمە،کە وێنەکانی بڵاودەکەینەوە، 3 کۆمپیوتەر و 5 مۆبایل، بە تاڵان بردووە. ئەم هێزە هەموو پرنسیپێکیان شکاندووە، سەلاجەکەیان شکاندوە، چی لەسەلاجەکەدا بووە تاڵانیان کردووە، کورسی مێزیان شەق تێهەڵداوە، چەندین کتێبیان بەزمانەکانی ئینگلیزی و عەرەبی دزیوە، کتێبی ناو کتێبخانەکان کە زۆربەی سەرچاوەی فکری و زانستین.
ئەو هەمەجیە بێ کلتوورە نەخوێندەوارانە هیچ حاڵی نەبوون لێیان و دڕاندویانن و لە ناو ئۆفیسەکە بڵاویان کردۆتەوە. ئێمە هێزەکانی ئاسایش یەکێتی نیشتیمانی و ئاسایشی سلێمانی و دژە تیرۆر و هێزەکەی سکرتاریەت و ئاسایشی کەرکووک و لێژنەی ئەمنی شاری سلێمانی بە بەرپرسیار دەزانین. ئۆباڵی ئەم کارە فاشیستیە بەربەریە دەخەینە ئەستۆی ئەو هێزانە. لە چەند شوێنێکی ژوورەکەدالەسەر چەندین لاپەڕە نووسیوویانە (ئاسایشی کەرکووک لێرە واجب بوون). ئەم ددانپێدانانە ئاماژەیەکی گرنگە، ئەو هێزەی لە 16/10 لە کەرکووک هەڵات و لە 50٪ خاکی کوردستانی تەسلیمی حشدی شەعبی کرد، ئێستا دێت بۆ سلێمانی و پەلاماری دار و بەردو بینا و ئۆفیس و کاناڵی تەلەفیزیۆنی و ڕادیۆ دەدات، هەمەجیانە بینا داگیر دەکات خەڵکی مەدەنی دەگرێت و سوکایەتی بە هاونیشتیمانیانی دەڤەرەکە دەکات، ترس و تۆقاندن و سەتەم و جەور نواندن وەک خەڵاتی کوردایەتی بەسەر شار و شاروچەکاندا بڵاو دەکاتەوە<
ئەمە چییە ڕوو دەدات؟
فەیلەسوفی دیاری بواری فەلسەفی سیاسی تۆماس هۆبز لە کتێبە گرنگەکەیدا “لیڤایەسان” باسی حاڵەتی سروشتی دەکات، حەڵەتی سروشتی پێش پەیماننامەی کۆمەڵایەتی و دامەزراندنی جڤاتەکان، یا کۆمۆنوێلس، حاڵەت سروشتی، ئەو دەڵێت بریتییە لە هەلومەرجی جەنگی هەموان دژ بە هەموان، هەلومەرجێک کە تێیدا توندوتیژی، نائارامی، غیابی ئاسایش باڵا دەستە، ژیان تێیدا وەک ئەو دەڵیت” زۆر کورتە، ناشیرینەدڕندانەیە…” هەلومەرجێک لێپرسراوی نییە، کەس لە بەرانبەر هیچ شتێکدا بەرپرس نییە، واتە غیابی لێپرسراوێتی، غیابی دامەزراوەیەک بۆ لێپرسینەوە و سەپاندنی قانوون و نۆرم. بە ڕای هۆبز ئەم هەلومەرجە یا ئەم قۆناغە سروشتییە، مێژووی نییە بەو واتایەی لە قۆناغێکدا پێش مێژوو ڕووی دابێت، یا باو بووبێت، ناهەمیشەگەری ڕوودانی باڵادەستبوونەوەی لە ئارا دایە.
بە ڕای من ئەزموونی حکومڕانی شکستخواردووی کوردستانی عێراق بە بەردەوامی لەو هەلومەرجە نزیک دەبێتەوە کە هۆبز باسی لێوە دەکات و هەر لە شەڕی ناوخۆوە تاوکو پانۆرامای ترۆرەکان و نمایشکردنی زەبروزەنگ هێزە ئەمنییەکان و پۆلیس و چەکدارەکان، تاکو دروستکردنی هێز و سوپای مەرگ، دژە ترۆر کە هەر هەموو لە سەروو قانوون و نۆرمەکانەوەن، لە سەروو لێپرسینەوەن لە بەرانبەر هیچ دەستگایەکدا (Accountable) (بەرپرس) نین، وەک چۆن لە 60 ساڵی ڕابردوودا هێزە چەکدارەکانی کوردایەتی سەرقاڵی شەڕە پەیدەرپەییەکانی ناوخۆ بوون، ئەو چەکدارانەی لە مێژوویدا سەرقاڵی ترۆرکردنی ئازادیخوازان بوون ئەم هێزانەی کە لە سەروو قانوونەوە لە ساڵی 2017دا لە سەرەتای ڕووداوەکانی 17ی شوباتەوە کەناڵی NRT سووتاند و کەناڵ سووتاندنیا کرد بە نەریت دواجار پەلاماری خۆپیشاندەرانیان دا خەێمەکانیان سووتاند، مینبەرەکانیان خاپوور کرد، هاونیشتیمانیانی ئەم وڵاتەیان کوشت و بریندار کرد و زیندانی کرد لەو کاتەوە بە بەردەوامی سەرقاڵی بڵاوکردنەوەی ترس و تۆقاندن و ترۆرن لەم کۆمەڵگایەدا، تاکو ڕووداوەکانی ڕۆژانی 18/12 و ڕۆژانی دواتر. لە 19/12/2017دا پەلاماری ساختمانی چاڤی مۆڵ کۆنیان دا و داگیریان کرد، غارەیەکی گەورەیان کردۆتە سەر ئۆفیسەکان لەوانە ئۆفیسی ئەم نیوەندی لێکۆڵینەوەی زانستی ئێمە و تاڵانیان کردووە.
هەموو دەسەڵاتێکی ستەمکار، دەسەڵات یان سیستەمە دیکتاتۆرییەکان لە لایەکەوە زەوبروزەنگیان هەیە، ترۆر پەخش دەکەنەوە، بەڵام لە لایەکی دیکەوە هەندێ خزمەتگوزاری پێشکەش دەکەن، خزمەتگوزارییەکانی تایبەت بە دەوڵەتداری، حکومڕانی، لەوانە دابینکردنی پێداویستییەکان لە چەشنی ئاو و کارەبا و ڕێگاوبان و پەروەردە و تەندروستی و سەرپەرشتیکردنی سێکتەرەکانی پیشەسازی و بازرگانی کشتوکا:، لە هەمووی گرنگتر دابینکردنی جۆرێک لە “ئاسایش” واتە لە پاڵ بڵاو کدرنەوەی ترۆر و ستەمکاری، بەڵام هەوڵی دابینکردنی جۆرە ئاسایشێک دەدەن ئەگەر چی موزەییەفیش بێت، بەڵام کاتێک دەسەڵاتێک شکست دەخوات لە دابینکردنی ئەو خزمەتگوزارییانە و شکست دەخوات لە ئیدارەکرنی وڵات و خۆی دەبێتە مایەی تێکدانی ئاشتەوایی، خۆی دەبێتە تێکدەری ئاشتی کۆمەڵایەتی و ئاسایشی مرۆڤەکان خۆ دەبێتە فاکتەری بڵاوکردنەوەی ترۆر و زەبروزەنگ، خۆی دەبێتە بەرجەستەبووی جەور و ستەم و ترۆر و توندوتیژی، ئیدی لێرەوە دەبێتە مایەی گەڕانەوەی جڤات یا کۆمەڵگا بۆ ئەو قۆناغەی کە هۆبز بە قۆناغی سروشتی ناوزەدی دەکات، ئەو دەسەڵاتە نەک شکستخواردووە، بەڵکو تاکە فاکتەری پەخشکردنەوەی توندوتیژی و زەبروزەنگ و ترۆرە. دەسەڵاتی کوردی لە ئێستادا کوتوومت ئەو دەسڵاتەیە کە بەرجەستەبوونی ترۆر و توندوتیژییە، دژ بە ئاسایشی کۆمەڵایەتییە دژ بە کەرامەتی مرۆڤەکانە دژ بە ئازادی و دادپەروەرییە، هەڕەشەیەکی گەورەیە بۆ سەر ئاسایشی هاونیشتیمانیان، هەڕەشەیەکی گەورەیە بۆ سەر ئازادییەکانی تاک و ئازادییە مەدەنی و سیاسییەکانی جڤات،جگە لە ترۆر و زەبروزەنگ خاڵی خاڵییە لە گشت نرۆم و بەها و پڕەنسیپەکان، خاڵی خاڵییە لە ڕەوایەتی، چی ڕەوایەتی حکومڕانی و چی ڕەوایەتی سیاسی و قانوونی و ئەخلاقی ئەم دەسەڵاتە هیچ نییە جگە لە گەندەڵی و تۆپەڵیک توندوتیژی نواندن بەرانبەر تاکەکان و خودی جڤاتی کوردی، کە ئەمەش چرکە بە چرکە نزیکمان دەکاتەوە لە حاڵەتە سروشتییەی کە هۆبز باسی لێوە دەکات.
ئێمە لە غیابی دامودەزگا قانوونییەکاندا ژیان بەسەر دەبەین، قانوون بوونی نییە، حکومڕانی بەربنەمای قانوونی دارستانە بەهێز، بێهێز دەخوات، واتە غیابی لێپرسراوێتی، غیابی بەها و پڕەنسیپە سیاسی و نەدەنییەن، وڵات، جڤات، ژیانی تاکەکان، هەر هەموو هەڕەشەیان لەسەرە و بوونەتە ئامڕاز بۆ مانەوە و پاراستنی بەرژەوەندی چەند بنەماڵەیەک و چەند حیزبێک، کۆی هێزە چەکدارەکان بوونەتە ئامڕازی پاسەوانیکردنی ئەو حیزب و بنەماڵانە، چەند بنەمڵەیەک کە سڵ لە هیچ شتێک ناکەنەوە لە نواندنی ترۆر و پەخشکردنەوەی ترس و خەفەقان و ستەمکاری، سڵ لە تێکشکانی هیچ بەهایەی مرۆی و هیبەتی هیچ پڕەنسیپێکی گەردوونی، هیچ نۆرمێکی کۆمەڵایەتی و ئەخلاقی ناکەنەوە، دەسەڵاتەکە کەوتووە ئێستا لە پێناو مانەوەی خۆیاندا ئەم دەسەڵاتە کە بەرجەستەبووی توندوتیژییە کە بەرجەستەبووی کەوتنێکی گەورەی سیاسی و ئەخلاقییە، سەرقاڵی ئەوەن جڤاتەکەمان بەرەو هەڵدێریکی گەورە بەرن، کە بردوویانە، ئێمە لەسەر لیواری کەوتن نین، ئەوەی کۆمەڵگای ئێمە کەوتووە، ئێمە نەک خاوەنی حکومڕانییەکی شکستخواردووین (Failed State) بەڵکو ئێستای جڤات و کۆمەڵگای ئێمە لە سەرەتاکانی کەوتنێکی گەورە داین، بازنەی کەوتنەکە چرکە بە چرکە بەرفراوانتر دەبێت بە گوێرەی شیکردنەوەکانی من کوردایەتی، ئایدۆلۆژیای فەرمی بزوتنەوەی کوردی، کوردایەتی کە هیچ نییە جگە لە ناسیۆنالیزمی خێڵەکی و شاخاوی کە هیچ نییە جگە لە فاشیزم بە پلەی ئیمتیاز، ئەم فاشیزمە بەرپرسیارە لە م کەوتنە گەورانە، ئێمە ئەم غارە بەربەرییەی کراوەتە سەرمان وەک دیاری دەستی ئەم فاشیزمە، فاشیزمی کوردایەتی لێی دەڕوانین، پێنج حیزبی سەرەکی لە کوردستا ن بە بەرپرس دەزانین، ئەم دەسەڵاتە شکستخواردووە بە بەرپرس دەزانین و لە دواجاردا ئەمە دیاری خودی کوردایەتییە کە من 20 ساڵ بەر لە ئێستا لە بەرهەمێکی فیکری خۆمدا پێداگریم لەسەر کردووە کە کوردایەتی داڕزیووە، کوردایەتی زەردو زیانی گەورەی بۆ سەر ژیان هەیە لەو مێژووە و لە پێشتریشەوە وتوومە کە کوردایەتی لە ناو زەلکاوی فاشیزم و ستەمکاری و جەهل و ترۆردا مەلە دەکات لەسەر ئەو پیساییە دەژی و ئیدامە بە ژیانی دەدات، ئەو هێز و لایەن و بە ناو ڕۆشنبیر و ڕۆژنامەنووسانەی بێدەنگی هەڵدەبژێرن بەرانبەر ئەم بەربەریەتە، ئەم هەمەجیەتەی کوردایەتی بێ هیچ شک و گومانێک دەبنە بەشێک لەم هەمەجیەتە، لەم وحشیگەرێتییەی ناسیۆنالیزمی خێڵەکی کوردی دەبنە بەشێک لێی.
#فاروق ڕەفیق#
#29-12-2017#
_لیستی ئەو کەلوپەلانەی کە لە ئۆفیس براوە.
1، دوو کەیسی کۆمپیوتەر LENOVO 500gb.
2. یەک لاپتۆپ SONY vaio 250 gb.
3. دوو مۆبایلی جۆری NOKIA 6303 ڕەش.
4. دوو مۆبایلی جۆری NOKIA 1280 ڕەش
5. یەک مۆبایلی جۆرئ BlU 16 gb gold.
6. پرینتەری Canon LBP 60 30 ڕەنگی سپی
7. پرینتەری HP disk jet 1230 ملون.
8. کەلوپولی کارمەند، وەک.. شاحینەی مۆبایلی ئایفۆن 3 دانە، عەینەک 2 دانە، 2 هێدفۆن.BEATS بۆکسی ئایفۆن 8`،(کە لە ناویا ئۆرجیناڵی. بارکۆد، شەحن، هێدفۆن) یتێدایە.
9. بڵندگۆی کۆمپیوتەر 2 دانە.
10. کەلوپەلی کارگێڕی، وەک، قەڵەم، حبری پرینتەر. CD تەعریفەکان، چەند CD ئەرشیف. دەفتەری یاداشت.
11. دوو سیمکارتی ئاسیاسێڵ و فۆڕمەکانی.
12. ژمارەیەک کتێبی تایبەت.
ئەمە بێجگە لە شکاندن و سوتاندنی بەئەنقەستی زۆرێک لە کەلوپەلەکانی ئۆفیس،وەک قەنەفە و کورسی و کەلوپەلی کارگێڕی.