نووسینی: #محەمەد هەریری#
پێشەکی: پەیڕەو ئەنوەر
دیزاینی بەرگ: ئەبوبەکر مەلا
‏ چاپی ئەیلکترۆنی یەکەم: 2017

-مۆتەکە چییە، و مۆتەکەی تورکی بۆ کورد چییە!؟
مۆتەکەی تورکی بۆ کورد وەختە بڵێم هەر لە سەرەتای هاتنی بە لێشاوی ئەو هۆز و خێڵە ‏دڕندانەی تورک بۆ ناوچەکە دەست پێدەکات. هەردەم لەو ناوچەیە سەر ئێشە بوون بۆ ‏میللەتی کورد، لە پێش و لە پاشی ئیسلامبوونیشیان، کە دەکەوێتە پاش ئیسلامبوونی کورد، ‏چونکە ئیسلام بوونی تورک شتێکی ئەوتۆی لە ڕوحی دڕندانەی خێڵە تورکیەکانی ‏ناوەڕاستی ئاسیا و مەنگۆلیا کەم نەکردەوە!‏
مۆتەکە چییە؟ وبۆ ئەو پەیوەندییەی نێوان تورک و کورد بە مۆتەکە وەسف دەکەین؟!‏
مۆتەکەی کوردی و کەرابەسان ‏karabasan‏ ی تورکی، کابوسی عەرەبی و نایتمێری ‏Nightmare‏ ئینگلیزی، بە بێ چوونە ناو وردەکاری پێناسەی زانستی، بریتییە لە خەونی ‏خراپ و ناخۆش، کە خەم و نا ئومێدی و دڵەراوکێ وفشار و دڵتەنگی و جاڕسبوون و ‏ناڕەحەتی و ترس و تۆقانی دەروونی و جەستەییشی لێدەکەوێتەوە، دەنیشێتە سەر سینگی ‏خەوتوو وەک بڵێی بیخنکێنێ و لە بزواتن و جوڵە وپەل و پۆی دەخات!‏
کورد هەموو ئەو نیشانە و ئەعرازانە لە دەست تورک چێشتووە! باسی جاش وخۆفرۆش ‏ناکەم، هیچ کوردێکی دڵسۆز هەیە لە باکوور، ڕادەیەکی زۆریش لە تاکی هوشیاری ‏پارچەکانیتر، کە خەونی خراپ و ناخۆشی تورکی نەدیبێت، و خەم و نا ئومێدی و دڵەڕاوکێ ‏وفشار و دڵتەنگی و جاڕسبوون و ناڕەحەتی و ترس و تۆقانی دەروونی و جەستەییشی ‏نەچێشتبێت لە دەستی تورک؟! بێگومان نییە!‏
تورک لەوەتی هەن کابوس و مۆتەکەی کوردن! لەوەتی وەک چەند هۆز و خێڵی دڕندەی ‏بەربەری ڕوویان لەناوچەکە کردوە، بەبەردەوامی سەرچاوەیەکی سەرئێشە وپڕ ئازار و ‏ستەم بوون بۆ کورد!‏
هیچ کوردێکی خەباتگێڕ و خەمخۆری نەتەوەکەی هەیە، هەستی بە مۆتەکەی تورکی ‏نەکردبێت کە ڕۆژانە دەنیشێتە سەر سینگی، هەستی خنکاندنی پێ نە بەخشیبێت لەو مێژوو ‏و جوگرافیا نەفرەتیەی کە کۆی دەکاتەوە لەگەڵ ئەو گەلەی کە نایەوێت واز لەو سیفاتە ‏ناشارستانەی دێرینی جەنگیزخان و هۆلاکۆ بهێنێت؟!‏
ئەوە مۆتەکە نییە هێشتا گەلێک هەبێت لە جیهان، نەک هەر ڕقی لە ناوی کورد و کوردستان ‏بێت، بەڵکو ناڕەزایی دەربڕێت لە دەربڕینی وشەی کوردستان و توڕە بێت، و لە خاڵی ‏پشکنین و فڕۆکەخانە سزای هەڵگرانی ئەو ناوە بدات؟!‏
ئەوە مۆتەکە نییە هێشتا گەلیک مابێت لە جیهان، ڕێگا نەدات گەلێکی چل ملیۆنی بە زمانی ‏خۆی بخوێنێت، بە قەد تورکمانی نیو ملیۆنی کوردستان میدیا و مافی فەرهەنگی نەبێت!؟ ‏بۆیە کە سەرۆکی ژوری پارێزەرانی تورکیا لە دیاربەکر، تانەرک ئۆغلو ‏لە ئەردۆگانی ‏پرسی: ئێوە داوا لە وڵاتی گێرمەن (ئەڵمانیا) دەکەن مافی بە تورکی خوێندن بۆ ‏‏تورکەکانی ئەوێ زامن بکرێت، لە دەزگا ڕەسمیەکانی خوێندن، ئەی بۆ ئەو هەقە بە کورد ‏‏ڕەوا نابینیت؟...‏