کەمپینی پڕوپاگەندەی لایەنەکان بۆ خستنەڕووی بۆچوون و پێشنیاری خۆیان سەبارەت بە #ڕیفراندۆم# دەستی پێکردووە. بەڵام ئەو ماوە کەمەی کە بۆ پڕوپاگەندە بەدەستەوەماوە، بەرەچاوکردنی ئەوەی هێشتا خەڵکی کوردستان ئاشنایەتیەکی ئەوتۆیان لەگەڵ ئەلتەرناتیوی لایەنەکاندا نیە، گرفتێکەو پێویستی بە هەنگاوی جدی و بە پەلە هەیە بۆ چارەسەرکردنی.
لەم ڕوەوە، دابینکردنی ئیمکانیەتی یەکسان بۆ هەموو لایەنەکان (لایەنگر یان مخالفی ڕیفراندۆم، بە بەڵێ یان نەخێر) بۆ ئەوەی بتوانن ڕای خۆیان لە کەمپەینێکی چڕوپڕو هەمەلایەنەیەدا بە جەماوەری خەڵک بگەیەنن، یەکێک لەو هۆکارانەیە کە لانی کەم بەرپاکردنی ڕیفراندۆم لە کەشوهەوایەکی سیاسی ئازادو دوور لە هەر جۆرە ڕێگریەک دەستەبەر دەکات.
بەڵام نەک هەر ئەمە بە هیج جۆرێک دابین نەکراوە، بەڵکو تا ئێستا چەندین پێشێلکاری لەبەرگرتن بە ئازادی ڕادەربڕین و هێرش بۆسەر ئەوانەی کە بە پێچەوانەی ڕای دەسەلاتەوە هەڵویستیان گرتووە، ئەنجامدراوە. دیاردەی هەڕەشە و چاوسورکردنەوە و سیاسەتی تەخوین لە لابەلای ڕاگەیاندنەکانی لایەنە دەسەڵاتدارەکاندا، بەتایبەتی پارتی، خۆی دەنوێنێت.
لەگەڵ ئەوەدا حزبە دەسەڵاتدارەکان لە داهاتی کۆمەڵگا، هەموو ئامراز و هۆیەکانی ڕاگەیاندنیان بۆ خۆیان و لایەنەکانی دەوروبەریان فەراهەم کردووە، دیسان لەرێگای پێکهێنانی کۆمیتەی باڵای ڕیفراندۆمەوە کە پارتی تێێدا باڵادەستە، هەموو بڕیارەکان و پەیوەندیەکان و ئیمکاناتێک کە بۆ ڕیفراندۆم تەرخان کراوە، لەبابەتی بودجەو ڕاگەیاندن لەدەستی خۆیاندا قۆرخ کردوە.
حزبی کۆمۆنیستی کرێکاری وەکو لایەنێکی ئۆپۆزیسیۆنی دەسەڵات کە مێژوویەکی دریژی هەیە لە خەبات بۆ سەپاندنی مافی خەڵکی کوردستان لە بەرپاکردنی ڕیفراندۆم و ساڵەها لەسەر نەسەلماندنی ئەم مافەی خەلکی کوردستان لەگەل حزبە دەسەڵاتدارەکان کێشمەکێشی کردوە، لەگەڵ دەربرینی نارەزایەتی توندی خۆی لەم ڕەفتارانەی دەسەڵات، پاندبوونی خۆی لە بەرگری لە ڕیفراندۆمیکی واقعی دوور لە هەرجۆرە زەخت و زۆر و قۆرخکاریەک ڕادەگەیەنێ. بە پێچەوانەوە هەڵوێستی توندی دەبێت بەرامبەر بەگاڵتەجاڕکردنی ڕیفراندۆم. لەم بارەیەشەوە جاریکی دیکە ئەم خاڵانەی خوارەوە وەکو گرنگترین پرەنسیپەکانی بەرپاکردنی ڕیفراندۆم ڕادەگەیەنین:
1- ئازادی بێ قەید و بەندی هەڵسوڕانی هەموو حزب و قەوارەو لایەنێکی سیاسی و جەماوەری لە بارەی ڕیفراندۆم و ئایندەی کوردستانەوە بەدەر لەوەی کە لایەنگر یان ناکۆکن چ لەگەل ڕیفراندۆم و چ لەگەل جیابونەوەی کوردستان.
2- ئازادیی بەرپاکردنی کۆبونەوە و میتینگ دەربارەی ڕیفراندۆم بۆ هەموو هێز و لایەنە سیاسیەکان لە سەراسەری کوردستاندا.
3- دەستڕاگەیشتنی یەکسانی هەموو هێز و لایەنەکانی کوردستان بەدەرلەوەی هەڵویست و سیاسەتیان چیە لە بارەی ڕیفراندۆمەوە، بە میدیا و ئیمکانیاتی دەولەتی؛ ڕۆژنامە و تەلەفزیۆن و ڕادیۆ، هۆڵەکان و مەیدانەکانی کۆبونەوە، ڕەخساندنی پیداویستیەکانی ڕاگەیاندن بۆ هەموو لایەنەکان بۆ گەیاندنی ئەلتەرناتیو و پرۆگرامی خۆیان لە بارەی ڕیفراندۆم و ئایندەی کوردستانەوە.
4- تەرخانکردنی بودجەی پێویست و یەکسان بۆ هەموو حزب و لایەن و ڕێکخراوە سیاسی و جەماوەری و مەدەنیەکان کە پروپاگەندە و چالاکی بۆ ڕیفراندۆم دەکەن.
حزبی کۆمۆنیستی کرێکاری کوردستان حکومەتی هەرێم و حزبە دەسەڵاتدارەکان بەرپرسیار دەکات بۆ مسۆگەرکردنی ئەو هەلومەرجانە و ڕەخساندنی فەزایەکی ئازاد و گونجاو بۆ بەرپاکردنی ڕیفراندۆمێکی دور لە زەخت و زۆر و ڕێگری و پێشێلکاری، هەروەها دابینکردنی ئەمنیەتی هەموو چالاکیە سیاسیەکان و پێکهینانی دەرفەتی گونجاو بۆ ئەوەی خەڵکی کوردستان بە چاوێکی کراوە و ئازادانە بڕیار لەسەر چارەنوسی خۆیان بدەن.
پشتگوێخستنی ئەم مەرجانە و قۆرخکردنی هەموو بوار و ئیمکانیەت و ئامرازەکانی ڕاگەیاندن بۆ حزبەدەسەڵاتدارەکان و ڕێگری لەبەردەم لایەنەکانی دیکە، ڕیفراندۆم دەگۆڕێت بۆ نمایشی سەپاندنی ڕای دەسەڵات. حزبی کۆمۆنیستی کرێکاری کوردستان هەموو خەڵکی ئازادیخواز و لایەنە سیاسیەکان بانگەواز دەکات بۆ بەرپاکردنی ڕیفراندۆم لە کەشوهەوایەکی گونجاودا، لە پشتی چەسپاندنی ئەم خواست و پرەنسیپانە ڕاوەستن.
#حزبی کۆمۆنیستی کرێکاریی کوردستان#
13-09-2017