رێڤەبەرێ نەخۆشخانەیا هیڤی یا زارۆیان خویاکر کو ل سنۆرێ پارێزگەها #دهۆک# خویاکر کو؛ هەتا نوکە ل دهۆک ژبەر نەخۆشییا شێرپەنجەی 86 زارۆیان گیانێ خۆ ژدەست دایە و 110 نەخۆش هاتینە چارەکرن و نوکە ژی 110 نەخۆشێن دی لبن چارەسەریێنە و رۆژانە ژی زارۆیێن تووشبوویی ب ڤێ نەخۆشیێ دهێنە دیتن و پشتی دانانا سندۆقا هاریکاریێ بۆ زارۆیێن شێرپەنجەی ل دهۆک هەتا نوکە نێزیکی ئێک ملیار و 500 ملیۆن دینار بۆ زارۆیێن شێرپەنجی ل دهۆک هاتینە کۆمکرن و هاریکاری بەردەوامن و بەلێندەر، وەبەرهێنەر، سەرمایەدار و گشت وەلاتی ژی هاریکارن.
د. نزار بەکر رێڤەبەرێ نەخۆشخانەیا هیڤی یا زارۆیان بۆ دواڕۆژ رۆهنکر کو؛ بۆ ئاڤاکرنا نەخۆشخانەیا شێرپەنجەیا زارۆیان وەلاتییەکی 600 ملیۆن دینار تەرخان کرینە، کارگێرییا پارێزگەها دهۆک ژی 400 ملیۆن بۆ ئاڤاکرنا نەخۆشخانەیێ و 100 ملیۆن دینار ژی بۆ کرینا دەرمانێن تایبەت ب ڤێ نەخۆشیێ پێشکێش کرینە، د روونشتنەکا تایبەت دا چینەکێ وەلاتیێن دهۆک 27 هزار دۆلار پێشکێش کربوون، ل چەندین جهێن دی ژی 20 ملیۆن دینار و 50 هزار دۆلار هاتینە کۆمکرن بۆ نموونە ل مزگەفتا حەجی ئەحمەد پتری 9 ملیۆن و ل مزگەفتا جۆدی ژی پتری 6 ملیۆن دینار هاتبوونە کۆمکرن و چەندین هاریکاریێن دی ژی هاتینە کۆمکرن و دێ بەردەوام بن ب ڤی رەنگی پتری ئێک ملیار و 50000 ملیۆن دینار بۆ زارۆیێن شێرپەنجەی و ئاڤاکرنا نەخۆشخانەیا تایبەت ب شێرپەنجەیێ زارۆیان هاتینە کۆمکرن.
موسل قادر بەرپرسێ راگەهاندنا پارێزگەها دهۆک ژی بۆ دواڕۆژ خویاکربوو کو؛ ل کۆمبوونەکا بەلێندەر، بازرگان و وەبەرهێنەران دگەل پارێزگارێ دهۆک کو ل ڤێ مەهێ هاتبووکرن 100 ملیۆن دینار بۆ ڤێ سندۆقێ هاتبوونە کۆمکرن.
زیرەک دۆسکی سەرۆکێ ئێکەتییا بەلێندەرێن کوردستانێ تایێ دهۆک بۆ دواڕۆژ رۆهنکر کو؛ هەموو بەلێندەر دبەرهەڤن هاریکارییا ڤێ سندۆقا تایبەت ب زارۆیێن شێرپەنجەی ل دهۆک بکەن و ئەگەر چەکێن بەلێندەران وەربگرن دێ هاریکارییەکا مەزن پێشکێش کەن لێ ئەگەر پارەیێ کاش وەربگرن دێ هاریکاری کێمتر لێهێت و بۆ ڤێ چەندێ ژی کارگێرییا پارێزگەها دهۆک نڤیسارەکا فەرمی بۆ وەزارەتا دارایی هنارتییە کو رازی بیت ڤان چەکان بکەتە پارە و وەزارەتێ ژی ب شێوەیەکێ زارەکی رازی بوویە لێ ل هیڤییا رەزامەندییا فەرمینە بۆ هندێ دەست ب کۆمکرنا هاریکارییان بکەین و پێشتر ژی کۆژمەیەکێ هاریکاریێ ژلایێ بەلێندەران ڤە هاتییەدان.
د. نزار بەکر رێڤەبەرێ نەخۆشخانەیا هیڤی یا زارۆیان زەلالکر کو؛ بۆ ئاڤاکرنا نەخۆشخانەیا پەنجەشێرا زارۆیان یا پێشکەفتی کو پێدڤی ب 5 ملیۆن و 800 هزار یۆرویانە ئەوژی ب گۆرەی دیزاینا رێکخراوەکا ئیتالی کو بۆ ئاڤاهییەکا مۆدرێن هاتییە ئامادەکرن و پێشتر ژی سەنتەرێ پەنجەشێرا زارۆیان ل سالا 2007 ێ هاتییە دامەزراندن و تا 2013ێ حوکمەتا هەرێمێ هەموو پێدڤیێن ڤی سەنتەری دابین دکرن لێ پشتی قەیرانا دارایی و نەبوونا بودجەیێ کێماسی کەفتنە د سەنتەری و دەرمانێن وێ دا و نەخۆشترین سال بۆسەنتەری سالا 2016 و 2017 ێ ژبەر کو هەر نەخۆشەک بۆ چارەکرنێ و دابینکرنا دەرمانان پێدڤی ب زێدەتری 70 هزار دۆلارایە.
بەختیار ئەمین رێڤەبەرێ گشتیێ وەبەرهێنانێ ل سنۆرێ پارێزگەها دهۆک بۆ دواڕۆژ زەلالکر کو؛ داخواز ژ هەموو وەبەرهێنەران هاتییەکرن یێن کو مفایێن دراڤی ژ باژێڕێ دهۆک ب دەست وان کەفتییە وەکو ئەرکەکێ مرۆڤایەتی بەشداری ڤێ هەوا کۆمکرنا هاریکاریێ بۆ زارۆیێن شێرپەنجەی بکەن و هەموو رەزامەندی دەربرییە و دێ بزاڤێ کەین کو وەبەرهێنەرێن بیانی ژی هاریکاریێ بکەن چونکو د یاسا وەبەرهێنانێ دا چ جوداهی بۆ رێنومایێن کارکرنێ بۆ وەبەرهێنەرێن بیانی و ناڤخۆ دا نەهاتییەکرن.
مەلا جیهاد بێسفکی رێڤەبەرێ گشتیێ ئەوقاف و کاروبارێن ئایینی ل پارێزگەها دهۆک بۆ دواڕۆژ رۆهنکر کو؛ پێشتر ل دو مزگەفتێن ناڤ سەنتەرێ باژێڕێ دهۆک سندۆق هاتینە دانان و کۆژمەیەکێ باشێ پارەی هاتییە کۆمکرن و بۆ ڤێ هەفتیێ و رۆژا ئەینیێ دێ 5 سندۆق ل مزگەفتێن ناڤ سەنتەرێ باژێڕی هێنە دانان و 2 سندۆق ل زاخۆ و ئێک ژی ل ئاکرێ و دێ مەلایێن وان مزگەفتان لسەر مینبەری داخوازا هاریکاریێ بۆ ڤان زارۆیێن شێرپەنجەی کەن.
ل مالپەرێن جڤاکی و یێن تایبەت ب هەر دو مزگەفتێن سندۆق لێ هاتینە دانان ب ڤی رەنگی بەحسێ وی کۆژمەیێ هاتییە کرمکرن دکەن کو ل مزگەفتا حەجی ئەحمەد: 9 ملیۆن و 275 هزار دینار دگەل 2 هزار و 50 دۆلار و دگەل 500 یورویان و مزگەفتا جۆدی ژی 6 ملیۆن و370 هزار دینار دگەل 2 هزار و427 دۆلار و دگەل 222 دینارێ ئۆردنی و هەر ئەڤ سندۆقە ل دهۆک مۆل و فاملی مۆل ژی هاتینە دانان.
رێڤەبەرێ گشتیێ ئەوقاف و کاروبارێن ئایینی ل پارێزگەها دهۆک دیارکر کو؛ ژلایێ شەریعەتا ئیسلامێ و هەتا بەنی ئیسرائیلییان
و ب گۆرەی ئایەتا قورئانێ هەر کەسەکێ گیانەکی ژ مرنێ رزگار بکەت هەر وەک هەموو گیا نژ مرنێ رزگار کرینە و ب ڤێ چەندێ دیار دبیت کو هاریکاریکرنا ڤان زارۆیان بۆ هندێ ژ مرنێ قورتال ببن کارەکێ مەزنێ ئایینی و مرۆڤایەتییە و پێدڤییە هەمو کەسەک ب گۆرەی شیانێن خۆ وژدانا خۆ ئارم بکەت و هاریکارییا ڤان زارۆیان بکەت.
دوارۆژ
22-06-2017