کۆمیتەی ناوەندی حزبی شیوعی کوردستان،لە 27ی ئایاری 2017، کۆبونەوەی ئاسایی خۆی ئەنجامداو، سەرەتای کارەکانی بەساتێک وەستانی بێ دەنگ وەک ڕێزلێنان بۆ شەهیدانی گەلەکەمان و بزوتنەوەی ڕزگاریخوازی و پێشمەرگە کە گیانی خۆیان بۆ داکۆکی لە کوردستان و لەپێناو زامنکردنی ئاسایش و ئاشتی بۆ گەلەکەمان، بەختکرد، کۆبوونەوە دەستی بەکارەکانی کرد.
کۆبونەوەکە لە ئاست ئەو گۆڕانکارییە سیاسییانەی کە لە کوردستان و عێراق و ناوچەکەو جیهاندا دەگوزەرێ هەڵوەستەی کرد و، سەبارەت بە هەلومەرجی کوردستان ئاماژەی بە خراپبونی باریگوزەرانی ئابوری زەحمەتکێشان و خاوەن داهاتە سنوردارەکان و بەرفراوانبونی توێژە پەراوێزخراوەکان کرد لەئەنجامی پەیڕەوکردنی ئەو سیاسەتە ئابورییانەی دێت کە پشت بەپلان و ڕاچێتەی بانکی نێودەوڵەتی و پەسەندکردنی لیبڕاڵیەتی نوێ دەبەستێت ئەویش خۆی لە پیادەکردنی ڕێبازی بە تایبەتیکردن و زیادکردنی ڕسومات و بەردەوامی پاشەکەوتی زۆرە ملێ لە موچەی کارمەندانی دەوڵەت دا، دەبینێتەوە.
کۆبونەوەکە، هەڵوێستی خۆی لەڕەتکردنەوەی ئەو سیاسەتانە ڕونکردەوەو، داوای چاو خشاندنەوەی جیددی بەم سیاستە ئابورییە پەیڕەوکراوەی کرد کە قەیرانی ئابوری بەرهەم هێناوە و داوای کرد حکومەت دەست بەرداری ئەم ڕاچێتەیە بێت و کار بۆ گرتنەبەری سیاسەتێک بکات کە ئابوری بەرخۆری تێپەڕێنێ و زامنی گەشەپێدانی درێژ خایەن بکات و پێداویستییەکانی شەفافیەت و حوکمڕانی باش دامەزرێنێ و زامنی مافەکانی هاوڵاتیان لەکرێ و موچە بکات، هەروەها زامنی مافەکانی خانەنشینان و بەتایبەت جەماوەری خاوەن داهاتە سنوردارەکان بکات کە کەوتونەتە بازنەی هەژاری و نەدارییەوە.
سەبارەت بە بەردەوامی قەیرانی سیاسی کوردستانیش، کۆبونەوەکە ئاماژەی بە ڕیتمی خاوی گفتوگۆی سیاسی نێوان هێزە سیاسییە دەسەڵاتدارەکان کرد، بەتایبەتی لەو هەوڵانەی کە ئامانجیان چارەسەرکردنی قەیرانەکەیە. کۆبونەوەکە هۆکاری ئەمەی بۆ بیرکردنەوەی هێزە سیاسییەکان بە ئەقڵیەتی براوەو دۆڕاو لەچوارچێوەی بەرژەوەندی تەسکی حزبایەتی گەڕاندەوە لە بابەتێکدا کە پێویستی بە دیالۆگی جیدی و زاڵکردنی بەرژەوەندی گەلی کوردستانە بەسەر بەرژەوەندی حزبییەکان.
هەروەها کۆبونەوەکە ئاماژەی بەسەرجەم ئەو بەرنامە ودەستپێشخەری و نەخشە ڕێگایانەدا، کە حزبمان لە ماوەی ساڵانی ڕابردوودا بۆ سەرلەنوێ کاراکردنەوەی پەرلەمان و چارەسەرکردنی مەسەلەی سەرۆکایەتی و گرفتەکانی کێشەکانی حکومەت، ڕایگەیاندووە.
سەبارەت بە ڕاپرسی دەربارەی چارەنوسی کوردستان، کۆبونەوەکە ئاماژەی بەگرنگی ئەو پێشنیارانەدا کە حزب لە (22) ی نیسانی ئەمساڵدا خستویەتە بەردەم حزبە کوردستانییەکان و ڕای گشتی، سەبارەت بەمیکانیزمی کارکردن لە پێناو ئەنجامدانی ڕاپرسییەکی سەرکەوتوو، لەڕێگەی جەختکردنەوە لەو خاڵانەی کە لە میکانیزمەدا هاتووە لەو ڕوانگەیەی، کە ڕیفراندۆم پرۆسەیەکی تێکۆشانی کۆمەڵایەتییە و دەکەوێتە ژێر کاریگەری کۆی دۆسییەکانی قەیرانی سیاسی لە کوردستاندا لەڕوانگەی پەیوەندییان بەیەکەوە و ئاڵوگۆڕی کاریگەرییان لەیەکتر و پەیوەندی دیالێکتی نێوانیان‌و، لەمیانەی دیتنی کۆی دۆسێکان وەک ئەرکێکی تێکۆشان و ناکرێت هیچیان دوابخرێن، بۆئەوە پێویستە کاری جدی بکرێت لە پێناو بەدەستهێنانی بەرفراوانترین سازانی نیشتیمانی بۆسەرکەوتنی ڕیفراندۆم بە ئاڕاستەی یەک گوتاری نیشتمانی بۆ ڕای گشتی جیهانی، بە لەبەرچاوگرتنی ئەوەی کوردستان دورگەیەکی دابڕاو نییە لە جیهان و دەکەوێتە ژێر کاریگەری گۆڕانکاری و پێشهاتە هەرێمایەتی ونێودەوڵەتییەکان.
کۆبونەوەکە لەو قەناعەتەدایە کە سەرخستنی ڕاپرسی پێویستی بە زامنکردنی مافەکانی سەرجەم نەتەوەکانی تورکمان و کلدان ئاشوری سریان و عەرەب هەیە لەو ناوچانەی کە ماددەی (140) لەدەستوری عێراق دەیانگرێتەوەو لەگەڵ ئەوەش دایە کە ڕیفراندۆم ئەو و ناوچانەش بگرێتەوە.
سەبارەت بە چارەنوسی دەشتی نەینەواو شنگال کۆبونەوەکە ئاماژەی بە پێویستی وەرگرتنی ڕاو ئیرادەی دانیشتوانی ئەو ناوچانە لە ئێزدی و مەسیحی و شەبەک و سەرجەم پێکهاتەکان لە دیاریکردنی چارەنوسی ئەو ناوچانە و چۆنێتی بەڕێوەبردنی کردەوە. هەروەها کۆبونەوەکە ئاماژەی بەبژاردەی شیوعییەکانی کوردستان کردەوە، کە خۆی لەپێکهێنانی دەوڵەتێکی نیشتیمانی سەربەخۆ لە باشوری کوردستان، دەبینێتەوە، لەسەر بنەمای هاوڵاتیبوون و کەلەڕێگەی دەستورێکی دیموکراتی مەدەنی عەلمانییەوە زامن بکرێت، لەبەرچاوگرتنی ئەوەی کە ڕاپرسی بریتییە لە ڕاسپاردنێک لەلایەن گەلەوە کەدواجار تەنها بەواتای کارکردن دێت، بەپێی نەخشەرێگایەکی ئاشکرا لە دوای ڕاپرسییەکە لەپێناو بەدیهێنانی ئیرادەی گەل و خواستەکانی بەبەدەستهێنانی سەربەخۆیی و مامەڵە نەکردن لەگەڵ ئەم ئیرادەیە وەک کارتێکی سیاسی.
کۆبونەوەکە، خاڵی سەرنجی خستە سەرگرنگی ڕوونی و شەفافیەت لەڕەوایی ئەو گوتارەی کە بانگەشە بۆ بەجێ گەیاندنی ڕیفراندۆم دەکات کە تەنها مەبەستی کاردانەوە نییە بەرامبەر ئەو سیاسەتانەی کە لەلایەن حکومەتە یەک لەدوای یەکەکانی بەغداوە، پیادە دەکرێت، بگرە ئەم ڕەوای بوونە لەمیانەی جەختکردنەوە دێت لەسەر مافی گەلی کوردستان لەدیاریکردنی چارەنوسی خۆی، هاوشێوەی سەرجەم گەلانی دیکە.
کۆبونەوەی کۆمیتەی ناوەندی جەختی لەسەر پێویستی ئەنجامدانی هەڵبژاردنی پەرلەمانی کوردستانی ساڵی (2017) لە کاتی دیاریکراوی خۆیدا کردەوەو دوانەخستنی لەژێر هیچ بڕو بیانویەکدا.
سەبارەت بە ڕەوشی عێراق، کۆبونەوەکە ئاماژەی بەبەردەوامی قەیرانی بونیادی دەوڵەت کرد کە لەتوانادا نییە چارەسەر بکرێت تەنها لەڕێگەی دیالۆگی جیددی سەرجەم باڵە سیاسییەکان لە عێراق و پەراوێز نەخستنی هیچ پێکهاتەیەک و دانانی بنەماکانی بەرنامەی داڕێژراو بۆ دیالۆگ لەسەر بنەمای ڕەتکردنەوەی توندو تیژی و قبوڵکردنی ئەوی دیکەو ڕێزگرتن لە مافی چارەنوسی گەلی کوردستانی و ئیرادەی ئازادانەی سەرجەم پێکهاتەکان لە عێراق. کۆبونەوەکە دەستخۆشی لە تێکۆشانە بەردەوامەکانی ڕەوتی دیموکراتی مەدەنی لە عێراق و چالاکی بەرچاوی حزبی شیوعی عێراق لەسەرجەم بوارەکاندا،کرد، و ئاماژەی بە گرنگی بەردەوامی هەماهەنگی نێوان حکومەتی هەرێم و حکومەتی عێراق، سەبارەت بە ڕوبەڕووبونەوەی تیرۆر لەبوارەکانی سەربازی و ئەمنی و لەبواری تەواوکردنی ئازادکردنی سەرجەم ناوچەکان، کردەوە.
سەبارەت بە ڕەوشی هەرێمایەتی، کۆبونەوەکە ئاماژەی بەم (سێ) کۆنگرە و کۆبونەوەیەدا کە لەسعودیە ئەنجامدرا، بەئامادەبوونی ووڵاتەیەکگرتووەکانی ئەمەریکاو وڵاتانی کەنداو و هەندێ وڵاتانی ئیسلامی کە ئاراستەی کارکردن بۆ پێکهێنانی قەوارەیەکی نوێ بەناوی هاوپەیمانی ڕۆژهەڵاتی ناوەڕاستی ستراتیژی بۆ بەدیهێنانی ئاشتی و ئاسایش لەناوچەکەو کەلە (34) هەزار سەرباز پێکبێت چڕکرابویەوە و، هاوکات ئەنجامدانی ڕێکەوتنێکی هاوبەشی (سعودی – ئەمەریکی) بەبڕی (110) ملیار دۆلار لە یەکساڵدا جگە لە سەدان ملیار بۆ ساڵانی داهاتوو، بۆ چەسپاندنی ئاسایشی سعودیە لەبواری هێزەکانی ئاسمانی و دەریای و ئاسایشی سنور و چاودێریکردنی پەیوەندییەکان و چاودێریکردنی توندڕەوەکان لەسەر ئەنتەرنێت.
کۆبونەوەکە پێی وایە کە وەدیهێنانی ئاسایش و ئاشتی لە ناوچەی ڕۆژهەڵاتی ناوەڕاست لەگەڵ بەردەوامبونی قەیرانی بونیادگەری دەوڵەت لە هەریەک عێراق و سوریا و یەمەن و هەروەها لیبیا لە باکوری ئەفریقا بەردەوامە و، ئەو پرسیارە دەوروژێنێت سەبارەت بەوەی تاچ ئاستێک بونیاتنانی دەوڵەتی نیشتیمانی پاش جەنگی جیهانی یەکەم لە ناوچەکە سەرکەوتنی بەدەست هێناوە؟، بەمەش ئاشتی و ئاسایش بە پێکهێنانی قەوارەی ئەمنی و سەربازی نوێ لە ناوچەکەدا نایێت، کە بەدەست جەمسەرگیری هەرێمایەتی دەناڵێنێ و کەخۆی لە تایفەگەری سوننەگەری/شیعەگەری دەبینێتەوە و ئەویش لە هەردووجەمسەری سعودی- ئێرانی خۆی بەرجەستە دەکات.
بە هەمان شێوە ئاشتی و ئاسایش بە سازانی جەمسەرگیری یە تائیفییەکان بەدی نایەت، بەڵکو لە ڕێگەی سازانی نیشتیمانی ناوخۆیی لەڕوبەڕووبونەوەی تیرۆر، چونکە تیرۆر تەنها مەسەلەیەکی ئەمنی و سەربازی نییەو هاوکاری هەرێمایەتی و نێو دەوڵەتی بۆچارەسەرکردنی کێشە و قەیرانە نێوخۆییەکان لەسەرجەم وڵاتانی ڕۆژهەڵاتی ناوەڕاست و پێدانی مافی ئازادی بەگەلان لە دیاریکردنی چارەنوسی خۆیان زامنی دامەزراندنی پەیوەندیەک دەکات کەلەسەر بنەمای ئاشتی و ئاسایش و بەدیهێنانی گەشەپێدان و هاوکاری نێو دەوڵەتی بونیات نرابێت.
هەروەها کۆبونەوەکە ئاماژەیدا بەو هێرشە یەک لەدوای یەکانەدا دژ بە مەسیحییەکان لە ناوچەکەداو سەرکۆنەی ئەو هێرشە تیرۆرستییەی کرد کە دژی کەنیسە و دێرەکانی میسر ئەنجامدران و بووە هۆی کوژرانی کرستیانە مەدەنییەکان‌و، کۆبونەوەکە ئەم هێرشە تیرۆرستییەی بەبەشێک لە و زنجیرە هێرشانە لە قەڵەمدا کە ئامانجی کۆتایهێنانە بەبوونی کرستییانەکان لەڕۆژهەڵاتی ناوەڕاست و میسر.
کۆبونەوەی کۆمیتەی ناوەندی ناڕەزایی خۆی دەربری سەبارەت بە دەستێوەردانی وڵاتە هەرێمایەتییەکان لە کاروباری ناوخۆیی هەرێمی کوردستان و سەرکۆنەی بۆردومانکردنی تورکیای بۆ خاکی کوردستانی عێراق کردو داوای ڕاگرتنی توندوتیژی دژ بە خەڵکانی سیڤلی باکور وئازادکردنی بەندکراوەکانی کرد و هەروەها داوای دەستپێکردنەوەی دانوستانی لە نێوان حکومەتی تورکیا و بزوتنەوەی ڕزگاریخوازی گەلەکەمان لە باکور کرد بە مەبەستی چارەسەرکردنی گرفتەکان بە شێوەیەکی ئاشتی ودیموکراتییانە. هەروەها کۆبونەوەکە هیوا دەربری کە بردنەوەی ڕیفۆرمخوازەکان لە ئێران هاندانێک بێت بۆ دەستپێکردنی چارەسەری مەسەلەی کورد لە ڕۆژهەڵات بە شێوەیەکی دیموکراسی وئاشتی عادیلانە بە جۆرێک ئازادییە گشتییەکان ومافی گەلی کوردستان دەستەبەربکات، هاوکات کۆبوونەوەی کۆمیتەی ناوەندی ڕەوشی ڕۆژئاوای بەهەند وەرگرت کەقەوارەیەکی ئازادیان پێکهێناوەو بۆسەرخستنی پرۆسەکە پێویستە دەست بەدیموکراتیەت بگرن و بەشداریپێکردنی هەموو لایەنەکان مسۆگەر بکەن و ئەو پشتگیریە سەربازیە نێودەوڵەتییەی بەدەستیانهێناوە بتوانن بیگۆڕن بۆ پشتگیرییەکی سیاسی لەپێناو بەدەستهێنانی مافە نیشتمانی و دیموکراسیەکان لەرۆژئاواشدا، لەو بارودۆخەشدا، کۆمیتەی ناوەندی حزبی شیوعی کوردستان داوا دەکات کە لەتێکۆشانی نیشتمانیدا، هەموو لایەک لەسەربنەمای ڕێزگرتن لەهەلومەرج و تایبەتەمەندی هەر پارچەیەک هەماهەنگی و پەیوەندی ببەستن.
سەبارەت بەڕەوشی جیهانیش، کۆبونەوەکە ئاماژەی بەو مەترسییە گەورانەدا بە هۆی سیاسەتەکانی ترەمپ لەسەر ئاستی ناوچەکە و لە ئاستی جیهانیدا، کە خۆی لە گۆشەگیری نەتەوەیی و دژایەتی جیهانگیری و مامەڵە کردن بەپێ ئەقڵیەتی ڕێکەوتنە بازرگانییەکاندا لەو مەسەلانەی کە پەیوەستە بە ئاسایشی جیهان و گەشەپێدان و ژینگە، دەبینێتەوە. ئەمەش زەمینەی گونجاو دەڕەخسێنێ بۆ هەڵکشانی چالاکی ڕاست ڕەو و نازییە نوێ یەکان لەئەوروپا و ڕوپۆشێک دابین دەکات بۆ پڕۆژەکانی ئیسلامی سیاسی و توندڕەوی و تیرۆر لە ناوچەی ڕۆژهەڵاتی ناوەڕاستدا.
لەم بوارەشدا کۆبونەوەکە ئاماژەی بە پێویست بوونی هاریکاری و هاوپەیمانی هێزە دیموکراتی و چەپەکان لە ئاستی جیهاندا بۆ وەستان بەڕووی ئەم سیاسەتانەی کە هەڕەشە لە ئاسایشی جیهان دەکەن، دا.
هەروەها کۆبونەوەکە تاوتوێی چەندین ڕاپۆرتی کرد کە لەلایەن تایبەتمەندە حزبییەکانەوە ئامادەکرابوو، سەبارەت بە چالاکی حزب لە بوارە جیاجیاکاندا و جەختیکردوە لەسەر گرنگی بەردەوامیدان بە چالاکییە جەماوەرییەکان و داکۆکیکردن لە داواکارییەکانی گەل، بەتایبەتی خەڵکانی کەمدەرامەت وخانەنشینان و کاراکردنی کاری حزبی لەسەرجەم بوارەکاندا بۆ جێبەجێ کردنی تێڕوانینی حزب و سیاسەتی متمانە پێدراو لە کۆنگرەی شەشەمی حزبی شیوعی کوردستان.
کۆمیتەی ناوەندی
حزبی شیوعی کوردستان
27-05-2017