قارەمانێکی ون، مەلا ناسیح تۆماری سەربازێکی ونی ڕێبازی کوردایەتی و نیشتمانپەروەری خوالێخۆشبوو (ناسیح مەجید فەقێ ئۆمەر) ە، ناسراو بە (مەلا ناسیح تۆماری) ساڵی (1942) لە گوندی (تۆمار) ی شارەدێی (شوان) ی پارێزگای #کەرکووک# لە خانەوادەیەکی زەحمەتکێشی کورد هاتووەتە ژیانەوە.
لە منداڵییەوە لە گوندەکەی خۆی خراوەتە بەر خوێندنی ئایینی، لە تەمەنی لاوی پەیوەندی دەکات بە باڵی مەکتەبی سیاسی #پارتی دیموکراتی کوردستان# دەبێتە کادیرێکی دیاری شۆڕشی ئەیلوول و دۆستێکی نزیکی خانەوادەی #مام جەلال#، تا نسکۆی شۆڕشی ئەیلوول درێژە بە خەبات دەدات.
ساڵی 1975لە ڕێگەی عەلی بچکۆل-ەوە پەیوەندی بە (کۆمەڵەی مارکسی لینینی کوردستان) ەوە دەکات، کاری ڕێکخراوەیی و مەلایەتی لە گوندی تۆمار بە یەکەوە گرێ دەدات لەنێوان ساڵانی (1978-1979) ، ساڵی 1983لە شارۆچکەی (#تەقتەق#) نیشتەجێ دەبێت و بە پیشە و ناونیشانی (یاریدەدەری میکانیک) لە فەرمانگەی ئاوی تەقتەق دادەمەزرێت، بەردەوام دەبێت لە کاری ڕێکخستن و هاوکارییەکی زۆری شانەی (گۆرقەرەج) ی کەرتی ڕێکخستنی دەشتی #هەولێر# دەکات لە تەقتەق، پاش ماوەیەک پەیوەندی لەگەڵ ئەڵقە ڕۆشنبیرییەکەی (بەرەی ڕزگاری زەحمەتکێشان-بەرزە) ی ناو هەناوی (کۆمەڵەی مارکسی لینینی کوردستان) لە ڕێگەی (خالید عوبێد تۆماری) یەوە گرێ دەدات و لە کۆبوونەوە فراوانەکەی (بەرزە) لە ڕۆژانی (21-22-23ی حوزەیرانی 1984) ی گوندی ئیلنجاغی گەورەی شارەدێی تەقتەقی وراتی #کۆیە# بەشداری دەکات و هاوشانی خالید عوبێد تۆماری ڕۆڵی دەبێت لە بەدیکۆمێنت کردنی بەڵگەنامەکانی بەرزە لە گوندی تۆماری شوان، بەداخەوە هەموو بەڵگەکان لە ئەنفالەکاندا لەناوچوون.
ئەم کادیرە تێکۆشەرە بەهۆی نەخۆشییەوە لە #29-3-1993# بۆ دواجار دڵە گەورەکەی لە لێدان دەکەوێت و لە گۆڕستانی (دارەتوو) بە خاک سپێرراوە، دوای کۆچی مەلا ناسیح تۆماری (مام جەلال) لە ڕێگەی (سیروانی کوێخا نەجم) ەوە داوای بینینی خانەوادەکەی کردبوو، بەڵام بە نەخۆش کەوتنی مام جەلال، مەلا ناسیح-یش دەبێتە سەربازێکی گومناوی کوردستان، دروود بۆ گیانی ئەو تێکۆشەرەی کورد.[1]