بەناوی خودای گەورە و میهرەبان
ئەنجامدانی چاکسازی و جێبەجیکردنی بنەماکانی حوکمڕانیی باش لە هەرێمی کوردستان پێداویستییەکی بەردەوامە و لەهەمانکاتدا ئەرکێکی نیشتمانی پیرۆزه ‌و پێویستە دامەزراوەکانی هەرێم دوور لە بەرژەوەندیی کەسی و سیاسی و حزبی، وەک پڕۆسەیەکی نیشتمانیی گشتگیر لێی بڕوانن.
لێرە دەمەوێ دەستخۆشی و پشتیوانیی خۆم بۆ پلانی ڕیفۆرمی حکوومەتی هەرێمی کوردستان و بانکی نێودەوڵەتی ڕابگەیەنم کە بە هاوکاری و پشتگیریی نەتەوە یەکگرتووەکان و دەزگا پەیوەندارەکانی، وەزارەتی پلاندانی حکومەتی هەرێمی کوردستان و ڕێکخراو و دامەزراوە تایبەتمەندە بیانی و ناوخۆییەکان ئامادە کراوه، و لە مەراسیمێکدا لە 30-05-2016 وەک نەخشە ڕێگایەک ڕاگەیەنرا.
سوپاس و پێزانینیشمان هەیە بۆ بانکی نێودەوڵەتی و دەزگاکانی نەتەوە یەکگرتووەکان و هەموو لایەنێکی دیکەی پەیوەندیدار کە هاوکار و پشتیوان بوون بۆ داڕشتنی ئەم پلانە. پێداچوونەوه و چاکسازی‌ لە هەیکەلیەتی کارگێری و دارایی وەزارەت و دامەزراوەکانی حکوومەت وەک یەکێک لە ئامانجەکانی ئەو بەرنامە چاکسازیەی کە لە 10ی شوباتی ئەمساڵ ڕامانگەیاند، زۆر بە باشی لە پلانی ڕیفۆرمی حکوومەتی هەریمی کوردستان بە چاودێریی بانکی نێودەوڵەتی جێگەی کراوەتەوە.
ئەمە جگە لە گرنگیدان بە کەرتی تایبەت و سیستەمی بانکی و پشتنەبەستن تەنها بە داهاتی نەوتی و ڕەخساندنی هەلی کار و کەمکردنەوەی باری قورسی سەرشانی خەڵکی هەژاری کوردستان ئامانجی گەوره ‌و پیرۆزن کە لە چوارچێوەی پلانی ڕیفۆرمی حکوومەتی هەرێم ئاماژەیان پێدراوە. ئەوەی زیاتر بە لای ئێمەوە گرنگە جێبەجێکردنی پلانەکەیە، بۆ ئەم مەبەستە‌ش هەموو پشتیوانیی خۆمان بۆ‌ سەرخستنی پڕۆسەکە خستۆتەگەڕ و بە ئیرادەیەکی جدیش بەردەوامی پێدەدەین و پێویستە لەسەر هەموو دامەزراوەکانی حکوومەتی هەرێمی کوردستان بە وردی ئەو نەخشەڕێیە جێبەجێ بکەن و هەموو لایەنە سیاسیەکان و ڕێکخراوەکانی کۆمەڵی مەدەنی و میدیاکان پشتیوان و چاودێر بن بۆ ئەو نەخشەڕێیە، لە هەمانکاتدا پێویستە حکوومەتیش قۆناغ بە قۆناغی ئەنجامی پلانەکە بۆ ڕای گشتی بڵاو بکاتەوە.
‌ لە ماوەی ‌ڕابردوو زنجیرەیەک کۆبوونەوەمان لەگەڵ ئەنجوومەنی دادوەری و دەستەی نەزاهه ‌و داواکاری گشتی و دیوانی چاودێری دارایی ئەنجام داون و هەموو پشتیوانیەکمان پێڕاگەیاندوون بۆ ئەوەی پڕۆسەکە سەرکەوتوو بێت و بە ئامانج بگات. ئەم دامەزراوانەی هەرێمی کوردستان بە پێی یاسا بەرکارەکان بەرپرسی یەکەمن لە جێبەجێکردنی حوکمی یاسا و لەڕووی ئیرادەی سیاسی و پشتیوانیەوە بۆمان دووپات کردوونەتەوە، کە لە لای ئیمەوە ئیرادە و پشتیوانییەکی بەهیز هەیە بۆ باشتر بەڕێوەچوونی کارەکانیان و نەهێشتنی ڕێگریەکانی بەردەمیان.
لە ماوەی سێ مانگی ڕابردوو لە چوارچێوەی ڕاگەیاندنی بەرنامەی چاکسازی و ڕووبەڕووبوونەوەی گەندەڵی 93 دۆسیە پێشکەش بە دەستەی نەزاهه ‌و داواکاری گشتی کراون و ئێستا ئەم دامەزراوانە کار لە سەر فایلەکان دەکەن و پڕۆسەی لێکۆڵینەوە و ئیجرائات دەستی پێکردوه ‌و بەشێک لەو دۆسیانە ئیحالەی دادگا کراون.
حکوومەتی هەرێم لە چوارچێوەی پڕۆسەی چاکسازی و شەفافیەت و کەمکردنەوەی خەرجی و زیادکردنی داهات لەماوەی ڕابردوو نزیکەی 40 بڕیاری دەرکردوه، بەشێکی زۆری ئەم بڕیارانە تایبەتن بە شەفافیەت و ڕێکخستنەوەی کەرتی نەوت، بۆیە بەلامانەوە گرنگە خەڵکی کوردستان ئەنجامی بڕیارەکان ببینێت و چاکسازی بنەڕەتی لە وەزارەتی سامانە سروشتییەکان ئەنجام بدرێت. لە ڕێکەوتی 17-04-2016 بڕیاری هەرێمی ژمارە(4)ـمان دەرکردووە کە سەرجەم دامودەزگای هەرێم دەرگاکانیان بۆ دیوانی چاودێری دارایی هەرێم بکەنەوه ‌و زانیاری و داتای پێویستیان بخەنە بەردەست لە ناویشیان ئەوەی پەیوەستە بەداهاتەکانی نەوت و شەفافیەت لەم سێکتەرە گرنگە.
لە سەر ئاستی وەزارەتی پێشمەرگە لیژنەیەکی تایبەتمەند بە بڕیاری هەرێمیی ژمارە(5) لە ڕێکەوتی 21-04-2016 بە سەرپەرشتی سەرۆکی دیوانی سەرۆکایەتی هەرێم پێکهاتووه ‌و بەهەماهەنگی لەگەڵ وەزارەتی پێشمەرگە و سەرۆکایەتی ئەنجوومەنی وەزیران، دەست کراوە بە چاکسازی لەم وەزارەته ‌و هەنگاوەکانیش بەردەوامن. سەبارەت بە زێدەرۆیی بۆ سەر زەوی و زاری میری دیسان لە ڕێکەوتی 09-05-2016 بە بڕیاری هەرێمیی ژمارە(8) لیژنەیەک بەسەرپەرشتیی ڕاوێژکاری یاسایی سەرۆکایەتی هەرێم پێک هاتووەو دەست کراوە بە ئیجرائات و، هەنگاوی باش لەم ڕووەوە نراوە.
لە سەر دۆسیەی دەرمان و وەبەرهێنان و نەوت و بانکەکان ڕێوشوێنی پێویست دیاریکراون بۆ چاکسازی و ڕووبەڕووبوونەوەی گەندەڵی لەم سێکتەرە گرنگانە، کە لە ئایندەیەکی نزیک خەڵکی کوردستان ئەنجامەکانی دەبینێت.
ئەوەی ماوەتەوە ئاماژەی پێبدەین ئەوەیە کە پێویستە ڕووبەڕووبوونەوەی گەندەڵی سەرتاسەری بێت و هیچ جوگرافیایەکی دیاریکراوی نەبێت و هەموو دەسته ‌و دامەزراوەکانی هەرێم بگرێتەوە. هەروەها بە هیچ شێوەیەک نابێت پڕۆسەی چاکسازی تێکەڵ بە ململانێی سیاسی بکرێت و دەبێ هەموو لایەک دوور لە بەرژەوەندی حزبی لەم بابەتە بڕوانن.
جارێکی دیکە دڵنیایی دەدەینەوە خەڵکی کوردستان کە هیچ کەسێک لەم پڕۆسەیە پارێزبەندی نیه ‌و هەموو سێکتەر و دامەزراوەکان دەگرێتەوە و هیچ بەربەستێکیش نابێت ڕێگر بێت لەبەردەم دامەزراوەکانی وڵات بۆ جێبەجێکردنی بەرنامە و پلانەکانی ڕیفۆرم و ڕووبەڕووبوونەوەی گەندەڵی. ئەم هەنگاوانە پڕۆسەی بەردەوامن و پیویستی بە پشوودریژی و هەماهەنگیی هەموو لایەکە.
مەسعود بارزانی
09-06-2016