قەڵای دمدم لە سەردەمی دەسەڵاتداریەتیی شا عەباسی سەفەویدا بەپێی بڕیاری خانی لەب زێڕین سەرلەنوێ درووست کرایەوە و لە درێژەی ئاڵۆزی و ململانێکانی نێوان ئەمیری برادۆست و شاعەباسدا سەرەڕای کوژرانی هەزاران کەس لە لایەن سوپای شا عەباسەوە دەستی بەسەردا گیرایەوە.
قەڵای دمدم بە مەودای (15) کیلۆمیتر دوور لە شاری #ورمێ# و لەسەر تەپۆڵکەیەک لە دۆڵی #قاسملوو# هەڵکەوتووە و مێژووی درووستکردنی ئەو قەڵایە دەگەڕێتەوە بۆ پێش هاتنی ئیسلام.
چیرۆکی خۆڕاگریی قەڵای دمدم لەنێو هۆنراوەی شاعیران، بەیت بێژ و حەیرانبێژاندا ڕەنگی داوەتەو و بووەتە هەوێنی هۆنراوەی شاعیرە بە ناوبانگەکانی وەک ئەحمەدی خانی و جگەر خوێن و بە چەندین هۆنراوەیان لەمەڕ حەماسەت، خٶراگریی و قارەمانییەتیی خانی لەب زێڕین هۆنیوەتەوە و بەیتی قەڵای دمدم بە درێژترین بەیتی کوردی دادەنرێت.
هەتا ئێستا 2 ڕۆمان لە لایەن 2 ڕۆمان نووسی کورد عەرەب شەمۆ و جان دۆست لەمەڕ ڕووداوی قەڵای دمدم و خۆڕاگریی خانی لەب زێرین نووسراوە و لەو 2 ڕۆمانەدا بەگشتی باس لە نەهامەتی و کوشتاری خەڵکی کورد بەدەستی سوپای شا عەباس کراوە. [1]