مەسرور بارزانی ڕاوێژکاری ئاسایشی هەرێمی کوردستان ڕایگەیاند، دوایین ئامار لەسەر ئاوارە و پەنابەران، ئاماژە بەبوونی زیاتر لە دوو ملیۆن و پێنج سەد هەزار عیراقی و سوری دەکەن لە هەرێم، ئەوەشی خستەڕوو، هەرێم وێڕای جەنگی داعش و نەبوونی موچە، مامەڵە لەگەڵ دۆسێی ئاوارە و پەنابەرانیشدا دەکات.
مەسرور بارزانی لە ئەکاونتی خۆی لەسەر تۆڕی کۆمەڵایەتی (تویتەر) نوسیویەتی: "هەرێمی کوردستان لە ئێستادا میوانداریی دوو ملیۆن و 910 هەزار ئاوارەی کردووە، ئەو ژمارەیەش فشاری گەورە لەسەر هاوڵاتیانی هەرێم دروست دەکات، لەگەڵ ئەوەشدا شەڕی داعش و نەبوونی بودجە، بارگرانییەکی تری سەر شانی هەرێمە".
بە وتەی ڕاوێژکاری ئاسایشی هەرێمی کوردستان، ئەو پەنابەرانە هەڕەشە لەسەر ئاسایشی هەرێم دروست دەکەن، بۆیە دەزگا ئەمنییەکانی هەرێم ئەو پەڕی هەوڵی خۆیان بۆ چاودێریکردن و جموجۆڵیان دەخەنەگەڕ.
نێچیرڤان بارزانی سەرۆکی حکومەتی هەرێمی کوردستان لە مانگی سوباتی ڕابردوو ڕایگەیاند، ژمارەی ئاوارە و پەنابەران، لە دوو ملیۆن کەس نزیکبووتەوە و نزیکەی 28%ی دانیشتوانی هەرێم پێکدەهێنن.
- 23-09-2015