رۆژی 13-06-2015 مەسعود بارزانی ڕۆژی 20ی مانگی ئابی داهاتووی وەکو ڕۆژی هەڵبژاردنی سەرۆکی هەرێم دیاریکرد. ئەم ڕاگەیاندنەی بارزانی دوای ئەو مشتومڕە دێت کە ماوەیەکە لەنێوان لایەنە سیاسیە دەسەڵاتدارەکانی کوردستان دەربارەی پۆستی سەرۆکی هەرێم‌و سەڵاحیاتەکانی بەرپابووە. هەریەکە لە یەکێتی نیشتمانی‌و بزوتنەوەی گۆڕان لەسەر ئەم مەسەلەیە کەوتونەتە بەرامبەر پارتیەوە‌ودەیانەوێ لەرێگای توندکردنەوەی فشارەکانەوە لەژێرناوی جێگیرکردنی سیستەمی پەرلەمانی بۆ کوردستان‌و هەموارکردنەوەی دەستوردا پلەیەک پارتی لە دەسەڵاتی ڕەهای بەسەر کوردستاندا بکێشنە خوارەوەو خۆیان جێگای بگرنەوە. پارتیش لەبەرئەوەی پێیوایە سەرۆکەکەی کە ئیستاش سەرۆکی هەرێمە، پێویستە دوبارە بۆ خولێکی دیکە ببێتەوە بە سەرۆکی هەرێم، ڕاستەوخۆ ئەم بێنەوبەردەیە بە هێرش‌و پیلان بۆسەر خۆی لێکدەداتەوە. بۆیە ئەم بڕیارەی بارزانی پەیامێکی سیاسیە بۆ یەکێتی‌و گۆڕان‌‌و سەرجەم نەیارەکانی پارتی تا پێیان ڕابگەیەنێت کە ئەوان ناتوانن چارەنوسی ئەو وەکو سەرۆکی هەرێم دیاری بکەن، بەڵکو ئەوە خۆی‌و حیزبەکەیەتی بڕیاردەری سەرەکی کوردستانن!

ئەوەی کە ئەم هەراوزەنایەی هەریەکە لەو حیزبانە ناویانەتەوە ناتوانێ تائەوسەری ڕێگاکە بڕبکات، گومانێکی تێدا نیە، چونکە بەرژەوەندیەکی واقعی لەپشتی ئەم پڕوپاگەندانەوەیە کە ئەو سێ حیزبە بە شوێنیەوەن. لەلایەکەوە هەریەکە لە یەکێتی‌و گۆڕان کاندیدێکیان نیە بەرامبەر بە مەسعود بارزانی بۆ پۆستی سەرۆکی هەرێم، بۆیە شەڕەکەیان بۆ کەمکردنەوەی سەڵاحیاتەکانی سەرۆکی هەرێمە، بێجگە لە بەدەستهێنانی چەند ئیمتیازێکی سیاسی ئەوەندەی بۆیان بکرێت. مەسعود بارزانیش ئەمە دەزانێت، بۆیە ڕووبەرووی ئەم بڕیارەی کردونەتەوە. بەڵام هاوکات بارزانی لەوە تێگەیشتوە کە ئەگەر لەگەڵ ئەو لایەنانەدا سازان نەکات، ئەوا ناتوانێ ببێتەوە بە سەرۆکی هەرێم. بارزانی‌و هەموو کەسێکیش دەزانێ کە یەکەم هەڵبژاردنی مەسعود بارزانی وەکو سەرۆکی هەرێم بە هەڵبژاردنی گشتی بەبێ پشتیوانی یەکێتی و خودی تاڵەبانی مەیسەر نەدەبوو!

بەڵام سەرەنجام یەکگرتنی بەرژەوەندیەکان، وەکو پێکدادانیان، ئەگەرێکی مومکینەو ئەو لایەنانەی بۆرژوای دەسەڵاتدار لەسەر بەشکردنی دەسەڵات لەنیوان خۆیاندا ڕێدەکەون. ئەوەی لەونێوەدا دەگوزەرێت سەرقاڵکردنی خەڵکی کرێکارو زەحمەتکێش‌و کەمدەرامەتی کوردستانە لەلایەن ئەو هێزانەوە بە کێشەیەکەوە کە ڕوخساری ڕاستەقینەی کێشەکانی خۆیانیان لەبیربەرنەوەو بەرەو جێگایەکی دیکەی ئاراستەبکەن. گوایە کێشەکەیان لەسەر مافەکانی خەڵک‌و بەرینکردنەوەی ئازادیەکان‌و سیستەمی دیموکراسی‌و ڕێگرتنە لە دیکتاتۆریەت‌!

گومان لەوەدا نیە کە زۆربەی خەڵکی کوردستان نایانەوێ حوکمی بنەماڵەیی لە کوردستاندا جێگیربێت‌و بارزانیش ببێتە سەرۆک‌و مەلیکی کوردستان و جارێکی دیکەش ببێتەوە بە سەرۆکی هەرێم، هەروەکو لە قازانجی خەڵکی کرێکارو زەحمەتکێش‌و ئازادیخوازانی کوردستانیش نیە کە ئەو ببێتەوە بە سەرۆکی هەرێم، بەڵام ئەم بازاڕگەرمکردنەی یەکێتی‌و گۆڕان‌ لەدەوری پۆستی سەرۆکی هەرێم، ئەو ڕاستیە وون دەکات کە خەریکن پاشقولێکی گەورە لەخەڵک دەگرن، ئەویش داسەپاندنی دەستورێکی کۆنەپەرست‌و تاسەر مۆخ دژی ئازادی‌و دژی مەدەنیەت‌ و دژی خەڵکی کرێکارو کەمدەرامەتی کوردستانە. دەستورێک کە دەیانەوێ بە وەرگرتنی دەنگی خەڵک خۆیان بیکەنە مڵۆزمێک بەسەر خۆیان‌و نەوەکانی دوای خۆشیانەوە. بۆیە خەڵکی هوشیاری کوردستان دەبێ لەم گەمەی دەستورو سەرۆکی هەرێمەدا نەکەونە شوێن پڕوپاگەندەی هیچ کام لەو لایەنانەو بە دەنگی بەرز بڵێن کە دەستورێکی سیکولار و سیستەمێکی دەسەڵاتدارێتیان دەوێ کە مرۆڤ‌و بەهاکان‌و ژیان‌و گوزەران و کەرامەت‌و ئایندەی مرۆڤەکان کارنامەی سەرەکی بێت!

16ی حوزەیرانی 2015