ئەندامێکی ئەنجومەنی نوێنەرانی عێراق ڕایدەگەیەنێت، زیاتر لەنیوەی بودجەی پەرلەمان بۆ کارمەندانی پارێزگاری (حیمایە)ی پەرلەمانتارانی ئێستا و خولەکانی پێشو خەرجدەکرێت، دەشڵێت، تێچوی ساڵانەی ئۆتۆمبێلەکانی پەرلەمان زیاتر لەدوو ملیار دینارە.
بەغداد، ئاوێنەنیوز: لەیاداشتێکدا کە ئاراستەی سەرۆکی ئەنجومەنی نوێنەرانی عێراقی کردوە و ئەمڕۆ سێشەممە، وێنەیەکی بەئاوێنەنیوز گەیشتوە، مەهدی حافز، ئەندامی ئەنجومەنەکە ئاماژە به و خەرجییە زەبەلاحە دەکات کە بەهۆکاری جیاجیا کەوتوەتەسەر بودجەی ئەنجومەنی نوێنەران و بەشێوەیەکی گشتیش بودجەی گشتی وڵات.
له و بارەیەشەوە ئاشکرایدەکات، بەپێی زانیارییەکان 14.800 کارمەندی ئەمنی هەیە کە کاریان پارێزگاری ئەندامانی خولی ئێستا و خولەکانی پێشوی ئەنجومەنەکەیه و 52%ی کۆی بودجەی ئەنجومەنی نوێنەران بۆ ئەوان دەڕوات کە دەکاتە نزیکەی 156 ملیار دینار لەکۆی 315 ملیار دیناری بودجەی پەرلەمان پەرلەمان بۆ ساڵی 2014.
هەروەها دەڵێت، پێویستە چاو بەژمارەی ئه و ئۆتۆمبێلانەدا بخشێندرێتەوە کە لەئەنجومەنی نوێنەران بەکاردەهێنرێت و بخرێتە ژێر لێپرسراوێتییەوە، ڕونیشیدەکاتەوە، 550 ئۆتۆمبێلی سەر بەئەنجومەنی نوێنەران هەیە کە بەشێوە و ڕێگەیەکی نەزانراو دابەشکراوە، بۆ ئەمەش داوادەکات خەرجییەکان له و بوارەدا کەمبکرێتەوە بەهۆی ئەوەی تێچوی بەکارهێنانیان دەگاتە دوو ملیار دینار لەساڵێکدا.
سەبارەت بەئیفادی ئەندامانی پەرلەمانیش مەهدی حافز دەلێت، بەپێی زانیارییان دەرماڵەی پەرلەمانتارێک بۆ ڕۆژێک دەگاتە 600 دۆلار بۆ دەرەوەی عێراق و 150 دۆلار بۆ ناوخۆی عێراق جگە لەلەئەستۆگرتنی کرێی ئۆتێل و کرێی گواستنەوە.
- 09-12-2014