ئا: شاهۆ ئەحمەد
ئەندامی ئەنجوومەنی نوێنەرانی ئێراق دلێر عەبدولقادر لەبارەی کەمبوونەوەی بودجەی ئێراق لەلێدوانێکی بۆ ئاوێنە وتی پێشتر وا دانرابوو ئێراق لەرۆژێکدا سێ ملیۆن و شەش سەد هەزار بەرمیل نەوت بەرهەم بێت، بەڵام ئێستا وا پێشبینی دەکرێت لەرۆژێکدا سێ ملیۆن و چوار سەد هەزار بەرمیل نەوت بەرهەم بێت واتا ڕۆژانە 200 هەزار بەرمیل کەمێکردووە هۆکارێکی تر وادانرابوو نرخی یەک بەرمیل نەوت 90 دۆلار بێت، بەڵام ئەوەیش کەمێکردووە بۆ 85 دۆلار ئەوەش دەگەڕێتەوە بۆ ئەوەی لە بازاڕەکانی جیهان نرخی نەوت دابەزیوە و ڕێژەی بەرهەمهێنانیش کەمێکردووە لەگەڵ ئەوەش داهاتیش کەمێکردووە.
ناوبراو ئاماژەی بەوە کرد ئەو کەمکردنە هیچ پەیوەندی بە مووچەی مامۆستا و فەرانبەرەوە نییە ئەوان وەکوو خۆیی دەمێنێتەوە. پەڕڵەمانتارەکەی ئەنجوومەنی نوێنەرانی ئێراق ئەوەشی ڕوونکردەوە ساڵانی ڕابرد و بودجەی هەرێمی کوردستان زیاتر لە18 ترلیۆن بوو، بەڵام ئەمساڵ ئەوەی دانراوە ناگاتە 17 ترلیۆن.
لە بەرانبەر ئەوەشدا فازڵ نەبی بریکاری وەزارەتی دارایی ئێراق قسەکانی ئەو پەڕڵەمانتارە ڕەتدەکاتەوە و دەڵێت ڕێزم هەیە بۆ پەڕڵەمانتاران، بەڵام ئەوان لەخۆیانەوە قسە دەکەن چونکە نە نرخی بەرمیل کەمێکردووە نە بەرهەمهێنانی نەوت کەمێکردووە و ڕاشیدەگەیەنێت کەمبوونی بودجە هەموو بوارەکان دەگرێتەوە.
ئابووریناسێک پێیوایە کەمکردنەوەی بودجەی ئێراق هاوکات هەرێمی کوردستان کاریگەریی نێگەتیڤی دەبێت لەسەر داهاتی تاکەکەس هەر کاتێکیش داهات کەمبوو خواست کەمدەبێتەوە. ئابووریناس ئەمیر ئەحمەد بۆ ئاوێنە وتی بودجە پێوەرێکە بۆ پێوانەکردنی داهاتی گشتی ئەویش دەبێتە پێوەرێک بۆ داهاتی تاکەکەس، کەمکردنەوەی بودجەی ئەمساڵی ئێراق هاوکات هەرێمی کوردستان کاریگەریی نێگەتیڤی دەبێت لەسەر داهاتی تاکەکەس، ئەوەش دەگەڕێتەوە بۆ کەمکردنەوەی خواستی بەکاربەر هەر کاتێک بودجە کەمێکرد دەبێتە کەمکردنەوەی پڕۆژەکان ئەوەش دەبێتە هۆکارێکی سەرەکی بۆ سەرهەڵدانی بێکاریی لە سەرجەم بوارەکان.
ئەو وتیشی ئەو کەمکردنەوەیەی بودجە دەبێتە هۆی ڕاوەستانی بازاڕەکان بەشێوەیەک هەم کڕیارو هەم فرۆشیار زەرەر دەکەن، هەر بۆیە بەگشتی زیانێکی زۆر بەداهاتی گشتی و تاکەکەس دەگەیەنێت.
سەبارەت بەکەمبوونەوەی بودجەی هەرێمی کوردستان دلێر تاریق وتەبیژی وەزارەتی دارایی حکومەتی هەرێمی کوردستان بەئاوێنەی ڕاگەیاند بەدڵنیاییەوە بودجەی هەرێمی کوردستان کەمێکردووە بۆ 16 ترلیۆن هەر بۆیە لە بەڕێوەبەرایەتی گشتی بودجە لیژنەیەک پێکهێنراوە بۆ ئەوەی پێداچونەوە بکات بەبودجەی وەزارەتەکان بۆ ئەوەی بزانرێت پێویستە لەکام وەزارەت بودجەی کەمبکرێت و لەکامیشیان بودجەکە وەکوو خۆی بمێنێتەوە.
-09-01-2014