بەرێزان.. ئەندامێن فراکسیونا گوڕان ل پەرلەمانێ کوردستانێ
پشتی رێز و سلاڤا

ئەز وەکو کەسەک من بەشداری د دروستکرنا لیستا گوڕان و بزاڤا گوڕاندا کری هەروەسا وەکو هاولاتیەکێ کوردستانێ، ئەز مافی ددەمە خو ئەز ڤێ نامەیێ ئاراستە بکەم :

ئەڤە زێدەتر ژ دوو سالە وەکو نوێنەرێ سەدان هزار هەڤوەلاتیا ل پەرلەمانێ کوردستانێ هەوە سویند خواریە، ژ بەری هوین ببن ئەندام پەرلەمانی هەوە ل بەردەم رایا گشتی سویند خواریە کو پابەند بن ب پەیام و کارناما لیستا گوڕان، خەلکێ کوردستانێ ل سەر بنەمایێ پەیمانێن لیستا گوڕان دەنگێ دا هەوە و مە.

من و هەڤالێن خو ب شانازی ناڤێن خو دان دگەل ناڤێن هەوە دا کو پێکڤە باوەریا خەلکێ ب دەست بینین، د هەوا هەلبژاتناندا هەڤوەلاتی ب هێڤیەکا مەزن کەفتنە سەر جاددەیا، چوار هزار هەڤوەلاتی ژ ئەگەرێ پشتەڤانیا لیستا گوڕان هاتنە سزادان و هزاران لایەنگرێن گوڕان روی ب روی هێرشێن کوشتن و زیندان و قوتانێ بوون، بەلێ ئەو بەردەوام بوون و خوبەخش بوون بو پشتەڤانیێ، هزارەهان پێشمەرگەیێن کەڤن، سەدان چاڤدێرێن خوبەخش ل سەر سندوقێن دەنگدانێ، سەدان روژنامەڤان، نڤێسەر، هونەرمەند و کەسانێن چالاک پشتەڤان بوون، هەڤالان ل روژناما روژنامە، ل تەلەڤزیونا کەی ئێن ئێن، رادیویا گوڕان، مالپەرێ سبەی، کەنالێن کومپانیا وشە... مەزنترین کەمپینا راگەهاندنێ بو هەلبژاردنا ساز دا. چەندین داهێنانێن نوی پیشکێش کرن، ئازادیا خو بەخشین بو سەدان هزار هەڤوەلاتیا ژ پیخەمەت ب ئازادانە بەشداریێ د هەلبژاتناندا بکەن، و ب ئازادانە دەنگ بدەن.

هەلبەت ئەم هەتا نوکە ژی ئومێدا مە ب هێزە ب هەوە، ئەم دزانین هوین پێگرن ب هێلێن گشتیێن بزوتنەوەیا گوڕان، ئەم کا چەوا پێخوشین بچینە پەرلەمانی هەروەسا ب ئومێدین ل نوکە و ل پاشەروژێ وەک کەسایەتیەکا بلند د ناڤ خەلکێ دا بمینن، بلا ئەڤە ژی ل دەڤ هەوە روهن بیت، نە ئەم و نە هەڤالێن مە، نە ژی هەڤوەلاتیێن کوردستانێ حەسویدیێ ب هەوە نابین، چاڤێ مە ل ئیمتیازاتێن هەوە نینە، بەروڤاژی گەلەک جارا مە دەست خوشیا هەوە یا کری، مە شانازی ب هەڤالینیا هەوە بریە، چەندین جارا ل چەندین هەلکەفتا مە پەسنا هەوە یا کری، مە هوین زانینە وەکو ئێکەم پلەیا خەباتا پەرلەمانی، بەلێ پشتی ژ دوو سالا زێدەتر دەمێ هندێ هاتیە چەند پەیڤا بێژم :

من ل ژیانا پێشمەرگایەتیێ هەتا نوکە شێرە ژن و جوامێر ب هندێ تاقیکرینە کو ل بەردەم پارەی و پوستا خوڕاگر بن و چوکێ ڤەنەدەن، دەمەکی ل خەلکێ هەڵ ببیت ل خو نەگهوڕن و خەلکێ ل خواری خو نەبینن، ناڤەشێرم هندەک ژ هەوە د ئێکەم تاقیکرنێ دا لاواز دەرچوون، ل بەردەم شوقە و ڤیلا و ترومبێل و زێرەڤان و ئیمتیازا خوڕاگر نەبوو، بەلێ هەتا نوکە من ل چ ئورگانێن رەسمیێن بزوتنەوەیا گوڕان ب رەسمی لومە ژ هەوە نەکرینە، من د پەروەردا سیاسی دا حەز ل ئاموژگاری و وەعزا نینە.

من حەزا هندێ ژی نینە کو کەسێ ژ ترسا من یان ژ ترساندنا رێک و پێکیا حزبێ ژی نینە، بەلکی ترسا هندێ یە کو هەڤوەلاتی ژ مە دویر بکەڤن و ترسا موحاسبەیا وژدانا خو بکەت،من باوەری ب وێ پەندا هندیێن سور هەیە کو دبێژن :

ل دەمێ خودانکرنا زاروکی دا ل خو بگەڕهە کا دێ چەند جارا خەلەتیا کەت و باجا خەلەتیێ بدەت، وی دەمی دەستێ وی بگرە و چەند گوتنەکا بێژیێ.

نوکە پشتی چەند خەلەتیێن هەین، هەوە ب خو ژی ژ بەر وان خەلەتیا هەوە باج دا، من دڤێت ل دەڤ هەوە روهن بیت کو بزوتنەوەیا گوڕان ئامادە نینە باجا خەلەتی و تەماعی یا هیچ کەسێ بدەت، خو ئەگەر روناهیا چاڤێ من ژی بیت، چونکی ئەگەر بێخنە گوشەیەکێ و مە ئاگەهدار بکەن دناڤبەرا سومعەتا بزوتنەوەیا گوڕان و ژ دەتدانا باوەریا سەدان هزار هەڤوەلاتیا ژ ئەگەرێ دەرکرنا چەند ئەندام پەرلەمانتارا، بێ دوو دلی دێ یا دووێ هەلبژێرم، بەلێ هێشتا نەچووە و د دەمێ ڤێ سالێ و چەند هەیڤەک ماین هوین ژ پەرلەمانی ب خو بچن ڤان کارا بکەن :

1 – ئەو ئەندام پەرلەمانێن گوڕان کو داخوازیا کڕین و تاپوکرنا شوقە و ڤیلایێن پەرلەمانی کرین، مە ئاگەهدار کربوون کو ب رونکنەکێ داخوازێ لێبورینێ ژ خەلکێ کوردستانێ و دەنگدەرێن خو بکەن، چونکی وانا پەیمان دابوو بەرگریێ ژ مافێ گشتی بکەن نەک ژ ئیمتیازاتێن خو، بەلێ ئەڤە نەکر، دڤێت دەست ژ کارێ خو بکێشن، ئەگەر نە ئەم بو رایا گشتی دیار دکەین کو ئەو ئەندام پەرلەمانێن گوڕان نینن و پێگر نەبوون ب پەیمانێن هەلبژارتناندا.

2 - فراکسیونا هەوە بلا پروژە یاسایەکی پێشکێش بکەت بو کێمکرنا مووچەیێ ئەندام پەرلەمانا و هەمی ئەو ئیمتیازاتێن وەکی ترومبێل، شوقە و ڤیلا نەدەن ئەندام پەرلەمانا، کو مووچەیێ ئەندام پەرلەمانی وەکهەڤ بهێتە کرن لگەل بلندترین مووچەیێ فەرمانبەرەکێ حکومی، مەبەستا من ئەو فەرمانبەر نینن یێن پلەیا تایبەت هەین.

3 – بلا فراکسیونا هەوە پروژە یاسایەکی پیشکێش بکەت بو هەلوەشاندنا خانەنشینا ئەندام پەرلەمانی، هەلوەشاندنا هەمی ئەو یاسایێن کو ئەندام پەرلەمانی د ژیێ خانەنشینیێ دا خزمەتا مەدەنی پێ دهێتە خانەنشین کرن، پروژە یاسا بلا گەرەنتیێ هندێ بدەت کو ئەندام پەرلەمان بگەڕیتە سەر کارێ خو یێ ژ بەری ئەندام پەرلەمانیێ، ئەوێ کار نەهەی بلا بو دەمێ سالەکێ مووچە پێ بهێتە دان هەتا کارەکی بو خو ببینیت، ئەڤ پروژە یاسایە د بەرژەوەندیا خەلکێ دا یە چونکی ئەندام پەرلەمان دهێتە هاندان کارێ باش بکەت دا کو جارەکا دی باوەریا خەلکێ وەربگریت و ببیتە ئەندام پەرلەمان ڤە.

4 – فراکسیونا خو ل سەر چەند گروپەکا دابەش بکەن (وەکی نموونە پێنج گروپ) حەفتیانە هەر پێنج گروپا سەرەدان پێنج ناڤچەیێن جیاوازێن کوردستانێ بکەن، ژ نزیک گوهێ خو بدەنە داخواز و پێشنیارێن خەلکێ، پێشنیار و داخوازیێن وان ب نڤێسین ببەنە بەر دەستێ بەرپرسان و بەرپرس و یەکەیێن ئیداری و وەزیرا، نوسخەیا ژی لێ بدەن ب سەروکێ پەرلەمانی و د لژنان ژی دا دویڤداچوونێ ل سەر بکەن، هەر گروپەک بلا حەفتیانە راپورتا خو بدەتە (سەید عومەری سەید عەلی) کو کومکەرێ فراکسیونا هەوەیە، د راپورتاندا وێ ژی تومار بکەن کی ئامادە نەبوو و ئەرکێن خو نەکرینە و عوزرا وی چ بوو، هەروەسا وەک د پروژە دەستورێ بزوتنەوەیا گوڕان دا هاتی، کو بو هەرئەنجومەنەکێ باژێرەکی ئەندام پەرلەمان دا هاتیە دانان ل سەر پێدڤیە وی ئەرکی ژی جێبەجێ بکەت.

5 – ب تاک و بەلاڤە پروژەیی پێشکێش نەکەن، پێکڤە ب شیرەت لگەل کومکەر و ژوورا یاسایی و ژورا ئابوری، ژوورا ڤەکولینا سیاسی پروژەیی پێشکێش بکەن بزانن گونجایە لگەل کارناما گوڕان یان نە،هەر پروژەیەکی ژی دەمێ خو هەیە.

6 – مالپەرێ رەسمیێ یێ بزوتنەوەیێ و راگەهاندنا مە د راسپێرم ب گرنگیدانا چالاکی و پروژەیێن فراکسیونا هەوە، بەلێ دڤێت ئەڤە ژی ل دەڤ هەوە روهن بیت کو هوین چووینە د ناڤ پەرلەمانی دا دا کو پتر نێزیکی خەلکێ بن نەک هەردەم د راگەهاندنێ دا دەرکەڤن، ئەم ژی وەکو بزوتنەوەیا گوڕان ژبلی مە دوو فراکسیونێن دی هەنە، نێزیکی دەە ژوور و چل ئەنجومەن ل کوردستانێ داخوازێ ژ مە دکەن چالاکیێن وان تەختیە بکەین، بەلێ ئەم دگەهینە چالاکیێن گرنگر، باوەری مە ب کارمەندێن راگەهاندنا خو هەیە کو ب دلسوزی بو بزوتنەوەیا گوڕان و بەرژەوەندیا خەلکێ کار دکەن.

ل دویماهیێ... ئومێدهوارم ل بهر روناهیا ڤێ نامهیێ، لاپهڕهکێ نوی ل ژیانا خو و ل ژیانا خهباتا پهرلهمانی ببنە سەر، ب سهربهرزانە بچنە ناڤ خهڵک و دهنگدهرێن خو، ئەز و هەڤالێن خو پشتەڤانێن هەوەینە، هیڤیا هەمی باشیان بو هەوە دخوازم و هەر بژین.

ل جهێ بزوتنەوەیا گوڕان
هەڤالێ هەوە
نهوشیروان مستهفا
23-01-2012