[1]

بافڵ تاڵەبانی سەرۆکی یەکێتیی نیشتمانیی کوردستان، لە ساڵیادی کیمیابارانکردنی #هەڵەبجە#دا پەیامێک بڵاودەکاتەوە و رایدەگەیەنێت: بەداخەوە ئەمڕۆ کە یادی ئەو تاوانە گەورەیە دەکەینەوە، گلەییەکان زۆرن و خزمەتگوزارییەکان کەمن، جیاکاریی لە پێشکەشکردنی خزمەتگوزاریدا دەکرێت و ئەوەی پێشکەشی هەڵەبجە و هەڵەبجەییە سەربەرزەکان دەکرێت تەنیا لە چوارچێوەی درووشم و بەڵێنی بێکرداردا ماوەتەوە.
لە پەیامەکەی بافڵ تاڵەبانی-دا ئاماژە بەوەشدراوە: دەبێت بەرپرسیارێتی بەرامبەر خاک و نیشتمان، جێگەی بیری جیاکاری بگرێتەوە و خزمەتگوزارییەکان بۆ هەمووان بێت. کوردستان پێویستی بە یەکڕیزی و یەکگرتووییە نەک ترازان و دوورکەوتنەوە، دەبێت جیاوازییەکان بخەینە خزمەت بەرژەوەندییە هاوبەشەکان و لەبیرمان بێت وەک کورد یەک چارەنووسمان هەیە.

=KTML_Bold=دەقی پەیەماکەی بافڵ تاڵەبانی=KTML_End=
ئەمڕۆ و هەموو رۆژەکانی ژیانمان شەهیدانی جینۆسایدی هەڵەبجە و خۆڕاگریی کەسوکاری سەربەرزیانمان لەیادە و سەری رێز و نەوازشیان بۆ دادەنەوێنین.
بەداخەوە ئەمڕۆ کە یادی ئەو تاوانە گەورەیە دەکەینەوە، گلەییەکان زۆرن و خزمەتگوزارییەکان کەمن، جیاکاریی لە پێشکەشکردنی خزمەتگوزاریدا دەکرێت و ئەوەی پێشکەشی هەڵەبجە و هەڵەبجەییە سەربەرزەکان دەکرێت تەنیا لە چوارچێوەی درووشم و بەڵێنی بێکرداردا ماوەتەوە، لەکاتێکدا دەبوو ئەو کارەساتەی بەسەر ئەو شارەدا هات، وانەیەکی مێژوویی و پەندێکی گەورە بووایە بۆ ئێمەی کورد و هەمووان پێکەوە بە رۆحێکی نیشتمانی و بەرپرسیارانەوە کارمان بۆ گەڕاندنەوەی هیوا و بونیادنانی داهاتوویەکی گەشتر و سەقامگیرتر بکردایە.
دەبێت لای هەمووان روون بێت ئەوەی خەڵکی هەڵەبجە و هەموو کوردستان پێویستیانە، بیرکردنەوەی تەسکی حزبی و هەوڵدان بۆ بەرژەوەندیی تایبەت نییە، بەڵکو خزمەتکردن و بەدەنگەوەچوونی داواکارییە رەواکانە. دەبێت بەرپرسیارێتی بەرامبەر خاک و نیشتمان، جێگەی بیری جیاکاری بگرێتەوە و خزمەتگوزارییەکان بۆ هەمووان بێت. کوردستان پێویستی بە یەکڕیزی و یەکگرتووییە نەک ترازان و دوورکەوتنەوە، دەبێت جیاوازییەکان بخەینە خزمەت بەرژەوەندییە هاوبەشەکان و لەبیرمان بێت وەک کورد یەک چارەنووسمان هەیە.
دروود بۆ گیانی شەهیدان و سەرفرازی بۆ کەسوکاریان. [1]

#بافڵ تاڵەبانی#
سەرۆکی #یەکێتیی نیشتمانیی کوردستان#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

بۆ یادی 36 ساڵەی کیمیابارانی هەڵەبجە، مەکتەبی سیاسی یەکێتی پەیامێکی بڵاوکردەوە و رایگەیاند: کارەساتی #هەڵەبجە# پەژارەیەکی نیشتمانی و نەتەوەییە کە هەرگیز لەهزر و ئەندێشەی گەلەکەمان دەرناچێت، یەکێتی وەک چۆن لە رابردوودا درێغی لە خزمەتکردنی کەیسی ئیداری و ئاوەدانی هەڵەبجەدا نەکردووە، لەمەودواش بە گوڕوتینێکی زیاتر لەم ئەرکە پیرۆزە بەردەوام دەبێت.

=KTML_Bold=دەقی پەیامەکە:=KTML_End=
پەیامی مەکتەبی سیاسی بۆ یادی 36 ساڵەی کیمیابارانی هەڵەبجە:
36 ساڵە پێش ئێستا رژێمی رەفتار فاشی #بەعس# شاری هەڵەبجەی بە چەکی کیمیاوی بۆردومان کرد و پێنج هەزار هاووڵاتی و دەیان هەزار کەسی بریندار و ئاوارە و بێ ماڵوحاڵ کرد.
خەڵکی جینوسایدکراوی پارێزگای هەڵەبجە و خاکی بەسوتماکراوی پایتەختی شارەزوور، لەم کارەساتەوە بوون بە ناونیشانی مەزڵومیەتی گەلی کوردستان و کێشە رەواکەی لە سەرتاسەری دونیادا.
بیرەوەری 36 ساڵەی کارەساتی هەڵەبجە بیرەوەرییەکی خەمناک و پەژارەیەکی نیشتمانی و نەتەوەییە کە هەرگیز لە هزر و ئەندێشەی گەلەکەمان و بزوتنەوەی کوردایەتی و مرۆڤایەتی بە ویژدان دەرناچێت و هەمیشە زامێکی سارێژ نەبووە تا ئەو رۆژەی هەڵەبجە و هەموو کوردستان دەگەنە دوا قۆناغی رزگاری و ئارامی و ئاوەدانی و قەرەبووی لانی کەمی زوڵم و ستەمی رژێمەکەی سەددام وەردەگیرێتەوە کە یەکەم حکومەت بوو کیمیاوی بەرامبەر بەشێکی گەلەکەی و هاوڵاتیانی چوارچێوەی وڵاتەکەی بە کار بێنێ.

هەڵەبجەی ئەمڕۆ پێویستی زیاتر و زیاتری بە ئاوەدانی و بوژانەوە و ژینگەیەکی پاک و تەندروست بۆ ژیان هەیە، ئومێدی خەڵکەکەی ئەوەیە دوای بوونی بە پارێزگایەکی خنجیلانەی هەرێم، لە ئاستی عیراقیشدا رێکارە یاسایی و ئیدارییەکانی بوونی بە پارێزگای نۆزدەمینی وڵات تەواو ببێت و ئەنجومەنی نوێنەرانی عێراق ئەم ئەرک و شانازییە نیشتمانی و مرۆییە بە زوویی راپەرێنێ .
یەکێتیی نیشتمانیی کوردستان وەک چۆن لە دەیەکانی رابردوودا درێغی لە خزمەتکردنی کەیسی ئیداری و ئاوەدانی و بوژانەوەی هەڵەبجە و ناساندنی وەک تاوانێکی نێودەوڵەتی جینوساید و هاندانی بەرپرسیارێتیی مۆراڵی کۆمەڵگەی نێودەوڵەتی لە ئاست ئەم تاوانە گەورەیە نەکردووە، لەمەودواش بە گوڕوتینێکی زیاتر لەم ئەرکە پیرۆزە بەردەوام دەبێت و لە ئاستی هەموو نوێنەرایەتییەکانی لە پەرلەمان و حکومەت، لە ئاستی هەرێم و حکومەتی فیدراڵیدا تێکۆشانی هەمەلایەن و دەستە جەمعی و بەکردەوەی بۆ دووپات دەکاتەوە.
نەمری بۆ شەهیدانی هەڵەبجە و قوربانیانی جینۆسایدی گەلەکەمان لەسەرتاسەری کوردستاندا. [1]
=KTML_Bold=تا سارێژبوونی دوا زامەکانی هەمیشە دەڵێین:
(هەڵەبجە.. برینمانی ، لە بیرمانی)=KTML_End=

مەکتەبی سیاسیی
#یەکێتیی نیشتمانیی کوردستان#
#16-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

نێچیرڤان بارزانى سەرۆکی هەرێمی کوردستان لە 36ە‌مین ساڵیادى کیمیابارانکردنی #هەڵەبجە# لە پەیامێکدا رایدەگەیەنێت، لەم یادەدا جەخت دەکەینەوه،‌ کە دەبێ هەڵەبجە و هەڵەبجەیییەکان و تەواوى قوربانییانى جینۆساید و ئەنفال و تاوانەکانى رژێمى پێشوو لە هەرێمى کوردستان لە هەموو روویەکەوە قەرەبوو بکرێنەوە.

=KTML_Bold=دەقی پەیامەیەکەی سەرۆکی هەرێمی کوردستان:=KTML_End=
لە (36)هەمین ساڵیادى مەرگەسات و تاوانى سامناکى کیمیابارانکردنى هەڵەبجەدا، سەرى ڕێز و نەوازش بۆ گیانى پاکى زیاتر لە پێنج هەزار شەهیدى هەڵەبجە و تەواوى شەهیدانى کوردستان دادەنوێنین، بە ڕێز و شکۆدارییەوە یادیان دەکەینەوە، سڵاو بۆ خێزان و کەسوکاریان و بۆ هەموو ئه و قوربانییانه دەنێرین کە هێشتا بە شوێنەوار و پاشماوە و نەخۆشییەکانى ئه و تاوانەوه،‌ دەناڵێنن.‌
کیمیابارانکردنى هەڵەبجە ئەڵقەیەکە لە زنجیرەیەک تاوان و جینۆساید و ئەنفال و زیندەبەچاڵکردن کە زۆر دڕندانە دەرهەق بە گەلى ستەملێکراوى ئاشتیخواز و ژیاندۆست و مرۆڤپەروەرى کوردستان کراوە، تەنیا گوناهیشى ئەوە بووە لە وڵاتى خۆیدا داواى ماف و ژیان و ئازادى و شکۆمەندى کردووە. ئەگەر هیچ دادپەروەرییەک هەبوایە، تەنیا جینۆسایدى هەڵەبجە بەس بوو بۆ ئەوەى هەموو مافە ڕەواکانى گەلى کوردستان، بناسرێن.

لەم یادەدا جەخت دەکەینەوە کە دەبێ هەڵەبجە و هەڵەبجەیییەکان و تەواوى قوربانییانى جینۆساید و ئەنفال و تاوانەکانى ڕژێمى پێشوو لە هەرێمى کوردستان لە هەموو ڕوویەکەوە قەرەبوو بکرێنەوە، لە هەموو بوارەکانیشدا باشترین خزمەت بکرێن. بۆ ئەمە پێویستە حکوومەتى عێراق هەموو ئەرک و بەرپرسیاریەتییەکان و دادپەروەرى بۆ قوربانییان جێبەجێ بکات. لەسەر ئاستى جیهانیش دەبێ کار بکرێت بۆ ئەوەى هەرگیز ڕێگه نەدرێت تاوان و کۆمەڵکوژیى ئاوا لە هیچ شوێنێک دووبارە ببنەوە.
دەسکەوتەکان و قەوارەى سیاسى و دەستووریى فیدراڵیى هەرێمى کوردستان، بەرهەمى خوێنى شەهیدان و قوربانیدانى گەلى کوردستانن بە هەموو پێکهاتەکانییەوە، بۆیە ئێستاش ئەرکى هەمووانە بە یەکڕیزى و تەبایى بیانپارێزن و گیانى شەهیدان و دڵى خێزان و کەسوکاریان شاد بکەن، تا پێکەوە بەره و داهاتوویەکى باشتر و ئارام و پارێزراو هەنگاو بنێین. [1]

#نێچیرڤان بارزانى#
سەرۆکى هەرێمى کوردستان
#16-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

مەسروور بارزانی، سەرۆکی #حکومەتی هەرێمی کوردستان#، لە 36ەمین ساڵیادی کیمیابارانی #هەڵەبجە# پەیامێکی بڵاوکردەوەو رایدەگەیەنێت، پێویستە هەمیشە ئەم تاوانانەمان لە یاد بێت و هاندەرمان بێت بۆ داکۆکیکردن لە مافە نەتەوەیی و نیشتمانییەکانمان و پاراستنی قەوارەی هەرێمی کوردستان.

=KTML_Bold=دەقی پەیامەکەی سەرۆکی حکوومەتی هەرێمی کوردستان:=KTML_End=
لە سی و شەشەمین ساڵیادی کیمیارانکردن و کۆمەڵکوژیی شاری هەڵەبجەدا، بەڕێز و شکۆوە یادی شەهیدانی بێتاوانی ئەو شارە خۆشەویستەی کوردستان دەکەینەوە کە بوونە قوربانی دڕەندەیی ڕژێمی پێشووی عێراق و بێدەنگی کۆمەڵگەی نێودەوڵەتی.
ئامانجی سەرەکی ئەم تاوانە و تاوانەکانی دیکەی ڕژێمە یەک لە دوای یەکەکانی عێراق لە دژی خەڵکی کوردستان، جینۆسایدکردنی گەلی کوردستان و سڕینەوەی ناسنامەکەی بوو، کە پێویستە هەمیشە ئەم تاوانانەمان لە یاد بێت و هاندەرمان بێت بۆ داکۆکیکردن لە مافە نەتەوەیی و نیشتمانییەکانمان و پاراستنی قەوارەی هەرێمی کوردستان.

جێی داخ و نیگەرانییەکی قووڵە، کە لە دوای ڕووخانی ڕژێمی پێشوو، حکوومەتە یەک لەدوای یەکەکانی عێراق، تا ئێستا ئامادە نین، بە شێوەیەکی شایستە قەرەبووی کەسوکاری شەهیدانی هەڵەبجە و قوربانییانی شاڵاوەکانی ئەنفال و تاوانەکانی دیکە بکەنەوە کە ئەوە مافێکی ڕەوا و دەستووری خەڵکی کوردستانە، تەنانەت تا ئێستا ئامادە نین ڕێکارەکانی بەپارێزگابوونی هەڵەبجەش تەواو بکەن.
خزمەتکردنی خەڵکی هەڵەبجە بە ئەرکی خۆمان دەزانین و مانگی ڕابردوو لە کاتی سەردانمان بۆ پارێزگای هەڵەبجە، ڕەزامەندیمان لەسەر هەموو ئەو داواکارییانە دا کە لەلایەن بەڕێزان پارێزگار و بەرپرسانی کارگێڕی دەڤەرەکە خرانەڕوو. هیوادارین لە داهاتوودا، بتوانین زیاتر خزمەتی خەڵکی نیشتمانپەروەر و قوربانیدەری هەڵەبجە بکەین.
شەهیدانی کارەساتی هەڵەبجە و هەموو ئەو جینۆسایدانەی بەرانبەر خەڵکی کوردستان ئەنجامدراون، هەمیشە لە یادمانن و هەرگیز نابێت ڕێگە بدەین هیچ شتێک ئەم تاوان و شەرمەزارییانە لەبیر خۆمان و لەبیر دەوڵەتی عێراق و دەسەڵاتدارانی بەغدا بباتەوە و دەبێ بەردەوام بەبیریان بهێنینەوە کە پێویستە قەرەبووی خەڵکی کوردستان بکەنەوە.
سڵاو و دروود بۆ گیانی پاکی شەهیدانی هەڵەبجە و گشت شەهیدانی کوردستان. [1]

#مەسرور بارزانی#
سەرۆکی حکوومەتی هەرێمی کوردستان
#16-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

ڕۆژی شەممە #16-03-2024#، #مەسعود بارزانی# لە ساڵیادی کیمیابارانکردنی #هەڵەبجە#دا پەیامێکی لە تۆڕی کۆمەڵایەتیی ئێکس بڵاوکردەوە.
=KTML_Bold=دەقی پەیامی مەسعود بارزانی:=KTML_End=
تاوانی کیمیابارانکردنی هەڵەبجە بەڵگەی ستەمکاری و عەقڵیەتی نامرۆڤانەی نەیارانی گەلی کوردستانە. دوای تێپەڕینی سی و شەش ساڵ بەسەر کارەساتی هەڵەبجەدا مایەی شەرمەزارییە هێشتا لەناو دەوڵەتی عێراقدا حەزی سڕینەوە و ئینکارکردنی مافەکانی گەلی کوردستان دەبینرێت. [1]

=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

مەکتەبی سیاسیی پارتی دیموکراتی کوردستان، لە 36ەمین ساڵیادی کیمیابارانی #هەڵەبجە#دا پەیامێکی بڵاوکردەوە، کە ئەمەی خوارە دەقی پەیامی مەکتەبی سیاسییە لە ساڵڕۆژی کیمیابارانکردنی ھەڵەبجەدا.
ئەمڕۆ ساڵڕۆژی کارەساتێکی دڵتەزێنە، (36)ەمین بیرەوەریی کیمیابارانکردنی شاری ھەڵەبجەیە لە(#16-03-1988#)، لەو یادە خەمگینەدا ھاوسۆزی و ھاوخەمیی خۆمان بۆ کەسوکاری قوربانییانی ئەو تاوانە کەموێنەیە دووپات دەکەینەوە، دروود لە گیانی پاکی شەھیدان بێت.
کارەساتی بۆردوومانکردنی ھەڵەبجە لەلایەن رژێمی ئەوسای #بەعس# بە چەکی قەدەغەکراو تاوانێکی ویژدان ھەژێن بوو، دەسەڵاتی دیکتاتۆری عێراق ھەموو ڕێگاکانی سەرکوتکردن و لەناوبردنی گەلی کوردی بەکارھێنا، سەرئەنجام کورد بەپێوە مایەوە و تاوانبارانیش وەکو ھەمیشە لەناوچوون و بوونە پەندی مێژوو و، تا ھەتایەش ھەڵەبجە وەک سیمبولی خەبات و قوربانیدانی گەلی کوردستان لە ھزری گەلەکەمان و لاپەڕەکانی مێژووی بەرخۆدان و قبووڵنەکردنی ستەم و چەوسانەوە بە شکۆمەندی دەمێنێتەوە.

لەو یادەدا وەکو ھەمیشە پاڵپشتی و پشتیوانیی خۆمان بۆ زیاتر ئاوەدانکردنەوە و پێشخستنی پارێزگای ھەڵەبجە دووپات دەکەینەوە، بەتایبەتی پڕۆژەکانی پەرەپێدان و خزمەتگوزاری و، بوارەکانی دیکە، کە بە دەستپێشخەری و ھەوڵ و تەقەللای بەڕێز سەرۆکی ئەنجوومەنی وەزیران و حکوومەتی ھەرێمی کوردستان ئەنجام دران و دەدرێن.
بەو بۆنەیەوە داواکارین ھەموو لایەک بەدەنگ خواست و ویستی ئەو شارەوە بچن و، داواکارییەکانیان جێبەجێ بکرێ و، ئازار و زامی بریندارەکان ساڕێژ بکرێ و، لەسەر ئاستی حکوومەتی فیدڕاڵیش قوربانییەکانی چەکی کیمیاوی لە ھەموو ڕوویێکەوە قەرەبوو بکرێنەوە و چارەسەری ژینگەی وێرانکراو و ژاراویکراوی ھەڵەبجە بکرێ.
ھیوادارین ئەو یادە ببێتە ھەوێنی ھاوڕیزی و یەک بڕیاریی سیاسی بۆ چارەسەرکردنی کێشە و گیروگرفتەکانمان و، پاراستنی دەستکەوتەکانمان و قەوارەی شەرعیی ھەرێمی کوردستان و، دووبارە نەبوونەوەی ئەو تاوان و کارەساتە جەرگبڕانە.
نەمری و سەرفرازی بۆ شەھیدان و قوربانییانی مەرگەساتی کیمیابارانی ھەڵەبجە و سەرجەم شەھیدانی کوردستان. [1]

مەکتەبی سیاسیی #پارتی دیموکراتی کوردستان#
#16-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=