دەقی ڕاگەیاندراوەکەی گۆڕان:
بە داخ و پەژارەیەکی زۆرەوە، ئەمرۆ سێشەمە قادر حاجی عەلی، سەرکردەی هەڵکەوتو و نیشتمانپەروەر و یەکێک لە دامەزرێنەرانی بزوتنەوەی گۆڕان بەهۆی نەخۆشی لە شاری #سلێمانی#، کۆچی دوایی کرد.
بەو بۆنە خەمناکەوە، پرسە و سەرەخۆشی لە خۆمان و بنەماڵە تێکۆشەرەکەیان و تەواوی خەڵکی کوردستان و هاوخەبات و هاوڕێگاکانمان دەکەین. لە کاتێکیشدا یاد و یادەوەری سەرکردەی خوالێخۆشبو بەرز ڕادەگرین ئەو ڕاستیە بیر هەمو لایەک دەهێنینەوە کە خوالێخۆشبو هەمو تەمەنی خۆی بۆ بزوتنەوەی ڕزگاریخوازی گەلی کوردستان تەرخان کردوە، دوای دروستبونی قەوارەی سیاسیی هەرێمی کوردستانیش کەسایەتیەکی کاریگەری سیاسیی و پاڵپشتیکاری بەهێزکردنی بەرەی چاکسازی و گۆڕانکاری و چاکەی گشتی بوە.
خوالێخۆشبو قادر حاجی عەلی، جگەلەوەی لە خەباتی چەکداری و لەناو کۆمەڵەی ڕەنجدەرانی کوردستان و یەکێتی نیشتمانی کوردستان سەرکردە و کەسایەتیەکی دیار بوە، لە کۆتایی (2006)یشدا هاوشانی ڕەوانشاد #نەوشیروان مستەفا# لە بەرەی ڕیفۆرمی سیاسیی بوە. هەروەک لە دروستبونی یەکەمین ئەزمونی ئۆپۆزسیۆنی سیاسیی لە هەرێمی کوردستان یەکێک لە دامەزرێنەرانی بزوتنەوەی گۆڕان و بەدرێژایی یٔەو ماوەیەی کە کاری لەناو بزوتنەوەکەدا کردوە وەک سەرکردەیەکی دیار بەوپەڕی تواناوە کاری بۆ سەرخستنی پەیامی سیاسیی و بەهێزکردنی بزوتنەوەکە کردوە.
بزوتنەوەی گۆڕان
10ی 11ی 2020

دەزگای پێوەندییە گشتییەکانی حیزبی دێموکراتی کوردستانی ئێران بەبۆنەی کۆچی دوایی #قادر حاجی عەلی# تێکۆشەری دێرینی #بزووتنەوەی گۆڕان# پەیامێکی هاوخەمی بۆ سەرکردایەتیی ئەو بزووتنەوەیە نارد.
دەقی پەیامەکە بەم چەشنەیە:
بەڕێز: خانەی ڕاپەراندنی بزووتنەوەی گۆڕان
وێڕای سڵاو و ڕێزمان
بەڕێزان!
بەداخێکی گرانەوە هەواڵی کۆچی دوایی تێکۆشەری دێرینی گەلەکەمان قادر حاجی عەلی کەسایەتیی سیاسی و ناسراوی بزووتنەوەکەتانمان پێ گەیشت.
بەو بۆنەوە لەلایەن حیزبی دێموکراتی کوردستانی ئێرانەوە هاودەردی و سەرەخۆشیی خۆمان لە بنەماڵەی نیشتمانپەروەری و هەموو سەرکردایەتیی بزووتنەوەی گۆڕان و جەماوەری بزووتنەوەکەتان ڕادەگەیەنین و خۆمان بە شەریکی خەم و پەژارەتان لەم ڕووداوە ناخۆشەدا دەزانین و سڵاوی ئەمەگناسی و وەفاداریمان بۆ گیانی پاکی ئەم ڕۆڵە خەباتگێڕ و نیشتمانپەروەرەی گەلەکەمان دەنێرین.
ڕۆحی شاد بێ
حیزبی دێموکراتی کوردستانی ئێران
دەزگای پێوەندییە گشتییەکان
#محەمەد نەزیف قادری#
[1]

قادر حاجی عەلی، لە ساڵی 1955 لە #سلێمانی# لەدایکبووە و کۆلێژی جیۆلۆجی تەواوکردووە، ساڵی 1980 چووەتە شاخ و بووەتە پێشمەرگە، لە تەمەنی 28 ساڵی بووەتە ئەندامی سەرکردایەتی کۆمەڵەی ڕەنجەدەرانی کوردستان، ساڵی 1994 دەزگای زانیاریی یەکێتی دامەزراندووە. ئەندامی سەرکردایەتی و مەکتەبی سیاسیی یەکێتی بووە. ساڵانی 1998 بۆ 2000 کارگێڕی مەکتەبی سیاسیی یەکێتی بووە.
لە ساڵی 2009 لەگەڵ ژمارەیەک سەرکردەی دیکە لە جیابوونەوەیان لە یەکێتی ڕاگەیاند و #بزووتنەوەی گۆڕان#یان دامەزراند. دوای کۆچی دوایی #نەوشیروان مستەفا# بەهۆی ناکۆکی دەستلەکارکێشانەوەی خۆی لە بزووتنەوەی گۆڕان ڕاگەیاند.
قادری حاجی عەلی، دوو جار هاوسەرگیریی کردووە و خاوەنی سێ منداڵە. لە 15-10-2020 تووشی ڤایرۆسی کۆرۆنا بوو، دوای 27 ڕۆژ مانەوەی لە نەخۆشخانە بەرەبەیانی ڕۆژی سێشەممە ڕێکەوتی 10-11-2020 لە یەکێک لە نەخۆشخانەکانی سلێمانی کۆچی دوایی کرد. [1]

کۆنفڕانسی کۆمەڵە