ناو: فاتیح
نازناو: چاوە
ناوی باوک: شێخولئیسلامی
شوێنی لەدایکبوون: شاری #مەریوان#
$ژیاننامە$
فاتێح شێخەلئیسلامی ناسراو بە چاوە یەکێک لە شاعیرانی پێشەنگی ڕۆژهەڵاتی کوردستان بوو کە لەگەڵ #عەلی حەسەنیانی# (هاوار) و #سوارە ئێلخانیزادە# بە سێ کوچکەی نوێبوونەوەی شیعر لە ڕۆژهەڵاتی کوردستان دێنە ئەژمار. چاوە لەدایکبووی مەریوانە و لە دەیەی 60دا بە مەبەستی خوێندن دەچێتە تاران. لەوێ لەگەڵ خوێندکاران و چالاکی کورد ئاشنا دەبێت و دەست دەکات بە نووسینی شیعر. پاش ماوەیەک چاوە و هاوار و سوارە ئەڵقەیەک پێک دەهێنن و بەشێوەی جددی سەرقاڵی نووسین و چالاکیی ڕۆشنبیری دەبن. عەلی حەسەنیانی لە پێشەکی کۆمەڵە شێعری گوناهدا دەڵێ یەکەم شیعری نوێی ڕۆژهەڵاتی کوردستان من نووسیم و لەدوای من چاوە دووهەم کەس بوو. دواتر سوارە بە نووسینی شیعری بەناوبانگی شار سێهەم کەس بوو کە لەم بەشەی کورستان شیعری نوێی نووسی.
ئەم ئەڵقە ڕۆشنبیرییە پاش ماوەیەک لەیەک دادەبڕێن و لەڕاستیدا سێ چارەنووسی جیاوازیان دەبێ. هاوار و چاوە بەچڕی دەڕۆنە ناو گۆڕەپانی سیاسەتەوە، بەڵام سوارە گۆڕەپانی فەرهەنگ و ئەدەب جێناهێڵێت و تا ئەو کاتەی جوانەمەرگ دەبێ خۆی بە نووسین و هەروەها کار لە ڕادیۆی کوردی تاران سەرقاڵ دەکا و دەقی زۆر ناوازە بەرهەم دەهێنێت.
چاوە ئەگەرچی زۆر زوو واز لە ئەدەبیات دەهێنێت، بەڵام هەر لەو ماوە کوورتەدا نیشان دەدا کە شاعیرێکی لێهاتووە و ئەمەشی بە نووسینی چەندین شیعر سەلماندووە. لەناو ئەم شیعرانەدا شێعری شەوە یەکێک لە باشترین ئەزموونە نوێیەکانی بواری شیعرە لە دەیەی چل و پەنجادا. ئەم شیعرە خاوەنی فۆرم و پێکهاتە و هەروەها ناوەرۆکێکی نوێیە. کۆی شیعرەکانی ئەم شاعیرە لەلایەن عەزیز ناسری، شاعیر و نووسەری ڕۆژهەڵاتییەوە کۆکراوەتەوە و بڕیارە لە دووتوێی پەڕتووکێکدا بڵاو بکرێتەوە.
[1]