ناڤ: جەلال ڕەحیمی مەلەکشان
ناسناڤ: جەلال مەلەکشا
ناڤێ بابێ: ئەحمەد
ناڤێ دایکێ: ئامینە
ڕۆژا ژ دایکبوونێ: #19-03-1951#
ڕۆژا مرنێ: #31-10-2020#
جهێ ژ دایکبوونێ: گوندێ مەلەکشان - باژارێ #سنە#
جهێ مرنێ: سنە - ڕۆژهەڵاتێ کوردستانێ
$ژیاننامە$
جەلال مەلەکشا هەلبەستڤانەکە ناودارێ کوردە، ل 19-03-1951 ل گوندێ #مەلەکشا#یا سەر ب باژارێ سنە یا ڕۆژهەڵاتێ کوردستانێ ژدایکبوویە. هەر ل ڤی باژێری خواندییە و هاتییە پەروەردە کرن. مەلەکشا ل بچویکاتیێ ڤە هۆگرێ دنیایا نڤێسین و هەلبەستێ بوویە. جەلال مەلەکشا؛ نڤێسەر، ڕەخنەگر، چالاکێ سیاسی و جڤاکی وەک مرۆڤەک ڕەوشەنبیر و ئاشتیخواز قەت نەشیا ل هەمبەری زوڵم و زۆرداریێ چاڤێن خوە بگریت، وی هەردەم ب هەست و پێنووسا خوە ل دژی داگیرکاری و نەدادپەروەریێ خەبات کرییە. هەر ژ بەر وێ یەکێ ژی گەلەک جاران تووشی سەر ئێشە و زیندانان بوویە. مەلەکشا یەک ژ بەرچاوترین و کاریگەرترین دەنگێن بزاڤا نویخوازا هەلبەستا ڕۆژهەڵاتێ کوردستانێ یە، وی ب هەردوو زمانێن کوردی و فارسی هەلبەست نڤێسینیە. دەسپێکێدا وی ب زمانێ فارسی هەلبەست، پەخشان و چیرۆک دنڤێسین و هەر ژ بەر هێز و شیانێن وی د نڤێسینێدا، زووی کاری ببیتە ئەندامێ «کانوونا نڤێسەرێن ئیران»ێ، بێی کو هیچ پەڕتووکەکە چاپکری هەبیت. پشتی ساڵا 1978 بڕیار ددەت ب زمانێ کوردی خەباتێ بکەت و د دەمەک گەلەک کێمدا سەرکەفتنەک مەزن ب دەست دئینیت. مەلەکشا بۆ ماوەیێ 14 ساڵان وەک نڤێسەر و ڕۆژنامەوان دبیتە ئەندامێ گۆڤارا «سروە» و ب ڕاستی ژی د وان ساڵاندا خزمەتەک مەزن د قادا پێشڤەبرنا زمان و ئەدەبا کوردی دکەت.
مەلەکشا ل نڤێسینا خوە یا فارسیدا ل بن باندۆر و کاریگەرییا نڤێسەرێن فارس وەک؛ نیما یووشج، ئەخەوان سالس و ئەحمەدێ شاملوو بوو. ئو د وێژەیا کوردیدا ل ژێر کاریگەریا قەلەمێ عەبدوڵڵا گۆران، لەتیف هەڵمەت، عەبدوڵڵا پەشێو و شێرکۆ بێکەسیدا بوو. مەلەکشا د دەسپێکێدا ئەندامێ «کانوونا نڤێسەرێن ئیران»ێ بوو و پاشێ دبیتە ئەندامێ دەستەیا نڤێسەرێن گۆڤارا سروە، کو ب سەرپەرشتیا هێمن موکریانی ل باژارێ ورمیێ دهاتە چاپ کرن. پشتی ڤەگەڕیانا وی بۆ باژارێ سنێ، ل ئەنیستیتۆیا زمانێ کوردی وەک مامۆستایێ زمانێ کوردی دەست ب کار دبیت. هەلبەستێن جەلال مەلەکشای هەتا نها بۆ چەندین زمانان هاتینە وەڕگێران، وەک فارسی، عەرەبی، ئینگلیزی، لیبیایی، سویدی. مەلەکشا د ژیانا خوەدا بەردەوام ڕوویبڕوویێ ئاستەنگی و گوشارێن سیاسی ژ لایێ دەسهەڵاتا ئیرانێ هاتییە، لێ چ جارا شەڕەفا پێنووسا خوە قوربانی نان و ئاو و دەسهەڵاتێ نەکرییە. جەلال مەلەکشا ژ وان هەلبەستڤانانە هەڤدەمی هەمی گوشار و زۆرداریا، حەتا داویا ژیانا خوە ل سەر ڕێبازا خوە یا نەتەوی مکوڕ و کۆک ماییە. ژ مەلەکشای دوو هەلبەست ب ناڤێ «هەتا لووتکە چەندی ماوە؟» و «داستانی دارە پیرە» پتر ناسکرینە کو د پەڕتووکا «زڕەی زەنجیری وشە دیلەکان»دا هاتینە چاپکرن. مەلەکشا ل 31-10-2020 ل باژارێ سنێ کۆچا داوی دکەت.
$بەرهەمێن وی:$
- زڕەی زنجیرەی وشە دیلەکان (کۆمەڵە هەلبەست)
- کارەسات (کۆمەڵە چیرۆک)
- کۆمە بەرهەما هەلبەستێن جەلال مەلەکشای (فارسی و کوردی)
$نمونەیەک ژ هەلبەستا جەلال مەلەکشا:$
«ئاواتێک
ئاخۆ دەبێ
ئەو ڕۆژە بێ
کاوەی کوڕم
جانتای سەفەر کاتە شانی
دەڵاڵانی بەر گاراژی شاری سنە
هاوار بکەن
سلێمانی... سلێمانی» [1]