نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ئاۋەڎانکەرڎەی
ئاۋەڎانکەرڎەو ھۆرامانی ۋاتا ئەۋەیاۋناو ھۆرامانی بە ڕادەی کەم بە سەردەمو ۋەڵۍ بارکەرڎەی دەگاکا، یان ۋەڵۍ جەنگو ئێران-ئێراقی، کە پەی نمۇنەی دەگێۋە پېسەو تەۋېڵۍ ھەژمارو خەڵکەکەیش نزیکەو یەرۍ (3) ھەزار یانۍ|خېزانۍ بۍ، چوار (4) فېرگۍ بنەڕەتیۍ؛ دۋۍ فېرگۍ بنەڕەتیۍ (کناچا) و دۋۍ فېرگۍ بنەڕەتیۍ (کوڕا)، کە ھامکات چە ھەر دۋە فېرگاکا کوڕاچەنە چە پۊلو دۋۍ تاکو پەنجی ( 2-5) بنەڕەتی کناچېچ تېکەڵۍ بېنۍ. ھەر پاسە فېرگاو مېیانی و ئاماڎەییش چنە بۍ و شارەۋانی و بنکەو تەلەفون و تەلەگراف و پۆست و ھەر پاسە ھەرمانگاو ئەلەکتریکی و ئاۋېش بۍ ...تد
ئەر ئېمە گەرەکما بۊ، بە درۊسی و ئاۋەزگیرانە ھۆرامان ئاۋەڎان بۊۋە و کەرمېۋە، مشیۊ گېڵمېۋە سەرو ئاۋەزی ھۆرامی، کە بەرھەمو ھەزاران ساڵۍ ژیۋای بېیەن چا ناوچەنە و خەڵکو ھۆرامانی بە ئەزمۇنگەریی ئا ژیرییەشە بەدەسئاۋرڎەن، کە باخداری و تەلارسازی و جۊیاری و ئاۋەڕۊ و ڕیکۋستەی کۊمەڵایەتیش پا جۊرە بۊ، کە ۋەڵتەر بېیەن.
- ئەۋەگېڵای پەی سەرو تەلارسازی ھۆرامانی کە چنی سرۇشتو ھۆرامانی گونجېیاتەرین جۊرو تەلارسازی ھەن، پا جۊرە کە ھەڵای چە ھۆرامانو بەشۊ ئێرانی شۊنەماش مەنېنە.
- ھاندای خەڵکی پەی ئەۋەگېڵای و درۊسۆکەرڎەی کەسایەتی ھۆرامی و شانازیکەرڎەی بە سرۇشتدۊسی و ئارامی و ئاشتەۋایی کۊمەڵایەتیی ھۆرامانی.
- بەرقەرارکەرڎەو ئاشتەۋایی کۊمەڵایەتیی و ئەۋەگېڵای پەی سەرو سرۇشتو وېڕېکۋزتەی کۊمەڵایەتیی ھۆرامەکا، کە بنەمای نادۆڵەتی و ئازایڎوازانەش بېیەن و جۊرېۋ بېیەن چە دێمۆکراسی ڕاسەۋانە|گەلی، ئا جۊرە کە یۆنانی کۆنەنە باۋبېیەن و بە شاری ئازاڎ | دەگای ئازاڎە ئەژناسیان.
- بینای و دلېنەبەرڎەی ئا ڕایا کە داگیرکەرا پەی مەرامی سەربازی و وەڵامۆدای بە پەنەۋازییەکا جەنگو ئێران-ئێراقی درۊسۍ کەرڎېنۍ و ئەرەنیایۆ ئا باخا، کە مەڵامەتو ئا ڕایاۋە ۋېرانۍ بېیېنۍ و وجارای زېیانو ئا گرڎە ساڵا، کە باخەکېشا کریێنۍ بە ڕاو ئۆتومەبیلی.
- ڕاگېری چە ھۊرکەڼەی بیرەئاۋۍ قۇڵۍ، کە بۊ بە مەڵامەتو کەمکەرڎەو ئاۋۊ چېرو زەمینۍ و وشک بېیەو باخو ھامسا ھەژارەکا یان درەختە وېڕسەکا.
- نېیای درەختە وېڕستەکا پېسەو نەرەی و ۋەنۍ و کەکەۋۍ و بلچۍ و سماقۍ و براڵۇوۍ و مۊرد و سنۆبەر و .... کە ھەم بەرەکەشا دەرامەت ھەن پەی خەڵکی و ھەم خاکو کەشەکا پارېزنا و ھەم چە لافاۋی و ھەرەسۍ ۋەرگېرا و ھەم با بە مەڵامەتو پاکی ھەۋای و بارگاۋی بېیەو ھۆرەکا و زېیاڎکەرڎەو ۋارانی و ھەم ھەمیشە سۆزمەنەی کەشەکا.
- گرنگیدای بە کەلسازیی ھامچەرخی، پەی پارېزنای تەڵانو باخەکا و کەمۆکەرڎەی قورسایی باخداری بە بەکاربەرڎەی تۊڕۍ تەلېنۍ و قسڵی، کە بە تەڕبېیەیش و ساڵ بە ساڵ پتەوتەر بۊ.
- زانستیکەرڎەو ئاۋدارای و پەنابەرڎەی پەی کۊکەدەو زېیاڎەو نۆباۋی، پەی کاتو کەم ئامۋی بە درۊسکەرڎەی حۊزو ئاۋۍ و ھەر پاسە ھەمبارکەرڎەو ۋاراناۋۍ.
- تەرخانکەرڎەو فېرگای تایبەتی چە بارەو کشتکاریی پەی باخەۋانەکا و ڕانمایی چنی زېیاڎکەرڎەی بەرو درەختا و ھەر پاسە پېۋەڼکەرڎەی و مېۋداری|ڕەزداری بە جۊرو بەرزۆکەرڎەی و ڕاس مدرنای درەختو مېۋۍ و ھۊرپاتەریش و ڕاسازی مېیانو مېۋەکانە پەی ئاسان گلېرۆکەرڎەی ھەنگۊرەکۍ.
- وازئاۋرڎەی و دۇرۆکۆتەی چە تۊمە دەسکاریکریاکا، ھەر پاسە بەکارنەبەرڎەو پەینۍ کیمیاوییۍ.
- پەرەدای بە نېیای درەختو تفەزرۍ پەی وێکەرڎەی کرمۍ ھۆرشمینۍ، کە ھۆرامان پەی ئانەیە سازگارا و دەرامەتېۋی فرەش ھەن.
- زیڼۆکەرڎەی و پەرەدای بە کېیارۍ دێمیۍ و بەکاربەرڎەی لاسەکا و کەشەکا پەی کشتکاریی.
- درۊسکەرڎەی بانکو کۊمەککەرڎەی کشتکاریی و باخداریی و بەخشای قەرزی بەبۍ سۇڎ.
- زیڼۆکەرڎەی و پەرەدای بە ھەرەوەزیی کۊمەڵایەتی مېیانو باخدارا و ھیتیارانە.
- دەسەبەرکەرڎەی ئامرازۍ کشتکاریۍ و باخداریۍ گونجیێ، کە چنی بەرزایی و سەختی باخەکا ھۆرامانی گونجېیا.
- پەشتیۋانیکەرڎەی خەڵکی پەی باخداریی و ئەۋەکەرڎەی یانەی و ئاۋەڎانکەرڎەی دەگاکا، بە ڕۊشنگەری و ھەر پاسە بە کۊمەک و پەشتیۋانی ماددی چە خەزینەو دەرامەتو کۊمەڵۍ.
- ..... تد.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]