ل هژمارا 3082 یا رۆژا 12 – 1 – 2022 یا رۆژناما ( ئەڤرۆ ) من گۆتارەکا رەخنەیی دیت ژ نڤیسینا رەخنەگرەکێ گەنج ( شیان کانیسارکی ) ل دۆر پەرتووکا من ( هندەک ژ دیتنێت نالبەندی ل دهۆکێ ) . ئەڤەژی گەنگەشەیەکا کورتە د گەل نڤیسەری.
ل بەراهیێ ئەز کەیفخوەش دبم دەمێ گوتارێت رەخنەیی یێت ئەدەبی ل سەر بەرپەرێت رۆژنامە و گۆڤاران دبینم, چنکی ئەدەب بتنێ ب رەخنەیێ پێش د کەڤت. ڤێ دووماهیێ ئەز هندەک گوتارێت رەخنەیێ ل دۆر کورتە چیرۆک و رۆمانان ل سەر بەرپەرێت رۆژنامەیا ( ئەڤرۆ ) دبینم و د خوینم وپێ کەیفخوەش دبم, هەر وەسا دبینم کو رەخنە ل دەڤەرا مە هێدی هێدی یا ژ کەڤلوژانکێ دوژمنکاریێ و شکاندنا ئێکودو دەردکەفت وئاوایەکێ نوو ب خوە ڤە دگرت, ئه و ژی هزروبیرێت جودا و ئازاد و سەربەستن, دوور ژ شکاندنا ئێکودو , ئانکو رەخنەیا مە پێنگاڤەکێ بەرەڤ پێش دچت.
رەخنەیا مە یا ئەدەبی ل سالێت حەفتێ و هەشتێیان دوژمنکاری بوو , ئەگەر تە ب نەرمی ژی رەخنە ل هۆزانەکێ یان گۆتارەکێ گرتبا, رەخنەلێگرتی دا بابەتێ وێ هۆزانێ یان گۆتاری ژ بیر کت, کا رەخنەیا وی درستە یان شاشە, بەلکو دا بەزیتە رابووریێ رەخنەگری, دا ل کێماتیێت کەسایەتیا رەخنە گری گەڕت , ڤێجا چ کێماسیێت کەسایەتی هەبن, ئالیێ سیاسی بت یان جڤاکی یان پەروەردەیی بت، هەتا نێزیک بوو بگەهیتە سەرەدانا فەرمانگەهێت ئاڤێ و کارەبێ بکت و تەماشە بکت کا رەخنەگری پارێت ئاڤ و کارەبا داینە یان نە و هتد … دا گەلەک جاران ژی (واستا) و هاریکارا ب خوە پەیدا کت دا هاری وی بکن بۆ شکاندنا هەڤالێ خوە یێ رەخنەگر وبابەتێ رەخنەگرتنا ئەدەبی ژ بیر دکر, گەلەک ژ ڤان نموونەیان هەبوون وڤێرە نە جهێ رێزکرنا نموونەیانە . لەوما رەخنا ئەدەبی ل دەڤەرا مە هەر د جه دا ما و پێشڤە نەچوو .
دوبارە د بێژم کەیفخوەشم ب رەخنەگرێت گەنج وئەز رەخنەیێت وان دخوینم لێ؛ تشتێ ئەز تێبینی دکم, ئەڤ رەخنەگرێت گەنج گەلەک ب لەزن، کێم ژێدەران دخوینن و کێم دویڤچوون و لێگەریانن.
دەمێ من پەرتووکا ( هندەک ژ دیتنێت نالبەندی ل دهۆکێ ) چاپ کری, باش ل بیرا من بوو کا دێ ناڤ و نیشانێت پەرتووکێ چەوا دانم، ئانکو بەحسێ نالبەندی یە و پەیوەندیا وی د گەل دهۆکێ وهندەک نموونەیێت هۆزانێت وی ل دهۆکێ, نابت وەکی کارەکێ زانستی ئەز ژ چارچۆڤەیێ بابەتێ خوە دەربکەڤم لێ؛ رەخنەگری ل جهەکی یێ گۆتی ” دەمێ پەرتووکێ دبینم و دخوینم بێ هیڤی دبم کو خودانێ مەزنترین دیوان یێ مای د ناڤبەرا 50 لاپەران دا و نزانیت دێ چ کەت !” . وەسا دیار دبت کو رەخنەگری د ڤیا ئەز ژ بابەتێ خوە دەربکەڤم و هەر پێنج بەرگێن دیوانێ بینمە د ناڤ گۆتارا خوەدا!
برایێ رەخنەگر, ژ ئالیێ زانستی ڤە, دەمێ تو ناڤونیشانەکێ بۆ پەرتووکا خوە ددانی دڤێت تو ژ بابەتێ پەرتووکێ دەرنەکەڤی. بابەتێ پەرتووکا من ژی کو ل سەر نالبەندی و دهۆکێ یە, دو رێک هەبوون؛ یان د ڤیا هەر جارەکا نالبەندی ناڤێ دهۆکێ د هۆزانا خوەدا ئینابا من کربا د پەرتووکێ دا, ئه و ژی دا بیتە جۆرەکێ ئەرشیفکرنێ, رێکا دی ژی ئەوە؛ هندەک هۆزانێت وی یێت ناڤدار وەرگرم دەمێ ل دهۆکێ, ول دووڤ شیانێت خوە ڤەکۆلینێ ل سەر بکم, من ژی رێکا دوێ هەلبژارت, دا پەرتووکا خوە ژ ئەرشیفکرنێ دوور بێخم و رێکا ڤەکۆلینێ بگرم وکەرەستەیێ بابەتی ژ چارچۆڤەیێ خوە دەرنەکەڤت. هەر وەسا هەڤالێ مە یێ نڤیسەر “ئیسماعیل بادی” دەمێ پشتی هینگی پەرتووکەک ل دۆر نالبەندی و زاخۆ چاپکری, هەر وەکر و ژ بابەتێ خوە دەرنەکەفت. کو بابەتێ نالبەندی و زاخۆ بوو, گوه نەدا هژمارا بەرپەرێت پەرتووکێ .
ژ ئالیەکێ دی ڤە, برایێ رەخنەگر, گرنگیێ ب ژێدەران نادت, من دیت وی تەماشەی وان ژێدەران نەکریە یێت سالێت حەفتیێ و هەشتێیان یێت ل سەر هۆزانڤان “ئەحمەدێ نالبەند”ی دەرکەفتین , ئه و ژی هەمی هەڤالێ مە سەیدا “ئیسماعیل بادی” وێنەیێ بەرگێت وان یێت د هەردو گۆتارێت خوە دا بەلاڤکرین, وەک بەرسڤەکا رەخنەیی ل سەر گۆتارا رەخنەگرێ گەنج کاک ( شیان ), لەوما ئەز وی بابەتی دووبارە ناکەمە ڤە چنکی کاک ( ئیسماعیل )ی ب جوانی یێ ل سەر نڤیسی لێ؛ دەرباری ژێدەران ب تنێ دێ بێژم: کاک ( شیان )ی ناڤێ ئێک ژێدەرێ کەڤن یێ ئینای, ئه و ژی ب شاشی یێ نڤیسی, مەبەست پێ پەرتووکا سەیدایێ ( سادق بەهائەددین )ە, کو ناڤێ پەرتووکا وی ( هۆزانڤانێت کورد)ە, لێ ژ بەر خەمساریا کەکێ ( شیان ), وی ناڤێ پەرتووکێ یێ کریە ( هۆزانڤانێت بادینان )! , ئەگەر سوباهی قوتابیەکێ ماجستێرێ یان دکتۆرایێ ڤەکۆلینەکێ ل سەر ژیان و بەرهەمێ ( سادق بەهائەددین ) بنڤیست, دێ چەند ل پەرتووکا ( هۆزانڤانێت بادینان ) گەڕت و نابینت , چنکی تە ناڤ ب شاشی یێ نڤیسی! نە هەر ئەڤە بەلکو دەمێ رەخنەگری لیستا ژێدەرێت خوە ژی نڤیسی, ناڤێ هەمان پەرتووکێ یێ نڤیسی ( هۆزانڤانێن کورد ) ئه و ژی شاشیە, چنکی ل هەمی بەرهەمێت ( سادق بەهائەددین ) بنێرە , وی شێوەیێ کۆمکرنێ هەر ( ێت ) یێ نڤیسی نەکو ( ێن ) هەر وەکی کاک ( شیان ) ی شێواندی , هەر وەسا ناڤێ پەرتووکا من ژی یێ شێواندی ( هندەک ژ دیتنێت ….) یێ کریە ( هندەک ژ دیتنێن ….) وی ئه و ماف نینە ناڤێ پەرتووکان بگهۆڕت .
ئەحمەد نالبەند ل دو قۆناغێت ژیانا خوە ل دهۆکێ بوو , ل سالێت دەستپێکا ژیانا خوە بۆ فەقیاتیێ ئه و بخوە دبێژت ( من دو سالا ل دهۆکێ دخواند ), ل ددووڤ وان پسیارێت من کرین, ئه و ل مزگەفتا مەزن یا دهۆکێ فەقی بوو لێ؛ جارا دوێ پشتی کارەساتێت ژیانێ ب سەرێ وی هاتین وژنێت وی مرین و بێ خودان مایی, ئه و پشتی سالا 1955 ێ یێ هاتیە دهۆکێ, وێ جارێ ل مزگەفتا (حەجی مستەفای ) ئەوا د کەڤیتە بەرامبەر مەزارێ دهۆکێ جهوار بوو. شاعێر و زانایێ ئایینی رەحمەتی( مەلا حەمید سلێڤانەیی) گۆتە من : ل سالا 1955 ێ ئەم ل مزگەفتا زاخۆ فەقی بووین, فەق ئەحمەدێ نالبەند بۆ دەمەکێ ل زاخۆ ل نک مە ما, هەر وەسا گۆت : نالبەند هەر فەقی بوو ئانکو (ئیجازە) وەرنەگرتبوو , بەلێ شاعێر بوو وبەردەوام شیعر د نڤیسین .
پشتی هینگی یێ هاتیە دهۆکێ ل مزگەفتا حەجی مستەفای مایی لێ؛ یا دیار نینە چەند سالا مایە ل دهۆکێ هەر وەکی ب درێژی من د پەرتووکا خوەدا نڤیسی .
د. مەسعوود کتانی یێ رەحمەتی, بەری وەغەرا دووماهیکێ بکت, ل کلینیکا وی یا نۆژداریا گیای لدهۆکێ من سەرەدانا وی کر, گۆت نالبەندی (ئیجازا) “دوازدە علمیێ” وەرنەگرتبوو , گەهشتبوو پەرتووکا ( جامی ) و راوەستابوو. لەوما چو جاران ل مزگەفتێت مەزن ل باژێران نەبوویە ئیمام, چنکی یێ “دوازدە عیلم” نەبوو , بتنێ ماف هەبوو ل گوندا ئیمام بت .
وێنەیێ نالبەندی ب مەزنی یێ ل سەر بەرگێ پەرتووکا من لێ؛ کەکێ شیان دبێژت: تە چو وێنەیێت نالبەندی بەلاڤ نەکرینە. وێنەیێ ئیمامێ مزگەفتا حەجی مستەفای وسەیدایێ نالبەندی ( رەحمەتی مەلا عبدالهادی مفتی ) من یێ بەلاڤکری ومن زەحمەت دیت هەتا ب دەست من کەفتی، هەر وەسا وێنەیێ مزگەفتێ ب خوە و وێنەیێ گەرا چەمکێ عەلی گویزی, کو هەمیان پەیوەندی یا ب بابەتێ نالبەندی ڤە هەی, کەکێ (شیان) دبێژت : وان وێنەیان چو پەیوەندی ب بابەتێ نالبەندی ڤە هەیە؟
گەلەک بەرسڤێت رەخنەگرێ گەنج کەکێ ( شیان ), هەڤالێ مە کاک ( ئیسماعیل بادی ) یێت داین, لەوما ئەز دوبارە ناکم لێ؛ ل دووماهیکێ کەکێ ( شیان ) بەحسێ شاشی یێت رێزمانی د پەرتووکا من دا یێ کری و ئاماژە ب چو نموونەیان نەکریە, ئەز داخوازێ ژێ دکم هندەک نموونەیێت وان شاشیا بۆ مە بنڤیست دێ جهێ سوپاسیێ بت، ژبەرکو د هەمی نڤیسینێت خوەدا ئەز گەلەک گرنگیێ ب دارشتنا زمانی ددەم .[1]