یەکێک لە سیما جوانەکانی هەر کۆمەڵگەیەکی دیموکراتی و پێشکەوتوو، بوونی ئازادی ڕادەربڕین و ئه و چالاکیە مەدەنیانەن کە بۆ داواکردنی مافی چین و توێژە جیاوازەکانی کۆمەڵگە ئەنجام دەد ڕێن، بیگومان خۆپیشاندانیش، هەم شێوەیەکە لە ئازادی ڕادەبرین و هەمیش چالاکیەکی مەدەنیانەیە بۆ داواکردنی مافەکانی هاووڵاتیان. هەربۆیە ئێمە وەک #پارتی دیموکراتی کوردستان# جیا لەوەی بڕوای تەواومان بە مافی خۆپیشاندانی مەدەنیانە و هێمنانە هەیە، لە هەمانکاتدا وەک پڕنسیپی سیاسیشمان پشتگیری و پشتیوانی لێدەکەین و، بە دیدی ئێمە خۆپیشاندانی هاووڵاتیان لە چوارچێوەی یاسادا، جۆرێکە لە بەشداری ڕاستەوخۆی هاووڵاتیان لە پرۆسەی سیاسی وڵات و، ئامانج لە ئەنجامدانیشی هێنانەکایەی دیالۆگێکی ڕاستەوخۆی نێوان حکومەت و هاووڵاتیانە، بۆ ئەوەی پێکەوە ڕێگەیەکی دروست بۆ چارەسەرکردنی کێشە و گرفتەکان و هێنانەدی خواست و داواکاری سەرجەم چین و توێژ و پێکهاتەکانی کۆمەڵگە بدۆزینەوه.
دیارە باردۆخی ئێستای کوردستان هاوشێوەی بەشێکی زۆری وڵاتانی جیهان، لەبەردەم چەند قەیرانێکی تەندروستیی و ئابووریدایە، ئەم قەیرانانەش ڕاستەوخۆ کاریگەریان لەسەر سەلامەتی و بژێوی ژیانی هاووڵاتیان کردووە، بۆیە هاووڵاتیان وەکو چۆن ئەرکی سەرشانیانە هاوکار و پاڵپشتی حکومەتی خۆیان بن، مافی خۆشیانە داوا ڕەوا کانیان بگەیەننە حکومەت و، لەبەرامبەریشدا ئەرکی سەرشانی دامەزراوەکانی وڵاتیشە کە گوێ لە خواست و داوای هاووڵاتیان بگرێت و، بەپێی ئه و هەلومەرجەی وڵاتی پێدا تێپەردەبێت، چارەسەری گونجاویان بۆ بدۆزرێتەوە.
بەڵام ئەوەی جێگەی داخ و نیگەرانییە، کاتێک ئەم خۆپیشاندانانە ئەنجام دەدرێن، هەندێک خەڵک و لایەن، خۆیان دەخزێننە ناو خۆپیشاندەران و، ژینگەی مەدەنی خۆپیشاندانەکە بۆ مەرامی تایبەتی خۆیان بەکاردەهێنن و، ئاراستەی خۆپیشاندانەکە بەره و توندوتیژی و هەڵکوتانە سەر دامودەزگا حکومی و حزبیەکان دەگۆڕن، بەمەش لەلایەک جۆرێک لە ناسەقامگیری دروست دەکەن و ئاشتی کۆمەڵایەتی تەواوی خەڵکی کوردستان دەخەنە مەترسیەوه و، لەلایەکی دیکەش ئامانجی خۆپیشاندانەکە لەناو ئه و پشێوی و ئاژاوەیەدا وون دەبێت و، باردۆخەکە بەره و ئاراستەیەک دەبەن کە تێگەیشتنێکی هاوبەش لەنێوان دامودەزگاکانی حکومەت و هیز و لایەنە سیاسییەکان و خەڵک دروست نەبێت، کە ئەمەش کۆسپ لەبەردەم هەنگاوەکانی پێکەوەیی و دۆزینەوەی چارەسەرێکی گونجاو بۆ داواکاریەکانی هاووڵاتیان دروستدەکات.
لێرەدا جێگەی خۆیەتی ڕاشکاوانە جەخت لەسەر ئەوە بکەینەوە، کە ئه و کەس و لایەنانەی خۆیان دەخزێنە ناو خۆپیشاندانی ڕەوا و مەدەنیانەی هاووڵاتیان و، پاشان لە ژێر پەردەی خۆپیشانداندا، هەڵدەکوتنە سەر نەخۆشخانە و فەرمانگە حکومیەکان و بارەگای هێز و لایەنە سیاسیەکان و، بەرد بارانیان دەکەن و دەیانسووتێنن، ئەوانە هەرگیز وەک خۆپیشاندەر مامەڵەیان لەگەڵدا ناکرێت و دەبێت بەیاسا سنووریان بۆ دابنرێت و، لە هەمانکاتدا دەبێت بە یاسا خۆپیشاندان و خۆپیشاندەرانیش بپارێزرێن و، هەموو ڕیوشوێنیکی یاسایی بگیرێتە بەر بۆ ئەوەی ئاراستەی ئاشتیانە و مەدەنیانەی خۆپیشاندانی هاووڵاتیان بە لاڕێدا نەبردرێت، کە ئەم بەلارێدابردنە غەدرێکی گەورەیە لە داواکاری ئه و هاووڵاتیانە دەکرێت کە لەپێناوی مافەکانی خۆیان خۆپیشاندان ئەنجام دەدەن و، هاوکات پەرەپێدانی فەرهەنگێکی نامۆشە لەناو کۆمەڵگەکەماندا.
لە کۆتاییدا، جارێکی دیکە دووپاتی دەکەینەوه، کە پارتی دیموکراتی کوردستان، پشتیوانی مافە ڕەواکانی خەڵکی کوردستانە و هەموو هەوڵی خۆشی خستۆتەگەڕ بۆ ئەوەی لەگەڵ لایەنە سیاسییە دڵسۆزەکانی دیکە، پاڵپشتی حکومەتی هەرێمی کوردستان بکرێت بۆ چارەسەرکردنی ئه و کێشه و گرفتانەی کە بوونە هۆکاری ئەم قەیرانانە و، ئه و بارگ#ڕانیە#ی لەسەر شانی هاووڵاتیانی خۆشەویستە سووک بکرێت کە ئێستا بەهۆی ئەم باردۆخەوە گوزەرانی قوڕس کردوون، هاوکات پشتیوانی هەموو ئه و هەوڵە یاسایانەش دەکەین کە سنورێک لە چوارچێوەی یاسادا بۆ سەرجەم ئه و کەس و لایەنە ئاژاوەگێرانە دادەنێت کە ژینگەی ئاشتی و مەدەنیانەی خۆپیشاندانەکان بەره و ئاراستەی توندوتیژی و ناسەقامگیری سیاسی و تێکدانی ئاشتی کۆمەڵایەتی خەڵکی کوردستان دەبەن.
مەکتەبی سیاسی
پارتی دیموکراتی کوردستان
#24-08-2020#