ناوی فایق کوڕی عەبدوڵڵابەگی کوڕی کاکەحەمەی کوڕی ئەلیاسەقۆجەیه. بنچینەی بنەماڵەیان لە قەڵاچوالانەوە هاتووەتە #سلێمانی# و خۆی لە 1905دا لە #سیتەک# هاتووەتە ژیانەوه، ئەو دێیەش بیست کیلۆمەترەیەک لە باکووری ڕۆژەڵاتی سلێمانییەوە دوورە و ئەو ئەوساتەش #سیتەک# سەنتەری #شارباژێڕ# بووه. عەبدوڵڵا بەگی باوکی لەوێ تابوور ئاغاسی بووه. لە دایکیشیەوە لە بنەماڵەی ئاغەلەرەکانی سلێمانییه.
ساڵی یەکەم و دووەمی تەمەنی لە سیتەک بەسەربردووە و، پاشان ماڵیان هاتووەتەوە سلێمانی و لە تەمەنی سێ ساڵایدا ئاوەڵەی دەرداوه. هەر بەمنداڵی باوکی لەحوجرەی فەقێ خستوویەتییە بەر خوێندن.
لە 1911دا باوکی بەئیشی میری نێرراوەبۆ خانەقی و لەوێوە بۆ بەغدا. لە بەغداوەئەنێرێ بە دوای ماڵ و منداڵەکەیدا و ئەیانباتەئەوێ. پاش ساڵێک خۆی چووەبۆ تورکیا و ئەوانی لە بەغدا بەجێهێشتووه. ئیتر فایەق باوکی نەدیوەتەوه. هەر لەو ماوەیەدا حەمەسەعیدی برا گەورەی لە ئاوی دەجلەدا ئەخنکێ و دوابە دوای ئەو دایکیشی کۆچی دوایی کردووە و فایق دەکەوێتەلای خاڵی. ئەویش پاش چەند مانگێک ئەمرێ و فایق و تاهیری برای بچووکی بەبێکەسی دەمێننەوه.
ئەو ساتەی شەڕی یەکەمی جیهان هەڵدەگیرسێت، ڕێی هاتوچۆی نێوان بەغدا و سلێمانی دەگیرێت. حاجی ئەمینی کاکەحەمەی مامی لە سلێمانییەوە ئەنێرێتە لای حاجی عەلی ئاغا، ئەوەی لە بەغدا بووه، کە چاودێری فایق و براکەی بکات و هەر میراتێکیان لە باوک و دایکیانەوە بۆ مابێتەوەبۆیان خەرج بکا. ئەویش ئەیانداتە دەستی حەبەخان ناوێک، ئەوەی خێزانی ئەفسەرێکی خەڵکی سلێمانی بووە و لە بەغدا دانیشتووه.=KTML_Photo_Begin=https://www.kurdipedia.org/files/relatedfiles/2008/193/0002.JPG=KTML_Photo_Alt=فایەق بێکەس=KTML_Style=width:20%;height:20%;float:right;=KTML_Photo_Target_Link=https://www.kurdipedia.org/files/relatedfiles/2008/193/0002.JPG=KTML_Photo_End=
ژنەکەش مەردانە ئەیانخاتە ژێر باڵی بەزەییی خۆی و وردەوردە پێیشیان ئەخوێنێ. دوو سێ ساڵێک بەم جۆرە ژیان بەسەردەبەن. لە 1917دا کەساسییەکی زۆریان تووش دەبێت. لە 1918دا حەبەخان ئەیانباتەوە بۆ سلێمانی بۆ لای حاجی ئەمینی مامیان.
فایق لە سلێمانی دەخرێتە قوتابخانە و لە پۆلی سێیەمدا وەرئەگیرێ و تا ساڵی 1923 لەسەر خوێندن بەردەوام دەبێت.. هەموو ساڵێک بەیەکەم دەرئەچێ. لەو ساڵەدا لەسەر ئارەزووی مامی دەچێتە قوتابخانەی علمیە لە#کەرکووک#. بەڵام بۆی ڕێناکەوێ لەوێ بخوێنێ، دەچێتەبەغدا و ساڵی 1924-1925 لە دار العلوم بەسەرئەبا. لەوێش لە بەردەم بژێوی بژی و لە ساڵی 1926-1927دا دەگەڕێتەوە بۆ سلێمانی. لەو کاتەدا سلێمانی تەنیا پۆلی یەکەمی ناوەندیی تێدا بووه، ناچار تێی ئەچێ.
لەو ساڵانەدا تەنگوچەڵەمەی ژیان ناچاری دەکات دوکانێکی جگەرەچێتی بکاتەوه، بەڵام ئەمەش سەرناگرێت و دەستدەکات بەجگەرە و شقارتە فرۆشتنی دەستگێڕی و پاشان پەنا دەباتەبەر ئەشغاڵ و بەڕۆژانە لە ڕێگەی #عەربەت# کار دەکات و چەند مانگێک لەسەر ئەم کارە دەبێت..
لە 1928دا بۆ ماوەی چەند مانگێک لە#هەولێر# ژیاوه. لەو سەردەمەدا خوالێخۆشبوو قالەی ئایشەخان ئەندازیاری ئەشغاڵ بووە و سەرپەرشتی کردنەوەی ڕێگەی هەولێر-ڕەواندز-ڕایاتی کردووه. بێکەس دۆستی لەئەشغاڵ دامەزراندووە. هەر لەو ساڵەدا بێکەس دەبێت بە مامۆستای زانستی و لە1929دا ئەبیستێ باوکی لە مەرعەش لە تورکیا مردووه. لە ساڵی 1930دا بە هەر دەردی سەریەک بووە بە دوای میراتی باوکیا ئەچێ بۆ تورکیا، هەر لەو ساڵەدا بەنائومێدی دەگەڕێتەوه.
هەر لەو ساڵەدا بوو ڕاپەڕینەکەی شەشی ئەیلوول لە دژی هەڵبرژادنە ساختەکەی دەزگەی پادشایەتی ڕوویدا. بێکەس یەکێک بوو لەو نیشتمانپەروەرانەی سەرکردەی ئەو ڕاپەڕینەیان کرد و تێیدا برینداریش بوو.
لە ئەنجامی ئەو ڕۆڵەدا ئەیگرن و ئەیخەنە بەندیخانەوه. هەر لەسەر ئەم بەشداربوون و سەرکردەیییەی لەسەر کاریش لای دەبەن. هۆنراوە بەناوبانگەکەی ئەی وەتەن مەفتوونی تۆم...ی لەناو بەندینخانەدا نووسیوەتەوه.
ئەو ساتەی لەبەندینخانە دێتە دەرەوه، قوتابخانەیەک دەکاتەوە بۆ ئەوەی وانەی تێدا بڵێتەوەو پێی بژی. لە 1933دا میری وەردەگرێ بە مامۆستا و دەینێرێتە مۆرتکەی #بازیان# و پاشان دەینێرێتە #تەوێڵە#. لە هاوینی 1935دا لەگەڵ کۆمەڵە مامۆستایەک، لەوانەش یەکێکیان مامۆستا گۆرانی شاعیری بەناوبانگ بووه، بەشداری لەکۆرسێکدا کردووەلە بەغدا بۆ مامۆستایان ئامادەکراوه. بێکەس لەو سەردەمەدا مامۆستای قوتابخانەی سەرەتایی بازیان بووه.
لە ساڵی 1937دا لەوزەی میریدا نامێنێت. مامۆستایەکی نەترسی وەها لە سلێمانیدا هەبێت گیانی خەبات و کوردایەتی بڵاوبکاتەوه، دووری دەخاتەوە بۆ حیللە و پاش ساڵێک دەینێرێ بۆ عەماره. بەڵام بێکەس ڕازی نابێت بچێ و دەست لەئیشەکەی هەڵدەگرێت و دێتەوەسلێمانی. لەوێش قوتابخانەیەک دەکاتەوەتا 1941 وانەی تێدا دەڵێتەوه. ئەنجا ئەیکەنەوە بە مامۆستای قوتابخانەکانی میری و تا دوایی ساڵی 1948دا لە #قەرەداغ# و سلێمانی و #سورداش# و #هەڵەبجە# مامۆستا ئەبێ.
لە 1948-12-18دا بۆ یەگجاری سەر دەنێتەوه.
بێکەس جگە لە زمانی کوردی، عەرەبی و فارسی و تاڕادەیەک ئینگلیزیشی زانیوە. بەتایبەتیی لەعەرەبیدا دەسێکی باڵای هەبووه. هۆنراوەیەکی زۆری عەرەبی لەبەربووه. هەروەها بڵاوه، کە موعەللەقاتی سەبعە (المعلقات السبعة) ی بەتەواوەتی لەبەربووه.
بێکەس دووژنی هێناوە: یەکەمیان لە ساڵی 1935دا، بەڵام پاش ساڵێک بە نەخۆشی دەردەباریکە کۆچی دواییکردووە و مردنەکەی کارێکی زۆری کردۆتەسەر دەروونی بێکەس و وای لێکردووە ماوەیەک گۆشەگیری ببێت.
لەم ژنەی کچێک و لە ژنی دووەمی دوو کچ و کوڕێکی بووه. کوڕەکەشی شاعیری بەناوبانگ (#شێرکۆ بێکەس#) ه.[1]