بییەی نەتەوەیی کورڎی میانو فەلسەفە و سۆسیۆپۆلەتیکینە
هورئەوەگېڵنای و ئاماڎەکەرڎەی: ئەسعەد ڕەشید
بەشې چلهەمە
کاتێ مروڤ جە ژیوایشەنە پاڕەوی ئەچا یاسایا مەکەرۊن کە ئەقڵە یاسابەکارئاوەرەکەش دلې سەرچەمێ بەرینی و دەرەکینە وەرشگرتېنې، پەنەوازیش پانەی نمەبۊن ئەقڵە یاسادۊزەکەو دلېنەیش گەرم و گوڕ بکەرۊن. ئەقڵی یاسادۊز کاتێ پەنەواز مەبۊن کە ئەقڵە یاسابەکارئاوەرەکەو دلې مروڤی ئا یاسایا جابەجێ نەکەرۊن کە دلې سەرچەمە دەرەکیەکانە سەرچەمەشان گېرتەن، پەوکەی تەنیا ئا مروڤې کە ڕازیې نمەبان بە یاساکانو سەرچەمە دەرەکیەکا مەتاوان ڕا بە بییەی ئەقڵە یاسادۊزەکەو دلېنەو وېشان ببەران و سەرچەمێ دلېنەیی پەی یاساکانی دلې وېشانە بېزاوە.
ئا کەسېچە کە ئی ڕێ مەگېرانەوەر ئانېنې کە کەلتورە پەتی و ڕەهاکەو ئەقڵی جە ڕاو وېشاوە بە پروسەو بە ناوچەیی بییەیرە مەبەران و جە ڕاو چەنیبییەیە سرووشتییەکانو ئاڎیشاوە مەبۊن بە کەلتوورێ ناوچەیی. ئی نۊعە جە کەلتووری پاڕەوی ئەچا پروسەیە مەکەرۊن کە کەلتورێ ئەقڵی سەراپاگیر مەکەرۊن بە کەلتورێ ناوچەیی. ئی پروسەیچە بە تەمامی چەپەوانەو ئا پروسەو سەراپاگیرکەرڎەیەن کە گېڵنەر مەکەرۊش بە بنەمێوە پەی سەرهوردای ویرلې نەتەوەی.
ئایا کەلتورە پیشەییەکەو کۊمەڵگا پیشەسازییەکانی بەپاو ئا کەسا کە دلې ئا کۊمەڵگایانە مەژیوان، سەرچەمێ دەرەکین پەی بەخشای ئا یاساو سیستەمەی کە پېوەڼی ئاڎیشا چەنی ئامېرە پیشەییەکانی ڕېکمەوزۊن، یام سەرچەمێ دلېنەیین و بییەیش دلې ئەقڵو هەر تاکێنە هەن و تاکەکەس پەنەوازیش پانەی نییەن جبەرو وېشۆ وەرش بگېرۊن؟
گېڵنەر، هەرمانەکې وېشەنە بە وردی جوابو ئی پەرسې مەڎۊوەو پا سەرو ئانەی مەگېرۊرە کە کەلتوری پیشەیی کۊمەڵگا پیشەسازییەکا کەلتورێ دەرەکین و بە تەرزێ سەلبی جبەرو تاکەکانو دلې کۊمەڵگایۆ مەڎریۊ بە تاکەکا. بەرو تاکەکانیچ لاو ئاڎیۆ، ئا کۊمەڵگا ناوچەیې دلې مەرزی ڕامیاری دۆڵەتی نیەنې کە هەریۊشان خاوەنو کەلتورێ ناوچەیی وېشانې و بییەن بە ڕاگیر وەردەمو سەراپاگیرکەرڎەی ئا کەلتورە پیشەییەنە کە دەسەڵات گەرەکشەن سەراپاگیرش بکەرۊن، بەڵکوم ئا فېرگېنې کە جبەرو گرڎو کەلتورە ناوچەییەکاوە، فەزێوە کۊمەڵایەتی ناناوچەیی پەی کەلتورە پیشەییەکەو کۊمەڵگای پیشەسازی سازمەکەران و بە یاگێ فەرمی و جیاوازەرە جە یاگەکانو فاڕایۆ یاساکانو کەلتورە ناوچەییەکاوە یاساکانو کەلتورە پیشەییەکەی بەبې جیاوازی مەفاڕاوە پەی دلې تاکەکانو گرڎو ئا کۊمەڵگا ناوچەییا کە ئینێ دلېمەرزی ڕامیاری ئا دۆڵەتێنە. جە لاو ئاڎیۆ جیاوازی میانو کۊمەڵگای کشتوکاڵی و کۊمەڵگای پیشەسازی ئینا چانەینە کە یۊشان سەرچەمەو یاسا کەلتورییەکاش دلېنەیی بۊن و بییەیش دلې ئەقڵو گرڎو تاکەکانە بۊن و ئەوی تەرشان سەرچەمەو یاسا کەلتورییە دەرەکییەکەی بۊن و ئا کەلتورە بۊن کە جبەرو تاکەکانە بییەیش هەن. نەک هەر ئینە، بەڵکوم جیاوازییەکەیچ چانەینە نمەوینۊ کە یۊشانە کەلتورێ ئاکاری زاڵەن و چەوی تەرشانە کەلتورێ پیشەیی.
ئاڎ وەروئانەی تەنیا جە دیڎگاو کەلتورە پیشەییەکەیۆ پەی جیاوازی ئی دوە کۊمەڵگایە مەدوۊن، جیاوازی ئی دوە کەلتورەیە کوڵمەکەرۊوە پەی ئانەی کە دلې کۊمەڵگا کشتوکاڵییەکانە، کۊمەڵگا ناوچەییەکې دلې مەرزو ڕامیاری دۆڵەتی وەرپەرسېنې جە فاڕایۆ یاساکانو کەلتوری جە کەلتوری دەرەکی کۊمەڵگایۆ پەی دلې تاکەکانو وېشان. ئینەیچە ڕاگیرەن وەردەمو ئاڎینە دلې مەرزی ڕامیاری ئا دۆڵەتەینە فرە کەلتوری نەمەنۊ و تەنیا تاکە کەلتورێ بییەیش بۊن. بېجگە ئینەیچە فاڕایۆ یاسا کەلتورییەکا دلې ئا کۊمەڵگا ناوچەییانە تاکەکې دلې فەزای کۊمەڵایەتی کۊمەڵگا ناوچەییەکانە بەبې هیچ چەمداریێ و بە تەرزێ سرووشتی و کۊییانە یاساکانو ئا کەلتورە ناوچەییاشان پەی مەفاڕیۊوە و چېگەنە پېسە ئا درەختە کۊییا پاسېنې کە بەبې چەمداریکەرڎەی مروڤی گەشە مەکەران و بە ڕێوە سرووشتیە پارېزگاری جە نۊعیەتەکەو وېشان مەکەران. بەشێ جە کتېبو بییەی نەتەوەیی کورڎی میانو فەلسەفە و سۆسیۆپۆلەتیکینە، نویستەی عیرفان مستەفا، هۊرئەوەگېڵنای پەی سەرو زوانی هۆرامی: ئەسعەد ڕەشید.[1]