نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ئاژەڵ-دۊسیی و ئاژەڵ-پارېزنای
بەپاو ئانەیە کە ناوچەو ھۆرامانی یۊن چا ناوچا، کە ھەر زۇ خەڵکی چاگە نیشەجا بېیەن و ئاۋەدانش کەرڎەن و کولتۇری تایبەت و گونجېیاش چنی ژیۋارو ناوچەکەی پەڕەپنەدان و پەیڕەۋکەرڎەن، ھەر زۇ چنی ئاژەڵا پەیۋەڼیش گېرتەن و ئاژەڵداریی و پېۋەرە ژیۋای چنی ئاژەڵا بېیەن بە بەشېۋ چە کولتۇرو خەڵکەکەی.
بەڵام بەداخۆ، پا بە پاو ئانەیە، کە خەڵکو ھۆرامانیچ کۆتەن چېرو ھەژمۇن پیشەسازی و پېڎابېیەی چەکە ھامچەرخەکا، مرۊڤەکې بېیېنې بە مەترسی گۆرە سەرو ئاژەڵا ناوچەکەی و بارکەرڎەی فرەو ئاژەڵا یان دلېنەلۋایشا. ئەر سەردەمېۋەنە ئانە بەشېۋ بېیەبۊ چە کولتۇرو ناچاریی، بەڵام چە ئارۊنە کە مرۊڤەکې بە فرە چېۋا تەری ئاشنێ بېیېنې و ئاۋرڎەی و کېیاستەی و ئەۋەفاڕای بەروبۇمەکا ئاسان بېیەن و بەرھەمئاۋەری گەنمې و یەۋې و برنجی و گەنمەشامې و تەڕەکاڵی و مېۋەی زېیاڎش کەرڎەن و توانا تەکنۆلۆجییەکې کشتکاریی ئاڼە ۋەڵېکۆتېنې، کە پەنەۋازیې مرۊڤیشا پەی کوشتەی و وارڎەی ئاژەڵا ناستەن و کەڵکھۊرگېرتەی چە پڕۆتینی گیۋاۋی|درەختی تاۋانش پەنەۋازییە ناچارییەکا جەسەو مرۊڤی مسۆگەرې کەرۊ و ھیچ پەنەۋازیېۋ بە ڕاۋکەرڎەی و وارڎەی گۊشتو ئاژەڵا نەمەنۊ و بېژگە ئانەیچە زېیانەکې گۊشت-وارڎەی زېیاتەر بەرکۆتېنې، بەتایبەت یاۋای شڵەژېیای و تۇڕەیی ئاژەڵا چە ڕاو سەرەبڕیەی و کوشتەیشاۋە، کە کاتو گیانداینە چە دما ساتەکا ژیۋاو ئاژەڵانە درۊسبۊ، ھەڵبەتە بېژگە ئانەیە کە وێکەرڎەی پیشەسازییانەو ئاژەڵا و ھەر پاسە سەرەبڕیەی پیشەسازییانەو ئاژەڵا چە ڕاو وارڎەی ئا جۊرە گۊشتاۋە، دەیان نەوەشیې ئۆ دلې جەسەو مرۊڤی و ونې و مەشگیش مېیاۋا، ئانە بېژگە چە نەوەشییە کرمییەکا.
ھەڵبەتە مشیۊ ئانەیچە چە ۋیرنەشۊ، کە سرۇشتی پارېزیا بەس بە بېیەی ھامسەنگیی سرۇشتیی ژیۋای مسۊگەر بۊ و کریۊ و بەبې ئا ھامسەنگییە سرۇشتییەیە، ژیۋارو ھەر ناوچېۋی ڕۇبەڕۇ مەترسی و زېیانی بۊۋە. سەرو ئا بنەمێ ئېمەی مرۊڤ پەنەۋازیما بە ھۊشیاریی ژیۋار-پارېزنای کە ئاژەڵ-پارېزنای بەشېۋی گرنگو ئاڎی ھەن و ھامسەنگی مەنەی ھەر یۊ چە ئېمە مرۊڤ و ئاژەڵ و درەخت و گېۋاۋ، بە مەنەی ئەۋی تەریماۋە پەیوەست ھەن. پەی ئا مەبەسەیە کۊمەڵېۋ ھەنگامې گرنگېنې، کە ئینە چڼ خاڵ و بنەمێۋشانې:
- قەڎەخەکەرڎەی چەکی، بەتایبەت چەک و ئامرازې ڕاۋکەرڎەی.
- قەڎەخەکەرڎەو ڕاۋۊ باڵدارا و ئاژەڵا و سزادای ڕاۋکەرا.
- ئازاڎکەرڎەو باڵدارا و ئاژەڵا و ئەۋەگېڵنایشا پەی دلې ژیۋاری سرۇشتیی وېشا.
- درۊسکەرڎەی تیمە تایبەتەکا پارېزنای ئاژەڵا و وێکەرڎەی ئا جۊرە باڵدار و ئاژەڵا چە یاگې تایبەتەنە، کە خەریکا دلېنەملا و بنەچەبڕې با.
- ئەۋەکەرڎەی سەنتەرو ئاژەڵپارېزنای و پەرۋەرڎەکەرڎەی زاڕۊڵا بە نزیکایەتی و دۊسایەتی ئاژەڵا.
- ئەۋەکەرڎەی سەنتەرو دژو تڼوتیژی ۋەرانۋەرو ئاژەڵا.
- پېڎاکەرڎەی و ئەسای و ئاۋرڎەی ئا ئاژەڵا، کە ۋەڵتەر چە ھۆرامان بېیېنې و ۋەرو ڕاۋکەرڎەی و جەنگی بنەچەبڕې بېیېنې، یان پەی بەرو ھۆرامانی کۊچشا کەرڎەن.
- تەرخانکەرڎەی یاگې تایبەتې چە کەشەکانە پەی پارېزنای ئاژەڵا پېسەو ناوچەی پارېزیای؛ ناوچەی پارېزیا، نەک باخچەو زیڼانیکەرڎەو ئاژەڵا.
- پەرەدای و ھاندای کولتۇرو ڕزگارکەرڎەو ئاژەڵا و درۊسکەرڎەو کۊمەڵە ڕۊشنگەرەکا پەی ئاشناکەرڎەیۆو خەڵکی بە مافو ئاژەڵا و مافو ژیۋای پەی ئاژەڵا.
- ئانې و ھەر خاڵە و بنەمێۋە تەرە، کە بە پارېزنای ئاژەڵا و پارېزنای ژیۋاری و ھامسەنگی ژیۋای خزمەت کەرا.
- ..... تد.
------------------------------------------
وەنەرې بەڕێزی، پەی ئەژناسای پیتە تایبەتە ھۆرامییەکا دلې ئی نۋیستەیە، سەرو لینکو پیتەکا کلیک کەردې:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ې: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]