ناو: عەزیز
ناوی باوک: ئۆمەر
ناوی دایک: هەمین
ڕۆژی لەدایکبوون: 01-07-1944
ڕۆژی کۆچی دوایی: 07-10-2023
شوێنی لەدایکبوون: #ئیلنجاغی گەورە#
شوێنی کۆچی دوایی: #کۆیە#
$ژیاننامە$
عەزیز ئۆمەر وەسمان
ئامادەکردنی:#ئاراس ئیلنجاغی#
ناوی تەواوی (عەزیز ئۆمەر وەسمان باپیر مستەفا کوڕەبۆر) ە، ساڵی (1944) لە گوندی ئیلنجاغی گەورە لەدایک و باوکێکی ئیلنجاغی زەحمەتکێش و جوتیار هاتۆتە ژیانەوە، وەکوو تەواوی منداڵانی ئاوایی شەش ساڵی تەمەنی منداڵی له و ئاواییەدا بەکولەمەرگی ڕابواردووه.
لە ساڵی خوێندنی (1950-1951) لە پۆلی یەکەمی قوتابخانەی (ئیلنجاغی گەورەی سەرەتایی تێکەڵاو) دەست دەکات بە خوێندن، له و سەروبەندەدا قوتابخانەکە تەنیا (3) پۆلی هەبووە و مامۆستا (#تاهیر ئەحمەد حەوێزی#) بەڕێوەبەری قوتابخانەکە بووە، دوای تەواوکردنی پۆلی سێیەمی سەرەتایی، باوکی ئارەزوو دەکات بیخاتە بەر خوێندنی ئایینی لە حوجرەی مزگەوتی #ئیلنجاغی گەورە# لای مامۆستا (#مەلا سدیق ئیلنجاغی# - سدیق عوسمان مەحمود) بۆ ماوەی چەند ساڵێک دەبێتە فەقێ و وانەکانی (قورئان و سەڕف و نەحو و شەرع) دەخوێنێت.
دوای چەند ساڵ فەقێیایەتی و دابڕان ساڵی خوێندنی (1958-1959) لە سەردەمی بەڕێوەبەری مامۆستا (عەبدولقادر مەنتک) جارێکتر گەڕاوەتەوە بەرخوێندنی قوتابخانەیی و له و ساڵەدا لە پۆلی چوارەم وەرگیراوەتەوە و لە ساڵی خوێندنی (1960-1961) پۆلی شەشەمی سەرەتایی لە ئیلنجاغی گەورە تەواوکردووە.
بۆ درێژەدان بە خوێندنی ناوەندی لە ساڵی خوێندنی (1961-1962) دەچێتە خوێندنگەی (دواناوەندی کۆیەی کوڕان) لە شاری #کۆیە# ، بەهۆی شاڵاوی دڕندانەی (حەرەس قەومی) بەعسییەکان ساڵی خوێندنی (1963-1964) ناوچەی کۆیە بە (مەحزور ئیداری-ڕێنەدانی کارگێڕی) دادەنرێت و ئەو ساڵە خوێندن لە کۆیە دادەخرێت بەناچاری لە ساڵی خوێندنی (1964-1965) تاقیکردنەوەی وزاری-بەکالۆری لە شاری #هەولێر# ئەنجام دەدرێت، مامۆستا عەزیز بەشداری ئەو تاقیکردنەوەیە دەکات و سەرکەوتووانە قۆناغی (ناوەندی) یش تەواو دەکات.
پۆلی (چوارەم) ی ئامادەیی لە ساڵی خوێندنی (1965-1966) لە شاری هەولێر دەخوێنێت و بۆ تەواوکردنی دوا قۆناغی ئامادەیی بەشی وێژەیی لە ساڵی خوێندنی (1966-1967) دەگەڕێتەوە خوێندنگەی (دواناوەندی کۆیەی کوڕان) لە شاری کۆیە و سەرکەوتووانە ئەو قۆناغەش تەواو دەکات.
لە ساڵی خوێندنی (1967-1968) لە پەیمانگای مامۆستایانی سلێمانی لە شاری #سلێمانی# وەردەگیرێت و ساڵی خوێندنی (1968-1969) بەسەرکەوتوویی بڕوانامەی دبلۆم بەدەست دەهێنێت.
لە ساڵی خوێندنی (1969-1970) وەکوو مامۆستا لە قوتابخانەی (ئیلنجاغی گەورەی سەرەتایی تێکەڵاو) دادەمەزرێت ئەو کات مامۆستا (زاهیر #کێخوا وەسمان ئیلنجاغی# ) بەڕێوەبەری خوێندنگەکە بووە.
دوای (4) ساڵ خزمەتی مامۆستایەتی لە ساڵی خوێندنی (1974-1975) دوای گواستنەوەی مامۆستا زاهیر بۆ شاری کۆیە، مامۆستا عەزیز دەبێتە بەڕێوەبەری خوێندنگەی ئیلنجاغ تاوەکوو ساڵی خوێندنی (1978-1979).
لە ساڵی خوێندنی (1979-1980) لەسەر داوای خۆی دەگوازرێتەوە قوتابخانەی (کورانی سەرەتایی تێکەڵاو) لە شاری هەولێر دوای دوو ساڵ خزمەت له و قوتابخانەیە هەر لەسەر داوای خۆی دەگوازرێتەوە بۆ قوتابخانەی (باداوەی سەرەتایی تێکەڵاو) تاوەکوو ساڵی خوێندنی (1993-1994) دوای ئاوەدانکردنەوەی ئیلنجاغی گەورە گەڕاوەتەوە قوتابخانەی ئیلنجاغی گەورەی سەرەتایی و ساڵی خوێندنی (1995-1996) بۆ جاری دووەم دەبێتەوە بەڕێوەبەری قوتابخانەی ئیلنجاغی گەورە تاوەکوو ساڵی خوێندنی (2000-2001) بەڕێوەبەری قوتابخانەکە بووە.
بەسوود وەرگرتن لە پاشخانی خوێندنی فەقێیایەتی ساڵانی پەنجاکانی سەدەی ڕابردوو و مامۆستایەکی زیرەکی زمانی عەرەبی بۆ ماوەی (4) ساڵان خەڵکی ئاوایی ئیلنجاغ داوای لێ دەکەن ببێتە پێش نوێژ و وتاربێژی مزگەوتەکەیان و ڕەزامەند دەبێت و وەکوو مامۆستایەکی ئایینی له و ماوەیەدا خزمەتی ئیلنجاغی گەورەی کردووە.
لە ماوەی ساڵانی (2001-2005) لە شاری هەولێر درێژەی بە خزمەتی مامۆستایەتی داوە و دوا ساڵی خزمەتکردنی لە ساڵی خوێندنی (2006-2007) لە قوتابخانەی (کوردستانی بنەڕەتی تێکەڵاو) بووە، لە گەڕەکی ڕاپەڕین- عەلیاوا لە شاری کۆیه، بەداخەوە ئەو زاتە له و ساڵەدا (2006) دووچاری نەخۆشی دڵ هات و لە وڵاتی سووریا لە نەخۆشخانەی (الباسل المرکزی لجراحة القلب) نەشتەرگەری کرانەوەی سنگی بۆ کرا.
لە ساڵی خوێندنی (2006-2007) دوای (37) سی و حەوت ساڵی پڕ لە خزمەتکردن لە بواری پەروەردە و فێرکردن خانەنشین دەبێت، لە ماوەی ساڵانی خانەنشینیدا کە نزیکەی خۆی لە (16) ساڵ دەدا وەکوو کەسایەتییەکی پەروەردەیی و ئایینی و کۆمەڵایەتی دەردەکەوت و بایەخێکی زۆرباشی بە پەیوەندییە کۆمەڵایەتییەکان و زانستە شەرعییەکان و بیرەوەرییەکانی خۆیدا و چوار بەرهەمی لە بواری زانستە کۆمەڵایەتی و شەرعییەکاندا داناوە دوو بەرهەمیان چاپکراوە ئەوانیش:
1-زانست لەژێر سێبەری قورئان و سوننە، 2023ز.
2-ئیلنجاغی گەورە، مێژوو و داب و نەریتی قۆناغە سەخت و سادەکان وانەیەک بۆ نەوەکانی داهاتوو، 2023ز.
دوو بەرهەمیشی دەستنووسیشی ئامادەیە بۆ چاپ ئەوانیش:
1-الحقائق العلم الحدیث، وەرگێڕان.
2-مێژووی هۆزی شێخان.
ئەم زاتە ماندووەی کاروانی پەروەردە و بواری ئایینی گوندەکەمان لە تەمەنی (79) ساڵیدا لە ڕۆژی (شەممە) لە ڕێکەوتی (7-10-2023) دا بە نەخۆشی دڵە گەورەکەی لە کارکەوت و بۆ یەکجاری ماڵاوایی لە خۆشەویستان و نیشتمان کرد و لە گۆڕستانی #ئیلنجاغی گەورە# لە ڕێوڕەسمێکی شایستەدا بەخاک سپێردرا.
تێبینی: ئەم ژیاننامەیەم لە چاوپێکەوتنی مامۆستا عەزیز ئۆمەر وەسمان بە ئامادەبوونی مامۆستا هاوسەری کوڕە گەورەکەی لە 4-1-2013 لە شارەدێی #تەقتەق# لە ماڵی خۆمان وەرگرتووە.[1]