#ڕابوون مەعروف#، پەرلەمانتار و هەڵسوڕاوی بزووتنەوەی گۆڕان کە بووەتە گوتەبێژی جووڵانەوەی نەخێر لەئێستادا بۆ گشتپرسی، لە ئەندامێتی و فراکسیۆنی گۆڕان دوورخرایەوە.
#بێستوون فایەق#، ئەندامی پەرلەمانی کوردستان لە فراکسیۆنی گۆڕان هەواڵەکەی پشتڕاستکردەوە و بە تۆڕی میدیایی ڕووداوی ڕاگەیاند: ڕابوون مەعروف بە فەرمانی خانەی ڕاپەڕاندنی بزووتنەوەی گۆڕان لە ئەندامێتی و فراکسیۆنی گۆڕان دوورخراوەتەوە.
رابوون مەعروف لە هەڵبژاردنی 21-9-2013 دا بۆ خولی چوارەمی پەرلەمانی کوردستان هەڵبژێردرا، لە #08-08-2017# ەشەوە لەگەڵ ڕاگەیاندنی جووڵانەوەی نەخێر لەئێستادا بۆ گشتپرسی، بەبێ پرس و ڕاوێژکردن بە بزووتنەوەی گۆڕان چووە پاڵ جووڵانەوەکە و بووە گوتەبێژ.
هاوکات ڕابوون مەعروف بە ڕووداوی ڕاگەیاند: بەهۆی بوونم لەنێو جووڵانەوەی نەخێر لەئێستادا بە فەرمانی خانەی ڕاپەڕاندن لە گۆڕان دوورخراومەتەوە. بەمزووانەش ڕوونکردنەوەم دەبێت.
هەرچەندە بزووتنەوەی گۆڕان لەگەڵ ئەنجامدانی گشتپرسی نییە لە 25 ی ئەیلوولدا و چەندجارێک بەفەرمی داوای دواخستنی کردووە، بەڵام دژایەتی پرۆسەکەش ناکات.
ئەمە یەکەم پەرلەمانتار نییە بەهۆی پشتگیریکردن لە جووڵانەوەی نەخێر لەئێستادا لە حیزبەکەی دووردەخرێتەوە، پێشتریش یەکێتیی نیشتمانیی کوردستان لەسەر هەمان هەڵوێست #فەرهاد سەنگاوی# لە فراکسیۆنی سەوز و ئەندامییەتی یەکێتی دوورخستبووەوە. [1]
19-09-2017