بەناوی خودای بەخشندە و میهرەبان
بە بۆنەی هاتنەوەی جەژنی قوربانی پیرۆز، پیرۆزبایی لە خەڵکی کوردستان و سەرجەم موسڵمانانی عێراق و جیهان دەکەم.
پیرۆزبایی لە خانەوادەی سەربەرزی شەهیدان دەکەم کە بە خوێنی ڕۆڵەکانیان داری ئازادی و نیشتیمان پارێزراوە و پیرۆزبایی لە یەک بە یەکی هەموو پێشمەرگە قارەمانەکان و هێزەکانی ئاساییش دەکەم کە قارەمانانە بەرگری لە خاک و گەلی کوردستان دەکەن و بوونەتە سەنگەرێکی پۆڵایین بۆ بەرگریکردن لە هەموو مرۆڤایەتی. پیرۆزبایی لە حاجیانی کوردستان و ڕێبوارانی ماڵی خودا دەکەم و داواکارم لە خودای مەزن عیباداتیان قبوڵ بکات.
هیوادارم ئەو جەژنە ببێتە مایەی تێکشکانی یەکجارەکیی تیرۆریستانی داعش و هەموو ئاوارەکان بگەڕێنەوە شار و ماڵەکانیان.
جەماوەری خۆشەویستی کوردستان
لەم بۆنە پیرۆزەدا بە پێویستم زانی جارێکی دیکە لەبارەی ئەو قەیرانە سیاسییە قسە بکەم کە ئێستا لە هەرێمی کوردستان لە ئارادایە.
لە کاتێکدا کە گەلەکەمان بە قۆناغێکی هەستیاردا تێدەپەڕێت و لەبەردەم دەرفەت و هەڕەشەی گەورەدایە، هیچ پێویست نەبوو کە بەم شێوەیە مامەڵە لەگەڵ پرسی سەرۆکایەتی بکرێت و کار بۆ قووڵترکردنی قەیران و تێکدانی ئاسوودەیی خەڵک بکرێت.
لەم پرسەدا ئەوەی لەسەر شانی من بووە ئەنجامم داوە. بەر لەوەی ماوەی یاسایی سەرۆکی هەرێم تەواو بێت داوای هەڵبژاردنم کرد و ئەرکی یاسایی خۆم بە جێ گەیاند بەڵام هەڵبژاردن نەکرا.
پێشتر چەندین جار داوام لە حزبەکان و پارلەمان کرد کە ئەم بابەتە یەکلایی بکەنەوە بەڵام دیسان ئەنجامی نەبووە. بە هیچ شێوەیەکیش داوام نەکردووە من لە پۆستەکەدا بمێنم. هەموو جۆرە بۆچوونێکیش ڕەت دەکەمەوە کە پێیان وایە من بەدیلم نییە.
لە درێژەکێشانی ئەو بارودۆخە زۆر نیگەرانم و خەڵکی کوردستانیش بێزار بووە و مافی خۆیانە گلەیی بکەن.
بە تایبەت کە قەیرانی قووڵ بەرۆکی کوردستانی گرتووە، کێشەکان لەگەڵ بەغدا و قەیرانی ئابووری و دابەزینی نرخی نەوت و لێشاوی ئاوارەکان و لەسەرووی هەمووشیانەوە شەڕی تیرۆریستانی داعش، بۆیە دەکرا حزبەکان و پارلەمان بە لەبەرچاوگرتنی ئەو بابەتانە بەشێوەیەکی گونجاوتر قسەیان لەسەر ئەو پرسە کردبا و، بەر لە 23ی حوزەیرانی ئەمساڵ دەرفەتی چارەسەرکردنی گرفتەکانیش زۆر بوون.
سەبارەت بەم قەیرانە دوور لە هەموو جۆرە عاتیفە و کاردانەوەیەک داوا لە هەموو حزبەکان دەکەم ئەوانەی بەشداری پارلەمانن و هەموو ئەو حزبانەی مۆڵەتیان هەیە کە ئەگەر کۆبوونەوەی پێنجقۆڵی لە ماوەیەکی کورتدا نەگەییشتە ئەنجامێک، کۆببنەوە و بە باشی بیر لە دۆزینەوەی چارەسەرێکی واقعیانە بکەن کە قەیرانەکان قووڵتر نەبنەوە و بە تایبەتیش گرفت لە شەڕی دژی داعش دروست نەبێ.
من زۆر بە باشی لە سەروەریی یاسا تێدەگەم و دەبێ زیاتر لە هەموو کەسێک ڕێز لە یاسا بگرم. داواکارم چیتر مانەوە و نەمانەوەی من تێکەڵی ئالیەتی هەڵبژاردنی سەرۆک و دەسەڵاتەکانی نەکرێت، چونکە دوو بابەتی لێک جیاوازن. پێشنیار دەکەم هەموو حزبەکان بڕیار لەسەر ئەوە بدەن کە بەر لە 2017 دەسەڵاتەکان و میکانیزمی هەڵبژاردنی سەرۆک لە دەستووردا یەکلایی ببێتەوە و بڕیاری کۆتایی بۆ گەل بێت. بۆ ئەو ماوەیەش و بۆ سەرۆکایەتی چۆن بە باشی دەزانن با بڕیاری لەسەر بدەن. بڕیارەکە هەر چۆنێک بێت، چ بەردەوامبوونم بێت لەسەر ئەرکەکانم هەتا هەڵبژاردن یان لەسەر بەڕێزێکی تر ڕێک بکەون بۆ ئەوەی ئەمانەتی سەرۆکایەتیی ڕادەست بکەم بۆ ئەوەی چیتر خەڵکی کوردستان بەم بابەتە سەرقاڵ و ماندوو نەکرێن.
ئێستایش کوردستان پێویستی بە هەوڵی هەموو لایەکە کە زانایانە و بە ڕۆحێکی پێشمەرگانە کاری بۆ بکەین بە تایبەت کە لەم قۆناغە هەستیارەدا ئەگەری داڕشتنەوەی نەخشەی ناوچەکە هەیە. هیوادارم هەموو لایەک زۆر بە هوشیارییەوە مامەڵە لەگەڵ ئەو قۆناغەدا بکەن. خۆڕاگریی پێشمەرگە گەورەترین داستان و چیڕۆکی سەرکەوتنی بۆ هەموو جیهان لە بەرانبەر تیرۆر تۆمار کردووە. خۆڕاگریی پێشمەرگە و گەلەکەمان سەربەرزییەکی مەزنی بە ئێمە بەخشیوە و دەرفەتی گەورەیشی بۆ ڕەخساندووین. پێشمەرگە لەسەر ئاستی جیهانیدا بووەتە سیمبۆلی بەرگریکردن لە بەهاکان و ئازادی و داعشیش سیمبوڵی تاوان و شەڕانگێزی و دەبێ حزبەکان لەو دەرفەتە بگەن و بۆ بەرژەوەندیی گەلەکەمان سوودی لێوەرگرن.
لێرەدا پێزانینێکی زۆرم بۆ خۆڕاگریی خەڵکی کوردستان و تەحەمولی کێشە و قەیرانەکانی ئەو ماوەیە هەیە. ڕاستە قەیران هەیە، بەڵام ئومێدیش هەیە و نابێ بێ هیوا بین. زۆر بە باشی لە داواکاری و بارودۆخی گەنجە خۆشەویستەکانی کوردستانیش دەگەم و مافی ڕەوای خۆیانە. بەڵام لە هەموو حاڵەتێکدا باوەشی نیشتیمان گەرمترە و وڵات شیرینترە. بینیمان بە سەدان گەنجی خوبەخش لە دەرەوەی وڵات هاتنەوە و هەموو خۆشییەکانیان جێهێشت و یارمەتیی برا پێشمەرگەکانیان دا و ئامادەی گیانفیدایی بوون بۆ وڵاتەکەیان. داوا لە گەنجە خۆشەویستەکان دەکەم لەجیاتی ئەوەی بیر لە جێهێشتنی وڵات بکەنەوە هیوایان بەهێز بێت، قەیرانەکان قووڵن بەڵام چارسەریشیان هەیە. دەبێ بە هەموو لایەک بیر لە نەهێشتنی هۆکاری کێشەکان بکەینەوە و لەسەرووی هەمووشیانەوە ئەرکی حکوومەت و پارلەمان و حزبەکانە.
چاکسازیی پڕۆسەیەکی پێویستە و یەکێکە لە بنەما سەرەکییەکانی زیندوویەتی کۆمەڵگە و سیستەم و پێشکەوتنی وڵات و، ئەو چاکسازییەی کە بەر لە چەند ساڵێک دەستمان پێکردبوو پێویستە کارا و فراوان بکرێت و دەبێ کاری جدیی و کردەیی بۆ بکرێت. ئەوەیش دووپات دەکەمەوە کە نابێ هیچ قەیرانێک ببێتە ڕێگر لەبەردەم مافەکانی گەلەکەمان و بڕیاردان لە چارەنووسی خۆی. ئەولەوییەتی سەرەکیی منیش مافی چارەنووسی خەڵکی کوردستان و نەهێشتنی مەترسیی داعشە لەسەر کوردستان.
خەڵکی خۆشەویستی کوردستان لەوە دڵنیا دەکەمەوە کە هەر چەندە ئەم قۆناغە سەختە بەڵام پشت بە خوا و هیمەتی گەلەکەمان، بە سەرکەوتوویی تێدەپەڕێنن.
هیوای شادی و بەختەوەری بۆ هەموو خەڵکی کوردستان دەخوازم و جەژنتان پیرۆز بێت.