چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی حەفتا و چوارەمە
کۊنیشتو مزگی گەرم بې، یۊشا ماچۊ: فەقی تۊ سەوای مەلە! پیێ شېخ لەتیفی کە چا لاوە چەنی پشدەریا گژیێنې؛ ڕووتت مەکەراوەو سەعاتەکېت چەنە مسانان.
واتم: گەر چەنەشان ئەسانې ئا دەمە ملو خزمەتو شېخ لەتیفی و ماچو: سەعاتەکېم جە تۊ گەرەکەنە.
کابرێوە سۊفیلەی کزۊڵە ماچۊ: تۊ فەقی نییەنی؛ تۊ ڕەنگە پیێوە گۆرەبی، فەقی نمەیارۊ بواچۊ ملو وەردەمو شېخ لەتیفی و مەدۊنوش.
زانام هەڵەتێوەم کەرڎەن؛ بەڵام خەلیفەی ساحېب یانە قۊستشۆ و ماچۊ: سۊفی تۊ کەم فامەنی؛ فەقیې کە قورعان ئینا سینەشانە دیارەن پیێ گۆرېنې!
خەلیفە چوار کوڕې گۆرېش بېنې کە پەی فاڕ و گۊڕی، گەرمیان و کوېسان مەکەرېنې. ساعبێ کە یانەئاواییمان کەرد، بە دزییۆ بە یۊ جەکوڕەکاش واتم: دۆڵەت سابڵاخش گېرتەنۆ. تفەڼگې دلې لاڎەگایەکانە فرېنې و مەتەرسیېنە بە هەرزان مەورەشاشان، بیاوەپەنەو تفەڼگې بسانە!
کە ڕوەو دەرەو ئەنجینەی لوېنمې، سۊفیلەکەو شەوېم دیڎۆ کە دانگەو بزا دې، ماچۊ: فەقی ئانە لوای؛ بەڵام مەزانو تۊ فەقی نەبېبې، نمەزانو مەوینوتۆ یام نا، تاکو بزانو ڕاسم چەنی کەرڎەنی یام نا، خوڎات چەنی. چەنی گەلەو بزا یاوایمې سەرو چەمەی؛ بەستەبېش، بە تەوەنی بەیسەمان ماڕا و ڕەچەو بزاما پېڎا کەرد، وېما هورکەرد، شاخې هەوەڵ بزېم گېرتې و پڕنامۆ. کە لوانې ئۆدەس دیڎانې پەی وېم ئەجې چەکمې سوورېم ئینێ پانە، زەڼگۊڵېمۆ تاکو قولەپێم ۋنی مەچکېرە، بەیسە و ئاوې چیێ زامڎارې کەردېبېنې، ڕەفېقېم چڕیشا: ئېمە بە پاپۊشې و گۊرەوېوە مەپڕمێ؛ تۊ ئاییرێما پەی بکەرۆ. باعزێ پووشی وشکم سەرو کەڵەکێوە ئاردو ئاییرم دا، قاچې نیمە سەردایبەردې ترەکێ، جا بۊ ژانی بکەران.
کۆتیمې ڕا، چەنی وەرۋې ڕاکې دیارە نەبې، شۊنەو بەرازارە لوایمې؛ کۆتیمې سەرو کۊڵیتێرە (کووخ)، تاقە یانێ بە بەڼەنێوە، واڵەو براڵێوەش دلېنە مەژیوېنې، خېرامایێ فرەشان کەردیمې؛ هەچکوچی و وەزی و هەنجیرېشان پەی نیایمېرە، کوڕەکە مەواچې: وەرمم دیڎەبې هەنگورە چەرمەڵې مەوەرېنان؛ زانام ئا وەرۋە قورسې مەوارۊ. گەر وەرمەنە هەنگورە سیاوڵې بوەرو، واران مەوارۊ. گرڎو ژیوایشان مېوەدەیمێ بې دامانو دەگاو (ورچەک)ی، دوور جە خەڵکی مەژیوېنې.
سەوایشۆ یاوایمې دیمو ئېراقی، هەناسێ بېخەمیم هورکېشت: ئۊخەی چېرو حوکمو عەجەمینە ڕزگار بییانې. دمای نماو عیشایێ، بە گەلەبزۆ ڕوەما کەرڎە دەگێوە بە نامې (بێورە) یام (بێوران)، ئەچاگە حەشر و حەلەلا بې؛ دیار بې شېویان، ژەنێ ماچۊ: زوو لۊدی چېگە نمەمەندې! هاوارو سەر و ماڵین، تازە پەی کۊی بلمېن؟ گەلەو بزاما کەرد دلې حەسارێ و لوایمې پەی مزگی، مزگیچ جمەش ئې جە خەڵکو دەگێ، مەڵڵێوەیچ بە نامې مەڵلا عەزیزی بە دەنگی بەرز واچې: من یانەو وېم فاڕانۆ، شمەیچ بڕەمدې تاکو نەکوشیێندې و تاڵانې نەکریێندې و یانەکېتان نەسۊتېنې. کەس هۊشو ئانەیش نەبې جوابو سڵامیمان بڎۊوە، مەسەلې چېشەنە؟ پەرسامان، واتشان شېخ لەتیف چەنی پژدەریا جەڼگشەن؛ دەگاو (تمتمان)یش سۊچنێنە. ئی دەگا کە ئینایمېش چەنە سەر بە شېخ لەتیفینە؛ ئېشەو پشدەریې جە هەقەەو وېشانە مەیان مەسۊچناش.
جارجار تڕ و تۊپ بە کارمێ. زانېنا گەر ئاڎې بە قسې مەڵڵای بکەران، ئېمە سەرەمان بەبې کڵاوە مەنۊوە. قسېم دەمو مەڵڵایۆ ئەساو واتم: برا، چی لاو پۊلیسیۆ شکات نمەکەردې؟ واتشان شکاتمان کەرڎەن، نمەیاران شەوېنە بەیان فریاماوە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]