نامۍ: حەمەزەمان
نازنام: مورادی
نامۊ تاتەی: کەریم
نامۊ ئەڎێ: نەجیبې
ڕۊ پېڎابېیەی: #10-11-1982ز.#
یاگۊ پېڎابېیەی: #هانەگەرمڵە _ هۆرامان#
$ژیۋاینامە$
ئەچی کاروانو خەرمانەو ئەدەبیمانە نیازمانە تەوافو هەناسێوە گەرمی بکەرمې کە شوکر پەی خوڎای هەڵای جوانا و کەیلا جە سۊز و زەوقی و مەتاوۊ ئەدەبو وەڵاتیما ساڵەهای ساڵ جە سۊزو هۊنیێش و خیاڵی بەرزیش بەروەر و دەوڵەمەڼ بکەرۊ.
ئی جوانە پەڕ تین و پەڕ سۊزە ئازیز و وەشەویسە، کاک حەمەزەمان مراڎی خەڵکو دەگاو (هانەگەرمڵە)ین.
کاک حەمەزەمان بە فەرمایشو وېش ڕېکۆتو ڕۊ دەو ڕابڕانی (#10-11-1982#ز.) دلې دەگاو بەهەشتی و ئاواتیەکې هانەگەرمڵەینە پېڎابېیەن، بەڵام تاتەی دڵسۊز و دوورەوینش ۋەرو ئانەیە کوڕەکەش (حەمەزەمان) زووتەر بلۊ مەکتەب سجیلش جە ڕېکۆتو یەکەم ڕۊ پاییزی (#01-07-1980#ز.) پەی گېرتەن. منیچ بە مۊڵەتو بەڕێزیشا و بەپاو ئا ئەزموونەیە کە وېم (سوبحان ئەمینی) جە ئاوارەبېیەی خەڵکو دەگاکېما (هانەگەرمڵەی) هەنم، مشۊم کاک حەمەزەمان دەو ڕابڕانو ساڵۊ هەزار و یەرە سەڎ و پەنجا و نۊی (#10-11-1981#ز.) پېڎابېیەبۊ؛ چوون گەرماوگەرمو کۊچی و ئاوارەییما جە زمسانو 1981ز. تاکو هامنو 1982ز. بې.
تاتەش نامېش (کەریم) و ئەڎاش نامېش (نەجیبې)نە.
داخەی گرانەم، هەر ئاچا کەین و بەینو پېڎابېیەی کاک حەمەزەمانینە بە بۊنەو دەسپەنەکەرڎەی جەنگو ئێران و ئێراقیوە و سەرهۊردای جەنگو حېزبەکا چەنی حکوومەتی تازەو ئێرانی بارودۊخ پېسە گلی شېویای تېکمشۊ و کاک حەمەزەمان کە هەڵای چڼ مانگېش بۊ و وەرەو ئەڎێشۆ، ئاوارې با و بەرەو شارو پاوەی ملا.
کاک حەمەزەمان پەناو ئەڎا و تاتەی دڵسۊزی زەحمەتکېشی نەزاکەت فامیشەنە ورڎە ورڎە گۆرە بۊ و پەنەیاوۊ و کاتېو واڎەو مەکتەبیش یاوۊ، شارو پاوەینە منیاش مەکتەب و هەر ئەچا شارەنە پلەکان بە پلەکانو وانای تەمامنۊ و دماو تەمامنای سەروازی ئیدارەو ئاوۊ پاوەینە مەرزیۊرە.
ئەر فەرمایشو قەڎیمیا پېسە قسې نەسەقې بارمې نەزەرە، کە ئەسېح پاسەیچەنە، مشۊم واچمې ئاوی شۊنۊ جۋېرە ملۊ و ناسک خیاڵی، سۊزو هۊنیێ، قسەزانای و ژیری یانەو کاک حەمەزەمانینە جە ئەڎێ بېیەن و ئاڎ ئەوەڵای ئەوەڵ کوڕەزاو کەسێوەن (حاجی حەماسەین) کە شۊرەت و غیرەت و ئازاییش پەی گرڎ کەسی مەعلووما و هەرپاسە برازازاو کەسێوەن (حەمەڎمینو ئۊسمانی) کە پیاو دلې مەجلېسا بېیەن و قسې نەسەقې و ژیرانېش ئیسەیچ ئینێ سەرو زواناوە و دەماودەم مەگېڵا. دیسان ئەر ورڎتەر سەرەنج بڎەیمې برازا و مامۊزازاو دوې کەسان (میرزا حەمەلاو و ئوستوار تەوفېق) کە هەرکام پەی وېشا دلې ئەدەبو هۆرامانینە و دنیاو هۊنیێنە دەسی باڵاشا هەن و شاکارە ئەدەبییەکەشا یانې شېعرەو (هۆرامان کەی وەشا) کە تاواش ئاخېزېوی ئەدەبی جە دنیاو ئەدەبو هۆرامانینە ڕاوزۊ، ئەمانە سەرو ئی ڕاسیە بڎا.
کاک حەمەزەمان بە فەرمایشو وېش چەنی مامۊی بە ڕەحمەتیش یانې میرزا حەمەلاوی دایېم پېسە ڕەفېقی بېیەن و فرە دڵوەش و همېدڎوار بېیەن، کە نازۊ ئی چراوە ئەدەبیۊ یانەشانە پا ئۆ کزی بنیۊ و ئی ئۊجاخە ئەدەبیې ڕۊشنە کەرۊوە، کە هەرپاسەیچ بې و شۊنۊ مەرگی ناواڎەو مامۊی بە ڕەحمەتیشەرە ئیسە شۊڵەو ئی چراوې پېسە لیشکەو ڕۊجیاری باڵېش کېشتېنې ملو وەڵاتیرە و مزگانی دماڕوېوی ڕۊشنی پەی وەڵاتیما مڎۊ.
کاک حەمەزەمان هەرچڼ خەیلێ چاوەڵتەر ئی سۊزە پېسە نەختینەی دەروونشەنە بېیەن و دایېم پەی وېش گڕ و گاڵش کەرڎەن، بەڵام جە ئەوەڵ ڕوەکاو ساڵۊ (2021ز.) و جە ڕاو تاقمەو هانەگەرمڵە و فەرهەنگیوە هەم فېرو وانای و نویستەی بە زوانی ئەڎایی وېش بېیەن، هەم دارو هۊنیێش گوڵش کەرڎەن و یاوان سەمەر و تاوانش جە ڕاو ئی تاقمەیوە دەنگو وېش یاونۊ بە حەزوازش. پەوچی پېسە وەفا ئەرمانای جە پارچە هۊنیێوەنە فەرماوۊ:
هەرکەس فېر نەبېیەن جه زوانو وېش
پېسەن ڕاو تەکیەی نەزانۊ دەروېش
هەرچی ویر کەروه جه تەمەن شییام
گرڎ به زوانی خەواره ژیام!
هەسارێ ڕۊشن وېش دا دیاری
ئاسمانی فەهمم کەرڎش نوورانی
فېرو زوانو ئەڎاو وېم کەرڎاش
تا بنەچینەو فەرهەنگیم بەرڎاش
حەرف حەرفی منیەو کونجو دیواری
پیت پیت هۆرامی، ماروو ڕوەو کاری
مەدیۊنت بیا زەمین تا ئاسمان
ماچ کەروو دەسات مامۊسا سوبحان.
کاک حەمەزەمان، بە فەرمایشو وېش ئەچی چڼ ساڵەنە ئی چوار کەسە شۊنەمای ئەرېنیشا سەرو سەرکۆتەیشەرە نیانەرە: سوبحان ئەمینی، کاک هەمزەی کاکەوەیسی، کاک سابیر عەزیزی، کاک ناجېح گوڵپی.
کاک حەمەزەمان، ئەچی چڼ ساڵەنە پېسە هەسارېوی وەرم زڕیای داییم کۊشش و تەقەلانە بې و دلې فرەو تاقمە و کۊنیشت و مەجلېسەکانە بەشداری گەرم کەرې و بە شېعرە نەخت و وەشەکاش ئاوەڎانی و فەرېحە وزې دلې دڵو حەزوازاش، بەڵام داخەی گرانەم، بۊنەو بڕێ ناعەداڵەتیا و ناهەقیاوە کە ئەچی ماوەنە بە چەمو وېش دیېنېش نەختێ سەرڎی مەیلی ڕوەکەرڎەنەنە و ئیتر پېسە چاوەڵی ئەچا جم و جووڵ و کۊشش و تەقەلایشە خەبەرېو نیا!!
شەرتەم بەستېبې چەنی هەسارا
منیچ هەسارەو وېم وزوه سارا
تا هەسارەو من وېش دا دیاری
هەسارې کەوتې پەشتەو پاسارا.
کاک حەمەزەمان مراڎی، پېسە کەسە بە ئاوەزو هۊشیارەکا هۆرامانی فرە زوو ئاوەزی فەرهەنگیش جماو یاوانە هەکە ئەرکێ قورس و گران کۆتەن سەرو شاناش، پارېزنای زوان و فەرهەنگەکەیش ئینا وەڵې تەمامو هەرمانەکاش، ئاڎ پەی خاترەو ئینەیچە هەر زوو نووکو قەڵەمەکەیش دارەو بە ئاوەزێ قووڵۆ کەردش مېمانو سەفحەی، ئیتر ئەچاگۆ زەڕنەقووتې واچە زەریفەکاش جە خەمی ڕیێ و کۆتې باڵشانای، پەروازشان کەرد وە مل سارا و دەشت و دەر، چاگەیچۆ بە باڵەفڕې نیشتێ و بەشەقەو باڵاشا جوانې هۆرامانیشان چڵاکنێرە کە زوانەکەشان ئاتاجیش بە ئاڎیشان.
ئەسعەد ڕەشید.[1]