ئانەی کاروانچییەن، ئاشناش خانچییەن
کاروان، قەتارو وڵاخان پەی بار بەردەی و ئاردەی، جاران پەی پېڎاکەرڎەی پەنەوازییەکانو ژیوای و هەم ساق کەرڎەیۆ کاڵا و بەرهەمە وېماڵییەکا، خەڵکو ئا یاگې بە وڵاخې کاڵاو بەرهەمەکېشا بەردېنې پەی ناوچێ، یام وڵاتێ تەری، چۆسەریچۆ ئانەی پەیشان پەنەوازبییەن بە بارو وڵاخەکا ئاردەنشاوە. فرەو یاگەکا دوورې بیېنې، چڼەها شەوېشا پۆ شییەن، پەی وچانی و ئیسراحەتی کاروانسەراکانە لاشادان کە پېسەبیېنې ئوتیلې ئیسەی. شەوێ یام چن شەوێ مەنېنێ، هەر پاڵو کاروان سەراکەینە خانو ئاژەڵی بییەن کە وڵاخەکېشا کەرڎەنەنەو ئاڵف و ئاویشا پەنە دێنې. ماناو پەندەکې ئانەن هەکە کاروانچی پەی لاو خانچی ملۊن، چوونکوم پەنەوازیش پەنەشەن، واتا گرڎ کەس پەی لاو کەسێ ملۊ هەکە هەرمانەش پەنەشەنە، چېوە تەمامکەرەکې پاڵو یۊینە کۊ مەباوە. هەرکەسی گیری چی دنیانە چەنی هامپیشەو ویش ئاشنان، سرووشتو ژیوای دنیێ پاسە موازۊن هەکە گرڎ کەس ئەوەجەش بە هام هەرمانو ویش مەبۊن و پاڎی گرفتەکەیش چارەسەر مەکەرۊن، دەی ئینەیچە پاسەش پەنەکەرۊن هەکە ئاشنایی و هامکاریش بۊ چەنیش. کارەوانکەریچ بە وېش و ئۆڵاخەکەیشۆ جە سەفەرەکاشەنە، ئەر ڕوەنەکەرۊ خانەو خانچی و ڕاش نەکەرۊوە بە ویش و ئۆڵاخشۆ، مەشیۊم ڕوە بنیۊ کۊگەو کې بۊ بە پەناگاش و کۊگە بۊ بە ماواش.[1]