ئاساو بە ژەنگەو وېش نەبۊ نمەڕېزۊرە
پېسە مەرانمېن ئاساو ئاشی ئاوینەن پەی هاڕای خەلە و کەنم و یەوا و بەرهەمە ڕەقەکا. ئاساو پېسەنە هارەی گۆرەی، بەڵام جیای ئانەی بە دەس بگېڵۊن، بە هېزو ئاوې مەگېڵیۊن. ئاساویچ پېسە هەر دەزگێوە تەرې جە ئاسن و دارو تەختەی وەشکریان، دیارەن چوون بە ئاوی هەرمانەکەرۊن، ئا بەشېشە هەکە جە ئاسنی وەشېکریێنې تەڕې مەبان و وەرە وەرە ژەنگە ماران ئیتر مەڕېزارە. پېسە پەندێ پەی وېوەری و خیانەتی بەکارئامان، ئاساو پا ئاوې ژەنەکەرۊ کە ئینا دلې وېشەنە، خەڵکیچ ئەپا کەسا زەرەر مارۊ کە ئینێ نزیکشەنە، ئاگاشان جە سڕ و تڕیشاشان هەن، بە ئاسانی مەتاوان فېڵې و خیانەتشان چەنە بکەران. یام پەی بارو زاڵمی ماچیۊن: یانی زاڵم بە نەتیجەو زوڵمو ویش نەبۊ ئەرەوڕایش نییەن، ئەچی دنیێنە ئانې هەکە دەسشا میاوۊ بە کورسی حوکمی و دەسەڵاتی جە سەرەتاوە زوڵم و زۊرو ویشا بەر نمەوزان. دمایی وردە وردە پێ مەکېشارەو ویژدانشا مەمرۊنەو میاوا لووتکې زوڵم و زۊری، دەی خۊ ئا خەڵکە هەکە ئینا چیرو دەساشانە دەرەقەتشان نمێن، بەڵام زوڵم و زۊرەکەشا وردە وردە ئڼە زەڕەتاڵې و ناشرینېشا مەکەرۊن ئانېچە هەکە تاکو هیزی پارېزنېنېشان، وەنەشان هۆرمەگېڵاوەو نەتیجە با بە یاردیدەرې پەی وڕنای و دلېنەبەردەیشان، هەر پېسە ژەنگەو ئاساوەکەی دەسەڵاتشان ژەنگە مەکەرۊو مەڕېزۊرە.[1]