چاشتەو خاڎمی
هورئەوەگېڵنای و ئاماڎەکەرڎەی: #ئەسعەد ڕەشید#
بەشەی پاڼزەهەمە
عەبدولڕەحمان کوڕو سۊفی مینەی، کە دماڕۊ بە (زەبیحی) ئەشناسیا. زەبیحی پېسە من فەقیر و داماگ نەبې، دەرسو وېش وانې و گېڵېوە پەی یانەی، وەرە وەرە بییەیمې ئاشنێ و گوڵستانو سەعدینە یاردیم دې و ئا دۊسیبییەیمان زیاتەر جە پەنجا ساڵا درېژەش کېشاو ئیسەیچ هەر دۊسمەن. بەتەمامی نمەزانو چ ساڵێ بې، دۆڵەت فەرمانش دابې بېجگە مەڵڵا و فەقی مەشۊم گرڎ کەس کڵاوەی پەهلەوییە سەرە بنیۊ و مېزەرو پۊشاکی کورڎی قەڎەغەن. مەڵڵا و فەقیچ مەبۊن قاقەزو حاکمو شاریشان پەنەبۊن. ئا حوکمە پەی پۊلیسو دۆڵەتی قازانجێ فرەش ئاردەبې، هەرکەسێ پېچێ مېزەر و پارچە بیبینێ پۆ قەڎ و سەرەیشۆ بییێ، یام چۊخەڕانکی هۆرامیش پۊشتێ، بە دارې و قامچیې گنېنېنە گیانش و بەبې بەرتېڵدای ڕزگاربییەیش مەحاڵ بې. دەی خوڎا مامۊسا مەڵڵا سەعیڎ و ئېمەی چارە سییاو چېش بکەرمېن. دمای مقۊ مقۊیێ فرەی قەرار دریا بلمېنە خزمەتو حاکمی و قاقەز وەربگېرمې، مەڵڵا عەلی کۊرەیچ ماچۊ منیچ چەنیتان مەو، موبارەک بۊ! دمای نماو نیمەڕۊیێ گەرمی مەڵڵا عەلی کۊرە و من ملو ڕێما گېرت، پەرسای پەرسای یانەو حاکمیمان ئېستۆ، نەلایمې پەی ئیدارەکەیش، داما بەرەو زەلامێ ناما، ناچار مەڵڵا سەعیڎ بە تەوەنی و مەڵڵا عەلی کۊرەیچ بە عەساکېش دەسشان کەرد بە کوای بەرەکەی، تومەز ئینە بەرەی پەشتېنەن و کەس ئەچاگۆ نمەلۊ یانەو حاکمی، بە زرم و کوتو بەرەی حاکم پڕێنە دلې یاگەکېشەنە بەرمشۊ و هورزۊ بزانۊ ئا دەنگە دەنگ و زرم و کوتە چېشەن، بەرە کریاوە، کابرێوە زرتە زەلامی سورهاڵ ئەجې خووگی ئەرەبەسیان، بەرەکەش وازکەردو بە فارسی ماچۊ: چېشتان گەرەکەن؟ من جە دیڎەی حاکمی ئڼە تەرسانې مەلەرزېنا، ئیتر نەزانام ئا یەرە فارسی نەزانە چەنی جوابشان داوە، هەر ئڼەمازانا حاکم بەگ بەگرڎو هېزو وېش نەڕناش: لۊدې وەرو چەمامۆ گمې بیدې، بەرەکەش تەق سەرمارە داپۆ و ئېمەیچ دەستان جە گونان درېژتەر پەشتەو بەرەینە مەنیمێ، ئیتر دژمانی یەرەقوڵیې و تەپە تەپی چوار قوڵی دەسش پەنەکەردو لۊژە لۊژە ڕوەو مزگی گېڵایمېوە. مامۊسا مەڵڵا سەعیڎ تەمام تەمیابېرە، واچې؛ جەحەڼەم کە بەرشکەردېنمې، سەرەش کەردە قڼگەو بابەیشەرە، قەساوەت دڵش گېرتەنارە، وەرو وېشەرە دۊعێ وانې پەی ئانەی قەساوەتەکە دلې دلیشەنە بەرپشۊ، بەڵام قەساوەت پاسە دڵش نەگېرتەبې بە دۊعێ و نزێ بەرپشۊن، چار هەر ئانەن ئی شارەیە جیابازمې و بلمې پەی خانەقاو شەرەفکەندی تاکو قەساوەتو کافری تەفر و توونا بۊ. تاتەم فرە کەیفش ئې کە چەنیشان بلو پەی خانەقای کە یاگێ پیروزەن و وانای ئاگەی بەرەکەتش هەن، بۊخچە و تۊشەبەرە پېچیێوەو هېڵې و نان ئاماڎې کریێ و دەمەو ساعب ڕوەو خانەقا بەرشییەیمې، پاسە بەرکۆت کە حاکم نویستەینە دەسێ باڵاش بییەن، ئەچا ڕوۆن کە ئېمە لوێبېنمې خزمەتش و بەرش کەردېبېنمې، پەی هەر کەسێ کە لوابې پەی لایش پەیش گېڵنابێ: (فرە سێربې لامۆ، من نانو نیمەڕۊیم واردو وتانې، دلې شیرین وەرمینە بی بە زرم و کوت، ئەجیام خانەگیر کریانا، بە تەرس و لەرزۆ بەرەم کەردۆ، چېش بوینو، یۊ درېژی ڕیش گەزی، یۊ گرڎەڵەی قوت، کۊرێ بە گۊچانۆ، زاروڵێوە سەرو بېشکې، ئامێنې کڵاوە بنیا سەرەم، قەڎ بە عومرم ئاڼە دیمەنی سەیرم نەڎیەن، قەڎ بە عومریچم ئاڼە نەتەرسانا). دلې خانەقاینە حوجرێ تەنگی دوە مەترینە مەرزیایمېرەو وانای دەسش پەنەکەرد، گوڵستانۆ لوابېنا بوستان، ئینجا دەرسی عەرەبی جە تەسریفی زەنجانی و عەوامل لوا، هەر دەرسێ وانېنا مەشیێ وەرم کەردێ، بەڵام ئاخۊ یاوېنانە باسو چېشی کەرمې، پاخوڎا شاهېڎا تەقەو سەرەیم ئې. جارێ با بزانمې ئا خانەقا کە چن جارێ نامېم بەردەن چەنی مەرزیانەرەو ئا ڕوە کە من دیڎەن چ بارێنە بییەن. بەشێ جە کتېبو چێشتی مجێور، نویستەی هەژار موکریانی، هورئەوەگېڵنای پەی سەرو زوانی هۆرامی: ئەسعەد ڕەشید.[1]