چراوتۊڕی چېشەنە؟
چراوی، کەرەسۍ ڕۊشنایی، کە بە نۆتە هەرمانە کەرۊن. جاران وەڵۍ ئانەی کارەبا وەشەکریۊ، پەی ڕۊشنکەرڎەیۆ دلۍ یانەکا، دلۍ هۊڎەکا، پەی ڕا و بانی و دلۍ مزگیەکا، چراوی بەکارئامێنە، کاسێ فافۊنی خڕ، ڕاو دەمێ گولانەیۆ نۆتەش کریێنەنە، لاو سەری کاسەکەیۆ فتېڵێ نریانەرە کە سەرێش شۊڕ بییەنەرە پەی دلۍ نۆتەو کاسەکەی، سەری دوەمش لای سەریۆ دلۍ شووشێ (بلوور)، دمای ئانەی فتېڵەکە نۆتەو دلۍ کاسەکەی هۊرچنۍ تاکو یاوۍ لای سەریش، کاتێ بە شقارتە ئاییرش نریۍ پۆ، سەرو فتېڵەکەی گیسیېنەو بە یاردی بللورەکۍ ڕۊشنایی پەی چواردۆریش پەخش کەرۍ. دماتەر جۊرە چراوێ پېڎێ بییۍ کە پەنەشان واچېنۍ (چراوتۊڕی)، ئی جۊرەشا کاسەو بنەکېشا گۆرەتەر بۍ، جیاتی فتېڵەی، تۊڕێ تەنکە بەشو سەری کاسەکەیۆ مەرزیېرە، ئاییر نریۍ تۊڕەکېوە، ئینجا پەمپ دریۍ و ڕۊشناییکەش فرەتەر بۍ. شۆقوو چراوتۊڕی فرەتەر و ڕۊشنتەر بۍ، پېسەبۍ گڵوپو ئیسەی، یانی بە تەمامی هۊڎێوە ڕۊشن کەرېوە.[1]