کورد دلې چەرخەکا تاریخینە
هۊرئەوەگېڵنای و ئاماڎەکەرڎەی: #ئەسعەد ڕەشید#
بەشې ویسەمە
ساڵەو (1360-- 1350و.ز.)
ساڵەو (1360) وەڵې زایینینە فیرعۆنو میسری ئامون حوتبی چوارەم کە بە ئەخناتون ئەشناسیان کۊچی دمایینش کەرڎەن، ئی پاشا مېردو شازادەی میتانی تادوهیبا-- نێڤەرتیتی بییەن.
بە هۊکارو فراوانبییەی دەسەڵاتو ئاشووریەکاوە ئەچی سەدەنە کاشییەکې پاشاکەو وېشان کوشتو (نازی بوگاش) شا یاگېشەنە نیارە، بەڵام ئېڎییچ بە دەسو ئاشوور ئۆبالیتیۆی کوشییا.
هەر ئەچی ساڵېنە پاشاو میتانییەکا کە نامېش تشراتا بې بە دەسو کوڕەکەیش کوشییا.
ساڵەو (1350) وەڵې زایینی بە یاردی ئاشوورییەکا کوری گالزۆی یەرەم بی بە فەرمانڕەواو کاشی و پانیشتو ئێراقی کۊنی، هەم وەڵاتو ئیلامیچش گېرت و دماتەر چەنی (بەل نیراریی) پاشاو ئاشوورییەکا لوانە دلې جەنگی.
دیسان ئەچی سەدەنە (1350) وەڵې زایینی مېیانو پاشاو میتانی (ماتی وارزای کوڕو تورشی ڕاتا) ی و پاشاو هیتی (یوپی لولی ئوما) ینە پێمانێ بەسیان.[1]