ئەمڕۊ کەفتەبیم بە لای دەردەوە
نامەی نەوجەستەم تازە کەردەوە
ساتۍ زیاتەر خوابم بەردەوە
جەو دما نە ڕووی میهر و وەفاوە
هۆرێزام نە جا وێسام وە پاوە
تەعزیمی نامەی مشک فامم کەرد
مەڵهەم بی پەی زام، دەوا بی پەی دەرد
قەسەم بەو خودای هەفت ئاسمان بۊ
سەوگەند بە یەکتای حەق حاڵزان بۊ
قەسەم تەبارەک نووری ئەحمەد بۊ
قەسەمم بە تاج شاهی سەرمەد بۊ
قەسەمم بە میهر عالەم ئارا بۊ
قەسەمم بە حەق میهر و وەفا بۊ
قەسەمم بە ماﮪ، سەوگەند بە پەروین
قەسەم بە وەحدەت ڕب العالمين
بە گیانی فەرزەند وێنەی ماهی من
یەعنی دڵارای غوڵام شاهی من
بە مەرگی فەرزەند چوون گیانم قەسەم
خانم، وە سۊمای چاوانم قەسەم
بە----/--- قەسەم
بە سەفای سەفوەت یەکڕەنگی قەسەم
بە نووری زەمیر دەروېشان قەسەم
بە سۊزی دەروون دڵڕێشان قەسەم
بە میهری قەلبی چەنی تۊم قەسەم
بە گیانی عەزیز یاری نۊم قەسەم
نییەن جەی دنیا پەی دڵەی تەنگم
شادی غەیر جە تۊ، غەیر جە سەرهەنگم
هەردووتان مایەی خۊشیی حاڵمەن
هەردووتان سالار دوورە ماڵمەن
هەردووتان دڵدار غەم ئەندێشمەن
هەردووتان مەرهەم دڵەی ڕېشمەن
هەردوو عەزیزتەر جە فەرزەندمەن
یەکۍ شەکەرەن، یەکۍ قەندمەن
باقي والسلام ئەی نووری دیدەم
بینایی چاوان هەم بەرگوزیدەم
موبارەکت بۊ بە شادمانی
پەی تەفریحی دام تێدا بوانی
#مەستوورە ئەردەڵانی# [1]