ئەم جار وە تاقی عەزم جەختمەن
هیجرانت وە دڵ بەڵای سەختمەن
یە گشت تەقازای شوومیی بەختمەن
عەزمی شکارگای کۊساڵانمەن
بەڵام جە دووریت پەشێو حاڵمەن
بێ تۊ چۊن گێڵوون نەو دەشت و دەردا؟
بێ تۊ چۊن گوڵان کەروون وە سەردا؟
جەو مەکان ئاهووی وێنە چاو مەستان
بەران مەکەران دەستان بە دەستان
بێ تۊ ئەر مەیل کەم بە شکارشان
حەسرەتمەند مانوو وە دیدارشان
کەبکی کۊساری جەو سەحرا و کۊدا
قەهقەﮪ مەوانۊ نەو شەو و ڕۊدا
ئەر سەیرشان بێ تۊ سەر وە بەرگم بۊ
ئی سەفەر سەفەر لوای مەرگم بۊ
جۊق جۊق قومرییان نەو مەکانەدا
دایېم مەشغووڵەن نە سەیرانەدا
بەبێ تۊ ئەر نە دڵ بۊ شەوقش
نە گەردەنم بۊ ئەو سیا تەوقش
نەو وادیی دڵبەر بوڵبوڵ مەوانۊ
سەحەرگە بە ناز دیدار مەنمانۊ
ئەر بە بێ تۊ مەیل کەروو پێشان
نە دیدە کۊر بام، دەستم بکێشان
جەو ماوا پۊل پۊل هەزار دەستانەن
ڕەسمشان دایېم وێنەی مەستانەن
وەستانشان -- ئەر بێ تۊ مەیل کەم
دوور جە تۊ خاتر نە زووخاو کەیل کەم
ئیسە من لوام بییەن وە تاقی
وەختۍ تەر پەیمان نەمەندەن باقی
دیداری ئاخر بنمانیم بە یەک
کامی ناکامی بستانیم جە یەک
بەڵکە عومرمان وەفا نەکەرۆ
من ماچوون، بەڵام خودا نەکەرۆ
باقی و السلام، نووری دیدەی من
دڵبەند و دڵدار، بەرگوزیدەی من
#مەستوورە ئەردەڵانی# [1]