Kongra Star amadekariya vekirina yekemîn akademiya hevbeş a perwerdeya fikrî ji bo jin û mêran li bajarê Hesekê dike. Armanc ji vekirina akademiyê danasîna sîstema komînal, jiyana hevbeş, pêşxistin û xurtkirina hişmendiya civakî ye.
Kongra Star di Şoreşa 19’ê Tîrmehê de pêşengiya Şoreşa Jinan dike. Di têkoşîna xwe de fikrê neteweya demokratîk, pêşxistina yekitî û hevbendiyên demokratîk di navbera jinan û baweriyên cuda yên gelên Sûriyê, Rojhilata Navîn û cîhanê de esas digire.
Di hemû şert û mercan de ji bo pêşxistina nasnameya jina azad û têkoşîna azadiyê xwe berpirsyar dibîne. Di rêxistinbûna xwe de ziman û şêwazê jinan ji bo pêşxistina xeta sêyemîn a di siyaset, aborî, xweparastin û edaletê de esas digire û bi rêya komîn, meclis û akademiyan xwe bi rêxistin dike.
Akademî ji bo jinan û civakê di her warî de qadên perwerde, fêrkirin û hişyarkirinê ne. Li ser vê bingehê û ji bo nasandina jiyana azad ji hemû aliyan ve, Kongra Star amadekariya vekirina yekemîn akademiyekê ji bo jin û mêran li bajarê Hesekê dike.
Kongra Star akademiyan wiha pênase dike, ew teşeyê sazîbûna bingehîn a Şoreşa Jinan û ronakbîriya wê ye. Çalakiyên xwe ji bo nasandina şêweyê jiyana ku tê jiyîn ji aliyê bîrdozî, siyasî, dîrokî, felsefîk, civakî, çandî û zanistî ve, bi rêxistin dike û bi rê ve dibe.”
ARMANCA VEKIRINA AKADEMIYÊ
Endama Koordînasyona Kongra Star a kantona Hesekê Rîma Mehmûd îşaret têkildarî amadekariyên vekirina akademiyê wiha got: Ev du meh in em li Hesekê amadekariya vekirina yekemîn akademiya fikrî dikin ku dê mêr û jin tê de perwerdeyê bibînin. Em hewl didin kêmasiyan derbas bikin û madeyên pêwîst peyda bikin, ji bo ku perwerdekar bi rihetî tev li perwerdeyan bibin.
Der barê armancên Kongra Star ji vekirina akademiyê di dema niha de, Rîma Mehmûd ev tişt anî ziman: “Perwerde ji bo jinan pir girîng e. Divê pergala komînal û jiyana hevbeş dûrî desthilatê, mulkiyetê, wêneya tê jin fêrî wê bûye, nas bike. Divê zanabûna civakî bi pêş keve û ji bo pêşerojê plan deynin.”
Rîma Mehmûd bal kişand ser bingehên perwerdeyê yên ku akademî dê xwe bispêre wan û wiha pê de çû: Dersên fikrî, prspektîfên rêber Abdullah Ocalan ên der barê jinan de, çawaniya hevjiyana azad di nava civakan de, zelalkirin û şîrovekirina têgîna şerê gel ê şoreşgerî û nasandina zanista jinan (Jineolojiyê) dê werin dayîn.
ÇIMA MÊR?
Perwerdekirina jinan û hiştina mêran di bin bandora pergala kapîtalîst de ku ji bo pêkanîna projeyên xwe yên dagirkeriyê jin û mêr kirine amûr, dê zirarê bide civakê. Di vî warî de de Rîma got: Ji bo belavkirina têgîna komînalîzmê û mafê wekheviya jin û mêr di civakê de, her wiha karkirina ji bo avakirina civakeke exlaqî û siyasî, bi van armancan em dixwazin vê akademiyê vekin.
XWEPERWERDEKIRIN
Endama Koordînasyona Kongra Star Rîma Mehmûd bang li jinên ji hemû pêkhateyan kir ku ji bo pêşxistina şoreşa hişmendiyê û avakirina civaka exlaqî-polîtîk, beşdarî akademiyên perwerdehiya fikrî bibin û wiha domand: Divê jin û mêr ên hemû pêkhateyan biçin akademiya ku dê ji wan re bê vekirin. Ji jinên ku kar nakin heta endamên saziyan dikarin cihê xwe di perwerdeyên akademiyê de bigirin.
Der barê navê akademiyê de Rîma wiha got: Me heta niha navek ji akademiyê re diyar nekiriye, lê bêguman wê navê têkoşerek be ku ji bo azadiya gelê xwe parastin û têkoşîn kiriye.
[1]
(hs)
ANHA