دواڕۆژ، بورهان یەحیا
جێگرێ پارێزگارێ دهۆکدهۆک بۆ کاروبارێن مرۆڤایەتى دیارکر کو؛ ل سنۆرێ پارێزگەها دهۆک 110 رێکخراوێن جیهانى یێن گرێدایى ب یۆئێن و یێن دى کار دکەن و بەرپرسێ بۆرد کاروبارێن مرۆڤایەتى ل دهۆک ژى خویاکر کو ئەڤان رێکخراوان ب شێوەیەکێ گشتى دەلیڤەیێن کارکرنێ بۆ پترى 2000 گەنجان پەیدا کرینە و هەتا نوکە ژى پترى 600 هزار ئاوارە و پەنابەر ل 25 کەمپێن پارێزگەهێ ماینە و پێدڤى ب خزمەتێن ڤان رێکخراوانن.
ئیسماعیل مستەفا جێگرێ پارێزگارێ دهۆک بۆ کاروبارێن مرۆڤایەتى بۆ دواڕۆژ دیارکر کو؛ هەر ژ دەستپێکا هاتنا ئاوارە و پەنابەران بۆ پارێزگەها دهۆک هەتا 110 رێکخراوێن سەر ب یۆئێن و یێن نێڤدەولەتى د کاروبارێن مرۆڤایەتى دا قەستا سنۆرێ پارێزگەها دهۆک کرینە و هەتا نوکە هەر ئێک د بسپۆرییا خۆ دا خزمەتەکا مەزن پێشکێشى ئاوارە و پەنابەران کرییە و شیاینە د بیاڤێ پەیداکرنا دەلیڤەیێن کارى ژى رۆلێ خۆ بگێرن.
گەنجەکێ دهۆک کو فەرمانبەرە ب ناڤێ رەمەزان بێسفکى بۆ دواڕۆژ دیارکر کو؛ پشتى مووچە هاتینە پاشکەفتکرن و ل دەمێ خۆ دا نەدهاتینە بەلاڤکرن و چونکو من لبەر بوو ژیانا هەڤژینیێ پێکبینم و پێدڤى ب پارەى هەبوو گەلەک بزاڤکرن کو ل رێکخراوەکێ بهێمە وەرگرتن و دگەل دەزگرا خۆ سیڤیێن خۆ پێشکێشى پترى 20 رێکخراوێن جیهانى د بوارێ کاروبارێن مرۆڤایەتى ل دهۆک کرن لێ ب بۆرینا پترى 6 مەهان چ ژوان رێکخراوان بەرسڤەکا ئەرێنى بۆ مە نەدان و ب گۆرەى دووڤچۆن و پێزانینێن ب دەست من کەفتین هندەک کەسێن دى ل وان رێکخراوان هاتبووونە وەرگرتن کو ل ئاستێ مە ژى نەبوون، لەوا هەست ب هندێ دهێتەکرن کو وەرگرتن ڤان رێکخراوان ژى واستەکارى تێدا هەیە و دڤێت رێڤەبەر یان بەرپرسەکێ وێ رێکخراوێ بنیاسى بۆ هندێ بشێى تێدا کار بکەی.
جێگرێ پارێزگارێ دهۆک بۆ کاروبارێن مرۆڤایەتى خویاکر کو؛ پێشکێشکرنا کارکرنێ ل ڤان رێکخراوان ب شێوەیەکێ ئۆنلاینە و هەموو کەس سیڤیێ خۆ دهنێرن و ل هیڤییا وەرگرتنا بەرسڤا خۆنە و بابەتێ واستەکاریێ د کارێ رێکخراوان دا کێمترە و بەشەکێ مەزن ژڤان رێکخراوان خزمەتەکا مەزن پێشکێشى ئاوارە و پەنابەران و هەتا خۆجهێن سنۆرێ پارێزگەهێ کرینە و بەردەوامن لسەر کارێ خۆ و کارگێرییا پارێزگەهێ ژى ب رێکا ڤان رێکخراوێن بیانى هەولێن مەزن داینە کو ب ڤەکرنا خول و وورکشۆپان ئاستێ رێکخراوێن ناڤخۆ بلندتر لێ بکەین داکو د هەموو بوارەکى دا باشتر و پیشەییتر ئەرکێن خۆ جێبەجێ بکەن.
مەجید شوکرى بەرپرسێ بۆردێ کاروبارێن مرۆڤایەتى ل پارێزگەها دهۆک دیارکر کو؛ ئەڤان 110 رێکخراوێن جیهانى هەر ئێک ب گۆرەى بسپۆرییا خۆ شیاینە پترى 2000 دەلیڤەیێن کارى بۆ خەلکێ ئاکنجیێ دهۆک و هەتا ئاوارە و پەنابەران بەرهەڤ بکەن و پشى وەرگرتنێ ژى ئەڤ کەسانێن هەنێ بسپۆرییەک بۆ خۆ پەیدا کرینە و بۆ پاشەرۆژێ ژى دێ شێن مفاى ژێ وەربگرن.
ناڤبۆرى ئاماژەکر کو؛ هەتا نوکە ئەڤ رێکخراوێن هەنێ ل هەموو ئه و 25 کەمپێن ل سنۆرێ پارێزگەهێ هاتینە دانان هەنە و ئەرکێن خۆ جێبەجێ دکەن، راستە بەشەک ژ ئاوارەیان و ب تایبەت یێن لایێ چەپێ مووسل ڤەگەریانە سەر جهێن خۆ لێ هەتا نوکە ژى نێزیکى 600 هزار ئاوارە لکەمپێن پارێزگەها دهۆک ماینە و ئەڤە هەژمارەکا مەزنە و پێدڤ ب چەندین جۆرێن هاریکاریێنە و ئەڤ رێکخراوێن بیانى ژى ب زحمەت ڤەگەرنە وەلاتێن خۆ و دێ بەردەوام بن لسەر ئەرکێن خۆ هەتا کو چ ئاوارە نەمینن، هەر چەندە بەشەک ژ وان ئاوارەیان بڕیار داینە کو نەزڤرنە سەر جهێن خۆ یێن بەرێ چونکو ئاستێ باوەرى و هەتا خزمەتگوزارییان لێ گەلەک کێمە، لەوا پێشبینى دهێەکرن ئەڤ رێکخراوە بۆ دەمەکێ درێژ ل پارێزگەهێ بمینن و ئه و گەنجێن دەڤەرێ ژى کار لسەر بکەن و ژیارا خۆ پێ برێڤە ببەن.
مەجید شوکرى زەلالکر کو؛ پشتى پرۆسەیا رزگارکرنا لایێ چەپێ مووسل ب دوماهى هاتی و لایێ راستێ ژى نێزیک دێ ب دوماهى هێت پرۆسەیا ڤەگەریانا ئاوارەیان بەرەڤ بندبوونێ چۆیە و هەر ژ دەستپێکا سالێ هەتا نوکە ژوان 5000 خێزانێن هاتینە دهۆک پترى 2500 خێزانێن ئاوارە ژ دهۆکێ بۆ دەڤەرێن خۆ چۆینە و کەمپ و جهێن دى ب جه هێلاینە.
بەرپرسێ بۆردێ کاروبارێن مرۆڤایەتى ل پارێزگەها دهۆک دا دیارکرن کو؛ بەرنامەیەک هاتییە دارشتن کو هەفتیێ دو جاران پرسەیا ڤەگەراندنا ئاوارەیان ل دهۆک برێڤە بچیت و بۆ هندێ ژى پاس دهێنە بەهەڤکرن و ب رێکا لایەنێن کارگێرى و ئێمناهیێ بۆ دەڤەرێن خۆ یێن بەرێ دهێنە ڤەگوهاستن و لڤێرە ژى رێکخراوێن بیانى رۆلێ خۆ دگێرن.
02-08-2017