Kitap Adı: VEKÂYİ‘U’L-FUZALÂ 2. CİLT
Yazar: ŞEYHÎ MEHMED EFENDİ
Çeviren: Ramazan Ekinci
Editör: Derya Örs
Çeviri Dili: Osmanlı Türkçesi
Basım Yeri: İstanbul
Yayınevi: Bilnet Matbaacılık ve Yayıncılık A.Ş.
Yayın Tarihi:2018

Ṣarı ‘Osmān Efendi 1
el-Mevlā ‘Osmān bin Meḥemmed. Vilāyet-i Anaṭolı ’da Amāsiyye müftīsi Meḥemmed Efendi’nüñ ferzend-i feżā’ilmendi Ṣarı ‘Osmān Efendi ’dür. Ḥā’iz-i ser-māye-i isti‘dād ve bāliġ-i mebāliġ-i ‘aḳl-ı müstefād olduḳda āheng-i dārü’l-mülk-i İstanbul ve Ġalaṭa ’da vāḳi‘ sarāy-ı sulṭānīye duḫūl itmiş idi. Anda daḫı ḳarār itmeyüp māh-ı cihān-tāb gibi taḥṣīl-i kemāle ‘āzim ve pīr-i cihān-dīde-i āftāb gibi müṭāla‘a-i ṣafaḥāt-ı celīleye müdāvim olup dest-yārī-i feyż-i Ḫudā-dād ile ser-bülend-i erbāb-ı isti‘dād olduḳda tekmīl-i ‘ilm ü ‘irfān ḳaṣdıyla diyār-ı Kürdistān’a sefer ve yegān yegān fużalā-yı şarḳ dārü’l-ifādelerine güẕer itmiş id Mūṣulī ve Merre Ḳāsım ve Mollā Nūru’llāh mecālis-i ifādelerinde tenvīr-i ḳīl ü ḳāl ve niçe zamān āsitān-ı feyż-resānlarında iştiġāl ile vāṣıl-ı mertebe-i kemāl ve resīde-i rütbe-i ‘ālü’l-‘āl olduḳdan ṣoñra tekrār semt-i Dārü’s-salṭana ’ya rūy-māl eyleyüp vezīr-i ‘ālem-ārā Köprili-zāde Aḥmed Paşa ’ya mu‘allim ta‘yīn olınmaġla şeref-yāb ve ṣadr-ı ‘ālī-ḳadr Ḳara Çelebi-zāde Maḥmūd Efendi ’nüñ mülāzemetlerin iktisāb idüp devr-i medāris-i ‘ilmiyye ve irtiḳā-yı merātib-i resmiyye iderek ḳırḳ aḳçe medreseden ma‘zūl ve müteraḳḳıb-ı neyl-i me’mūl iken biñ yetmiş üç Muḥarrem’inde Bosnevī ‘Īsā Efendi binā itdügi Dārü’l-ḥadīẟ ḫāric i‘tibār olınup ibtidā bunlara tevcīh olındı. Sene-i meẕkūre Rebī‘ü’l-evvel’inde ‘Abdü’l-ġaffār Efendi yirine Ca‘fer Aġa Medresesi virilüp Dārü’l-ḥadīẟ daḫı üzerlerinde ḳarār-dāde ḳılınmış idi. Sene-i mezbūre Receb’inde Es‘ad-zāde Seyyid Meḥemmed Ebu’s-su‘ūd Efendi yirine Ḥāfıẓ Paşa Medresesi ’ne nā’il, yetmiş dört Cumāde’l-āḫire’sinde Debbāġ-zāde Meḥemmed Efendi yirine Ġażanfer Aġa Medresesi ’ne vāṣıl olmışlar idi...[1]