مەسعود بارزانی، سەرۆکی هەرێمی کوردستان لەگەڵ ئەیاد عەللاوی و ئوسامە نوجەیفی، جێگرانی سەرۆککۆماری عێراق لەبارەی چۆنییەتی چارەسەرکردنی بابەت و کێشە پەیوەندیدارەکانی نێوان هەولێر و بەغدا کۆبووەوە و لەسەر چوار خاڵ رێککەوتن.
کۆبوونەوەکە رۆژی شەممە 7-10-2017 لە پەراوێزی پرسەی مام جەلال لە شاری سلێمانی بەڕێوەچوو. بەپێی راگەیێندراوێکی سەرۆکایەتیی هەرێمی کوردستان، لە کۆبوونەوە سێ قۆڵییەکەدا کە یەکەم کۆبوونەوەی هەولێر و بەغدایە لەدوای ئەنجامدانی گشتپرسی، بارودۆخی هەنووکەیی عێراق و چۆنییەتی چارەسەرکردنی بابەت و کێشە پەیوەندیدارەکانی گۆڕەپانی سیاسی تاوتوێکراون.
د. فوئاد حوسێن، سەرۆکی دیوانی سەرۆکایەتیی هەرێمی کوردستان رایگەیاندووە کە بەشداربووانی کۆبوونەوەکە لەسەر ئەم چوار خاڵە رێککەوتوون:
1- دەستپێکردنی گفتوگۆ و کۆبوونەوەکان لەنێوان لایەنە سیاسییە سەرەکییەکان لە عێراق بۆ هێورکردنەوەی بارودۆخەکە.
2- کۆبوونەوەکان لەسەر ئەجێندای کراوە ئەنجامبدرێن.
3- هەڵگرتنی دەستبەجێی سزاکان لەسەر هەرێمی کوردستان.
4- دەستپێکردنی کۆبوونەوەکان لە داهاتووێکی نزیکدا، بە پشتبەستن بە ئالییەتێکی تایبەت بۆ هەماهەنگی بەردەوام.[1]
07-10-2017