ۋانایێوە سەرپەیانە پەی ڕۊمانەو گېجاوەو ژیوای
دەس وەشیم پێ نویسەر و جنەکۊڵەر مامۊ ( ئیبراهیم میکە علی ) بەڕاستی فەنتازیاو ڕۊمانەکەی چېوێ لەزەتیو خیاڵبەر بۍ ، ئینە جگە ئانەی هەنگامێ ئەدەبی هۆرامی گەورێ بۍ پێ ئەدەبی کوردی بەگشتی و ئەدەبو هۆرامی بە تایبەتی کەتارېخو ئەدەبینە ملۆنە خانەو دەسپېشخەری و داهێنانیۆ ، فرە زەریف ڕوداوەکېش لکەدێنێ یۆکدرینیۆ کە یاگێ وېشا پەنە زانایمابۊ پېش و دەس وەشیش چەنە کەرمۍ، وەلێم هیچ هەرمانێ بۍ سەرنجو هەڵوێستەکەردەی سەرش ناتەمام بەرمشۊ، ئی ڕۊمانێجە یۆن چانیشا کە ئیسە و دماتەریچ نەک سەرنجە بەڵکەم ڕەخنەیچش ڕوبەڕو بۊوە.
بەندە پېسەو وېم ئەوەوانایېوە سەرپایی و متەوازعانەی کەپێم کەردەن چن سەرنجێم لاوە گەڵاڵێنە بینێ کە هۆمێڎەوارەنا یاگەگیرێ با!
سەرەتاوە ئەر هەر کەسېو ڕۊمانەو (چنارە ) و مامۆستا (ڕەزا بەهمەنی) کە یەکەمین ڕۊمانەنە کە بە هۆرامی نویسیێبۆ وە ڕۊمانەو (مەولە) و نویسەریچ (ئیبراهیم میکە علی) کە دوەم ڕۊمانەنە کە بەهۆرامی نویسیێبۆ چنی ئی ڕۊمانەیە ( گێچاوەو ژیوای ) جیاوازیێ فرە گەورە زهنو خیاڵشەنە دروسە مەبۊ ۋەرو ئانەیە (پاڵەوان و کات و یاگێچ) کە یەرێ بنەمێ گرد ڕۊمانێنێ ئەر پېسەو یۆی نەبا فرە نزیکېنۍ جە یۆکترینیۆ:
مەردەی ژەنەکا بە یەکجۊر کە مەردەیا سەرو لەمېوە.
هەتیم کەوتەی کارەکتەرەکێ (زاوڕۆڵەکا) و هۆرگېرتەیشاوە (تبنی) کەردەیشا لاو خەڵکی بێگانەی بەوېشا یۆشا فارس و یۆچشا عەرەب (جگە مەولەنە مامۆیش هۆرگېردێنێ) وە بەردەیشا پێی شارەکا فارسی و عەرەبی کە دماتەر تاران و بەغانە گیرسیاوە.
ڕۊمانەو (گێچاوەو ژیوای) نە نویسەر وەڵینەکەشەنە نویستەنش (ڕازەکێ باس جە ژیوارێوە بەرو هۆرامانی کەرۊ) نویستەنیجش ( هەرچڼە ڕۊمانەکێ بە هۆرامی نویسیێنە وەلێم ژیوارو قۆمیایەکا و دلێ ڕۊمانەکێ بەرو هۆرامانین) وەلێم کە سەعیدە کە پاڵەوانەو ڕۊمانەکەینە چنی زاڕۆڵەکەیش کە ملا پێ دەگێکېشا سەرو هانەکەو دەگێ لا مڎاانە ئیسراحەت کەرا. نویسەر نویستەنش (پاڵشدا پا تەوەنېوە هەکە سەرو هانەکەیۆ بۍ و پەنەش واچېني: تەوەنەکێ پیرشالیاری)
هەڵبەتە پیرشالیارو هەر چېوێوە کە نامۍ پیرشالیاریۆبۊ تایبەتا بە ناوچەو سنورو جۆگرافیاو هۆرامانیۆ، لانی کەم بەندە شکەمەبەرو یان نەژنەویێنەم بەرو هۆرامانیۆ پیرشالیار پێ هیچ مەبەستێ بەکار ئامابۆ واتە ڕۊمانەکێ یان واچمێ نویسەر نەتاوانش جە کەش و ئاووهەوا و تابلۆکا هۆرامانینە دور گنۆوە هەرچنە وەڵینەکەشەنە ماچۊ ڕوداوەکێ هنو بەرو هۆرامانین.
نویسەر منویسۆ (چوون کوچێ خۆندەواریش بۍ یوەیوەی وانیشاوە و وزێشا لاوە)
دماتەر مێ پنەما ماچۊ و منویسۆ (دماو نان واردەی زیێرە مارفشا بەرد پەی مۆزەخانەی و دماو ئانەیچ لوێ پەی باخجەو ئاژەڵا )
چێگەنە وانەر هەست بە فرە لوایێ (مبالغە) نویسەری کەرۊ، چوون سەردای مۆزەخانەی پێی کەسێ خۆنەواری تەمامیچ کە ڕۊشنبیریێ تەمامش نەبۊ چېوێ لاوەکین و نمێ خیاڵشەرە کە سەردایش کەرۊ ج چای پێ کەسێ کەم خۆنەواری یان کەسێ نەخۆنەواری دوورە دەگێوە ئامابۆ پایتەخت پېسەو (مارف)ی، وەلێم سەرداو باخچەو ئاژەڵا یان شار و گەمەکا ( مدینە العاب) یان سینەما کە چاوەختەنە پایتەختەنە بینێ چېوێ ئاسایین، بەڵام مۆزەخانە یاگێ تێڕامانینە! چوونکوم وەڵتەر هیچ وەڵینییێ (باکگراوند) هیچ کام چا کارەکتراشە بەیان نەکەردەن.
دماجار گرد هەرمانێ یاگێ سەرنجینەو بۍ ئانەیە مەلۆ خانەو نویستە زیندەو کاریگەرەکاوە، دیسان دەس وەشیم هەن پێی نویسەری و پی هەنگامێشە تەکانێوە جۊری (نوعی)یش دا بە نویستەیو ئەدەبو هۆرامانی و وېش و ڕۊمانەکایچش ملانە دلێ تارېخوی .
دانا عارف میکە.[1]