چی مەشۊم ڕۊمانەو (چنارە) ی بوانمېوە؟
بەشۍ: هەشتەمە (کۊتا بەشە)
خاڵێوە فرە گرینگە کە نویسەر جە متەیرە و ئیجرا کەردەیشنە سەرکۆتە بېیەن و داستان و ڕۊمانەکاشنە و بەتایبەت ڕۊمانەو چنارەینە بەهرەش چەنە گېرۆ، تێکنیکوو تەعلیق (suspense) ین. ئی تێنیکە هەوڵ مدۆ وانەری عادەت بدۆ بە ڕۊمانەکێ و فزوولبۊ کە ئی کەسایەتیێ چېششا سەر مێ و زەوق و حەزش پەی یاواینە جە چارەنوېسو ڕۊمانەکێ، هانیش بدۆ فرەتەر پەیجۊربۊ و تاکو ملۆ وەرۆ، عاشقانەتەر وەنۊشۆ. نویسەر پەی ئی تێکنیکی تاوۆ چا ڕووداوا بەهرە بەرۆ کە وانەر چەمەڕاییشا مەکەرۊ و ماتڵشا نیا. ڕەنگا نوقتە عەتفوو ئی ڕۊمانێ مەرگو پەروانەیبۊ. نویسەر جۊرێوە پەروانەی بەحس کەرۊ و کەسایەتیو ئی ژەنېشە متەنرە، وانەر گردو سەرنجێش وزۆ سەرو پەروانەی، وەلێ وەختێ ڕۊمان نویس کوشۆش، توشوو چڵاکنایشرە کەرۊ. بەهمەنی لکێ فرێ وزۆنە داستانەکێ و وانەری یەواش یەواش مەجبوور کەرۊ بزانۆ لاپەلێ تەر و فەسڵێوە تەر چېش ڕوە مدۆ. من ئەجۊم ڕەزا بەهمەنی هەرچن بەشەکای تەروو هەرمانەکاشنە لاوازی وینیەیۆ، ئی تێکنیکوو تەعیلیقی وەش وەشێ قەرەبووش کەرۊوە پەیش و ئی کېشایە و ئاردەی و بەردەی وانەری چەنوو ئا زوانی و ژەنایش دلەڕاسی و دێڕەکانە پېسەو هەڵیزێوە، هەرمانۍوە کەرۊ وانەر موعتادوو ئی ڕۊمانێبۊ و جە گردچېش بنیۆە لا، پەی تەمامنایش و پەی ئانەی زانۆ عاقیبەت چېش مێ ملو ئی ژیوارە و ئی دۊخێرە.
فەرشید ڕۆستەمی.[1]