باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ڼۊزڎەهەمە
خەولە، بە ئەمرەو حەزرەتی شییە وە لاو (سۆدە) ی، کە بېوەژەنێ بۍ، پەی داواکەردەیش، سۆدە، ماچۊ: ڕەزایی تاتەیم زەروورەن، تاتەو سۆدەی ماچۊ: گەر تۊ مەیلت هەن پەی پېخامئاوەری، ئانە مەشۊم تۊ پەروانە بۍ، محەمەدیچ شەمعە، من ڕازیەنا.
دیسان هەم خەولە جە ئەو مەوعوودە
بە ئەمری حەزرەت شیی وە لای سۆدە
واتش: من موژدەی خەیرم ئاوەردەن
حەقق بە شانی وېش کەرامەت کەردەن
موستەفای موختار مەیلی تۊ دارۊ
وە شاڎیی عومری چەنیت بۊیارۊ
وات: پەڕ موبارەک چوون ئەو عازمەن
بەڵام مەسڵەحەت پدەر لازمەن
خەولە دیسان شیی وە لای زەمعەی پیر
فەرموودەی حەزرەت بەیان کەرد تەقدیر
زەمعە کیانا سۆدەشان ئاوەرد
خەیلێ دەلالەت فەرزەندی وېش کەرد
واتش: محەمەد کەفوی کەریمەن
بوزورگەوارەن شانش عەزیمەن
ئەگەر مەیلت هەن تا بدەوت بە ئەو
تۊ پەروانە وار، ئەو چوون شەمعی شەو
سۆدە ڕوخسەتدا زەمعە قبووڵ کەرد
کیانا حەزرەت تەشریفش ئاوەرد
بە موبارەکی عەقدش جاریی کەرد
سۆدەشان بە قەسر ئالای حەزرەت بەرد
مەلایەکەی عەرش ئەو شەو جە شاڎیی
واناشان مەقام موبارەک باڎیی.[1]