باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎهەمە
ئەبوتالیب بە دەم ئیمانش ناوەرد، حەزرەت مایۊس بی جە ئیمانیش، قوڕەشیەکۍ فرەشان پەنە وەشبۍ، بە کۊمەڵ لوێ پەشتەو سەرەو ئەبوتالیبی، واتشان: مېیانو ئېمەو محەمەدی ڕېک ۋزە، نەک دمای وېت کېشەکۍ قووڵتەرۍ باوە.
جەو دەم هەم قوڕەیش مشوورەت کەردەن
وە ئەبوتالیب گرد هجووم بەردەن
عەتبە و شیبە سەف نشین سەف
ئەبوجەهلی سەگ ئومەییە بن خەڵەف
ئەبو سوفیان، هەم ئەبولەهەب
باقی سەنادید قوڕەیشی عەرەب
نە دەوری باڵین تالیب جەم وەردەن
جە بانی حەزرەت یەکسەر عەرز کەردەن
واتشان، بەندەی ئەبو تالیبین
ئېمە گرد ئەبنای توخمی غالیبین
یەکسەر دڵشادین بە سەرداری تۊ
بە عەتا و کەرەم خەندە و یاری تۊ
ڕوئەسای قوڕەیش مەردانی سەروەر
کەس جە حوکمی تۊ بەرنەشیەن وە بەر
بەڵام مەترسین جەی ناتەوانی
دووربای کۊچکەری جەی دنیای فانی
محەمەد جەی وەر سا هەرچی کەردەن
جە بۊنەی تۊوە کارش وېیەردەن
ئیسە ئەو نیزاع هەنی دمای تۊ
تا ڕووی قیامەت باقی مەمانۊ
ئەگەر تۊ وە دڵ سەلاح مەزانی
یا بە ئاشکار، یا بە نیهانی
ئارۊ محەمەد تەڵەب کەر یەک دەم
بادا جە یەکتر ببین خاتر جەم
قەرارێ بدەر جە مابەینمان
لېڵ نەبۊ مینای جامی زەینمان
نە ئەو بگېرۊ وە ئېمە عەتەو
نە ئېمە بەرین نامی دینی ئەو
ئېمە وە بت کېش ، ئەو هەم دینی وېش
بسازین وە هەم وېنەی قەوم و خوېش
غەرەزی بەندەگان، بەو بکەر قبووڵ
بادا نە یاوۊ بە قەتڵ و قتووڵ.[1]