باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و ویسەمە

دمای موچیاریەکا نەستوورای گاوری، مەیسەرە و حوزەیمە، کە یاوەرۍ کاروانەکەیش بېنۍ، گرتشان نە گۊش، دیسان محەمەد چەنی کاهینێ تەری، گفتوگۊش کەرد جە بارەو بتەکاوە:
مەیسەرە، چەنی حوزەیمەی پەڕ هۊش
حەرفی نەستوورا، گرتشان نە گۊش
عەقیدەی حەزرەت، گرتشان نە دڵ
بە یەقین باوەڕ کەردشان حاسڵ
دیسان، هەم حەزرەت چەنی یەک یەهوود
یەهوودی کاهین، گومڕای بۍ وجوود
یەهوود عەرزش کەرد، وەبۍ چۊن و چەند
بە لات و عەززا، مەدەرووت سەوکەند
حەزرەت، وات: ئەر من ڕام بگنۊ لېشان
دەرسات، ڕووی وېم، مەگېڵنو لېشان
یەهوود، وات: تۊ حەقق و جانب داری
مەعلووم خودای وېت، وە چەم مەداری
چەو دما، واتش، وە حەقق سەوگەندەن
ئینە هەر ئەو شەخس، سەعادەتمەندەن
خودا، جەتەورات، ئیسمی ئەو بەردەن
وەسفش پەی مووسای بن عومران کەردەن
غەرەز نەقدی جینس، یەکسەر، بەردشان
مایەی میسر، گرد، خرید کەردشان
شەرتی تجارەت، مەبۊ، بەو تەور بۊ
نەفعش چوون ڕېژەن، ڕېزای نۊ هەور بۊ
بارخانەی باز، بیی وە شاڎیی و خورەم
ڕوو نیان، نە ڕووی، مەککەی موعەززەم
مەنزڵ، بە مەنزڵ، تەیی کەردەن ڕاهان
ئیلزام، دا، تەمام، گرووی گوم ڕاهان
مەیسەرە دیا، دوو مورغی ئەزرەق
پەی چەترداریی مدران، موعەوەق
هەریەک، بە چەتر، شیرینی، ئەعلا
جە فەوقی حەزرەت، گرتەن وە باڵا
هەر بە ئەڼازە، ڕەبتی ناقەی ئەو
مەویەران، دەردەم، بە دەوانی دەو
نمازان، زەڕەی شوعلەی ئافتاب
بگنۊ، نە گەردەن، شای گەردەن نیقاب
چەنی هەم حەزرەت، شای گەردوون بۍ گەرد
وە مەککەی شەریف، موراجەعەت کەرد.[1]