باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و دوەمە
میزا ئۆلقاڎرو پاوەی، باس جە ئۆلاڎەکا حەزرەتو (سام)ی کوڕو حەزرەتو نووحی کەرۊن:
ئەر فەخشێ ئەرشەد، ئۆلاڎی (سام) بۍ
بوزورگی ئەوەڵ، گرد خاس و عام بۍ
ڕەسوولی مورسەل، جەمعی ئەنبیاﮪ
گرۊی ئەولیاﮪ، زومرەی ئەسفیاﮪ
خولەفای ئیمام، ئەسحابی سەروەر
شەهیدی غازی، ئازادی مەحشەر
پیرە مورید و مەشایېخ تەمام
سولەحای نەجیب، دائېرەی ئیسلام
عولەمای خاس، شەریعەت مەدار
حاجیانی حەج، پاکیزە کردار
هەرچی موستەقیم، جادە ئیسلامەن
نەسڵی ئەرفەخشە، ئەولادی (سامەن)
سانی کەیومەرس، هەم فەرزەندی سام
شېری بېئەندېش، نادرەی نیک نام
دنیا، جە شۊڕش، ئەو کەرد، مونەززەم
بی، بە، پادشای، ئەنبیای ئادەم
هەرچی پادشای، ڕووی سەرزەمینەن
خاقان، خاقانان، چینی ماچینەن
سوڵتان سوڵتانان، ئیسلام پەناهان
تاجی، موڕەسسەع، تەختی زەڕجاهان
تایېفەی کەیان، کەیکەیانی، کەی
سوپاسالاران، لەشکەرکەشیی، ڕەی
وەکیلی ئەییام، ئومەرای عېزام
بەگلەر، بەگلەران، دارای سەنگین، سام
غەرەز، جە (یافت)، توخمی سامی حام
هەرچی مەخڵوف بۍ، جە دنیا، تەمام
هەفتاد و دوو دین، هەفتاد و دوو دین
قەرار دادەبین، نە ڕووی سەرزەمین
میللەت، میللەتان، هەر یەک یەکێ، کېش
هەر کام، مەزهەبێ، قەرار، دان، پەی وېش
حوکەمان، قابل، دارای دەهری دوون
زومرەی دەوڵەتمەند، نە ڕوبعی مەسکوون
هەرچی، خوش ئېقباڵ، ئەعلا، مەقامەن
توخمی کەیومەرس، ئەولادی سامەن
نوتفەی، ئەو پەنج، وە غایەت، یاوا
دایېر، بی، دنیا، مەعموورەی ئاوا
مەعموورەی وەسەت، دنیا و دوون یەکسەر
بی، بە موڵکشان، بە ئەمری، داوەر.
[1]