دەقی پەیامەکەی #نێچیرڤان بارزانی#:
يادی 31 ساڵەی ڕاپەڕینی شکۆداری ئازاری 1991، بە گەرمی لە خانەوادەی سەربەرزی شەهیدان و پێشمەرگە قارەمانەکان و هەموو کوردستانيیان لە ناوخۆ و دەرەوەی کوردستان پيرۆز دەکەم.
ڕاپەڕین دەربڕی خواست و باوەڕ و ئیرادەی پتەوی گەلی کوردستان بوو لەپێناو ژیان و داهاتوويەکی باشتری ئازاد و سەرفراز و ڕەتکردنەوەی ستەم و زۆرداريدا. بەرهەمی خەبات و قوربانیدانی پێشمەرگە و گەل و جەماوەری ڕاپەڕيو و يەکڕيزيی لایەنە سیاسییەکان و پێکهاتەکانی کوردستان بوو.
ڕاپەڕین دەروازەی واڵای گەلی کوردستان بوو بۆ قۆناغی نوێی خۆبەڕێوەبردن و دامەزراندنی دامەزراوە شەرعی و فەرمیيەکانی هەرێمی کوردستان کە پاش ئازادیی عیراق لە دەستووردا جێگیر کران، لە نێوخۆ و دنیای دەرەوەشدا بە فەرمی ناسران و مامەڵەيان لەگەڵدا دەکرێت.
لەم يادەدا دووپاتی دەکەينەوە کە پاراستنی ئازادی و دەسکەوتەکانی ڕاپەڕين و مافە دەستوورییەکانی هەرێمی کوردستان، ئەرک و بەرپرسیاريەتیی هاوبەشی هەموو کوردستانيیانە و وەفادارییە بۆ گیانی پاکی شەهیدان و هەموو قوربانیانی ڕێگای ئازادی.
با ئەم يادە هاندەرمان بێت بۆ پتەوکردنی زياتری گيانی تەبايی، پێکەوەيی، يەکڕيزی و قووڵکردنەوەی پێکەوەژيان و يەکترقبووڵکردن و لێبوردەيی و کارکردن لەپێناو ئه و ئامانجانەدا کە شەهيدانی ڕاپەڕين و تەواوی شەهيدانی کوردستان گيانيان لەسەر دانا.
وێڕای دووپاتکردنەوەی پابەنديمان بە ئامانجەکانی ڕاپەڕينەوە، بە هيوا و ئومێد، بە بڕوا و گەشبينييەوە بۆ داهاتوويەکی باشتر دەڕوانين و بە ڕێز و شکۆوە يادی شەهيدانی ڕاپەڕين و تەواوی شەهيدانی کوردستان دەکەينەوە.
نێچيرڤان بارزانی
سەرۆکی هەرێمی کوردستان
2022/3/5[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!